ភ្នំពេញ៖ បញ្ហាគ្រោះអគ្គិភ័យ ភ្លើងឆេះផ្ទះ ជាបញ្ហាធ្ងន់ធ្ងរក្នុងជីវិត ដូចពាក្យចាស់លោកថា «ស៊ូលិចទូកកណ្តាលទន្លេ កុំឲ្យតែភ្លើងឆេះផ្ទះ»។ បញ្ហាភ្លើងឆេះផ្ទះ ជាគ្រោះថ្នាក់មើលមិនឃើញ តែអាចការពារ…
ភ្នំពេញ៖ បញ្ហាគ្រោះអគ្គិភ័យ ភ្លើងឆេះផ្ទះ ជាបញ្ហាធ្ងន់ធ្ងរក្នុងជីវិត ដូចពាក្យចាស់លោកថា «ស៊ូលិចទូកកណ្តាលទន្លេ កុំឲ្យតែភ្លើងឆេះផ្ទះ»។ បញ្ហាភ្លើងឆេះផ្ទះ ជាគ្រោះថ្នាក់មើលមិនឃើញ តែអាចការពារ និងទប់ស្កាត់បាន តាមរយៈប្រជាពលរដ្ឋម្នាក់ៗ។
មន្ត្រីជំនាញអគ្គិភ័យ លើកឡើងថា កត្តានាំឲ្យកើតអគ្គិភ័យនៅកម្ពុជាយើង មាន ៣ សំខាន់ៗ គឺ១- ការឆ្លងចរន្តអគ្គិសនី និងបណ្តាលមកពីចរន្តអគ្គិសនី ៤០ % ទី២-ប្រើប្រាស់ភ្លើងទៀនធូប ចំនួន ៣៩% និងទី៣-ក្តាប់មិនបានមូលហេតុ មានចំនួន ២១%។
ក្នុងពិធីរម្លឹកដល់វិញ្ញាណក្ខន្ធអ្នកស្លាប់ ដោយគ្រោះថ្នាក់ចរាចរណ៍ កាលពីថ្ងៃទី២ ខែកុម្ភៈ ឆ្នាំ២០២១ នៅតាខ្មៅ ខេត្តកណ្តាល សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលជាថ្នាក់ដឹកនាំគ្រប់គ្រងប៉ូលិសអគ្គិភ័យ បានព្រមានដល់មន្ត្រីជំនាញខាងពន្លត់អគ្គិភ័យ លើករណី ដែលប្រជាពលរដ្ឋ តែងតែលើកឡើងថា នៅពេលមានហេតុការណ៍គ្រោះអគ្គិភ័យ ភ្លើងឆេះផ្ទះ គឺឡានទឹក ទៅដល់ហើយ នៅតថ្លៃ យកលុយពីម្ចាស់ផ្ទះ ដែលឆេះ ទើបបាញ់ទឹកពន្លត់។ ករណីនេះ សម្តេចក្រឡាហោម បានព្រមាន កុំឲ្យកើតមានហេតុការណ៍ដូចការលើកឡើងនេះឲ្យសោះ។
ចំណែកលោកឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៅក្នុងបទសម្ភាសន៍ពីវិធានការទប់ស្កាត់ និងការពារគ្រោះថ្នាក់អគ្គិភ័យ ក្នុងឱកាសពិធីបុណ្យចូលឆ្នាំចិន ប្រពៃណីចិន វៀតណាម កូរ៉េ ដែលនឹងប្រារព្ធធ្វើពិធីសែនព្រេន នៅថ្ងៃទី១១ ខែកុម្ភៈ បានលើកឡើងថា ការចូលរួមរបស់ពលរដ្ឋ គឺពិតជាមានសារៈសំខាន់បំផុត ក្នុងការបង្ការ និងការពារអគ្គិភ័យ។
លោកលើកឡើងថា ការយល់ដឹងរបស់ប្រជាពលរដ្ឋ នៅក្នុងការចូលរួមបង្ការ និងទប់ស្កាត់នូវគ្រោះអគ្គិភ័យ គឺនៅមានកម្រិតណាស់ ដោយបងប្អូនភាគច្រើន គឺពឹងផ្អែកទាំងស្រុងលើកម្លាំងជំនាញពន្លត់អគ្គិភ័យ ហេតុដូច្នេះហើយ ដើម្បីទប់ស្កាត់នូវការកើតមានអគ្គិភ័យ ក្នុងទ្រង់ទ្រាយធំ ពិបាកនឹងទប់ស្កាត់នោះ គឺទាមទារឲ្យពលរដ្ឋគ្រប់រូប ចូលរួមឲ្យបានសស្រាក់សស្រាំ។ ត្រង់នេះ មានន័យថា ពលរដ្ឋម្នាក់ គឺត្រូវដើរតួជាមន្ត្រីអគ្គិភ័យម្នាក់។
នាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ បានលើកឡើងថា នៅក្នុងឆ្នាំ២០២០ គ្រោះអគ្គិភ័យ បានកើតឡើងចំនួន ៩៣៧ លើក គឺកើនឡើង ២២០ លើក បើធៀបនឹងឆ្នាំ២០១៩ ដែលអគ្គិភ័យ បានកើតឡើង ៧១៧ លើក។ ក្នុងឆ្នាំ២០២០ អគ្គិភ័យបានបណ្តាលឲ្យមនុស្សស្លាប់ ២៤ នាក់ និងរបួស ៣៦នាក់ បណ្តាលឲ្យឆេះផ្ទះអស់ ៧០៧ ខ្នង និងតូប ៥៩៤ តូប។ មូលហេតុ គឺមិនខុសគ្នាពីឆ្នាំមុនៗប៉ុន្មានទេ គឺករណីបណ្តាលមកពីចរន្តអគ្គិសនី ៣៧,៨៨ ភាគរយ និងប្រើប្រាស់ភ្លើងផ្សេងៗ ៣២,៣៣ ភាគរយ ព្រមទាំងក្តាប់មិនបានមូលហេតុ មានចំនួន ២៩,៧៧ ភាគរយ។
នៅក្នុងឆ្នាំ២០២០ កន្លងមក ចំណុចដែលកត់សម្គាល់ គឺរាជធានីភ្នំពេញ ខេត្តកណ្តាល និងខេត្តសៀមរាប កើតមានអគ្គិសភ័យច្រើនជាងគេ។ នៅរាជធានីភ្នំពេញ ១១៧លើក ខេត្តកណ្តាល ចំនួន ៩៩លើក និងខេត្តសៀមរាប ៨៥លើក។ រីឯខេត្ត ដែលពុំសូវមានអគ្គិភ័យ កាលពីឆ្នាំ២០២០ គឺខេត្តកោះកុង ៧លើក ខេត្តឧត្តរមានជ័យមាន ៧លើក ខេត្តរតនគិរី ៥លើក និងខេត្តត្បូងឃ្មុំ ៦លើក។
សម្រាប់ខែមករា ឆ្នាំ២០២១ នៅទូទាំងប្រទេស អគ្គិភ័យ កើតមានចំនួន ៦៧ លើក លើស ៧៧ លើក មានន័យថាថយចុះ ចំនូន ១៧ លើក បើធៀបនឹងខែមករា ឆ្នាំ២០២០។ ក្នុងនោះ បង្កឲ្យស្លាប់មនុស្ស ៣ នាក់ និងរបួសចំនួន ៨ នាក់ និងឆេះផ្ទះ ៥២ ខ្នង។
ក្នុងខែមករា ឆ្នាំ២០២១ រាជធានី-ខេត្ត ដែលមានអគ្គិភ័យច្រើនជាងគេនោះ គឺរាជធានីភ្នំពេញ ចំនួន ១៤ លើក ខេត្តកណ្តាល ៨ លើក និងខេត្តសៀមរាបចំនួន ៦ លើក។
ម្យ៉ាងទៀត អ្នកជំនាញ លើកឡើងថា ប្រជាពលរដ្ឋភាគច្រើន ពិសេសនៅតាមជនបទ ពុំបានគិតគូរទៅលើប្រព័ន្ធគ្រប់គ្រងអគ្គិភ័យនោះទេ។ ផ្ទះពលរដ្ឋខ្លះ ពិសេសផ្ទះ ប្រកបអាជីវកម្មផ្សេងៗ គឺពុំទាន់មានឧបករណ៍បង្ការពន្លត់អគ្គិភ័យ ដូចជា បំពង់ពន្លត់អគ្គិភ័យ ឬឧបករណ៍ប្រឆាំងអគ្គិភ័យបឋមផង។
បើសិនជាមានបំពង់ពន្លត់អគ្គិភ័យ នៅផ្ទះ គឺនៅពេលមានហេតុការណ៍អ្វីកើតឡើង គាត់អាចគ្រប់គ្រងទាន់ពេលវេលា នៅពេលភ្លើងចាប់ផ្តើមឆេះ។ ប៉ុន្តែនៅពេលសព្វថ្ងៃ ប្រជាពលរដ្ឋច្រើនតែពឹងផ្អែកទៅលើជំនាញ និងពឹងផ្អែកទៅលើក្រុមពន្លត់អគ្គិភ័យ។
ប្រជាពលរដ្ឋ គួរតែយកវិធានការបឋម ក្នុងការបង្ការ និងសង្គ្រោះអគ្គិភ័យ ដូចជា ពេលដែលមានហេតុការណ៍ភ្លើងឆេះផ្ទះកើតឡើង ប្រជាពលរដ្ឋ គួរតែមានវិធានការ ដូចជា មានធុងទឹក បាវខ្សាច់ ជាដើម ឬក៏បំពង់ពន្លត់អគ្គិភ័យ ដែលអាចប្រើប្រាស់ប្រឆាំងភ្លើងតូចៗ បាន នៅកន្លែង ដែលចាប់ផ្តើមឆេះ។
ប៉ុន្តែផ្ទុយទៅវិញ ប្រជាពលរដ្ឋ នៅតាមមូលដ្ឋានដោយច្រើន ហាក់បីដូចជាមិនទាន់ចូលរួមចំណែកលើវិធានការបង្ការបឋមនេះ ឲ្យបានផុសផុលនៅឡើយទេ។ ពួកគាត់ នៅពឹងផ្អែកទាំងស្រុងតែលើមន្ត្រីជំនាញពន្លត់អគ្គិភ័យ។
យ៉ាងណាក៏ដោយ អ្នកជំនាញពន្លត់អគ្គិភ័យ លើកឡើងថា ការបង្ការ ទប់ស្កាត់ និងពន្លត់អគ្គិភ័យ គឺមិនមែនតែលើនគរបាលអគ្គិភ័យទេ ប្រជាពលរដ្ឋម្នាក់ គឺជាក្រុមពន្លត់អគ្គិភ័យម្នាក់ដែរ។ មានន័យថា ប្រជាពលរដ្ឋម្នាក់ ត្រូវចេះវិធានការពន្លត់អគ្គិភ័យ ឬក៏ការប្រើប្រាស់ឧបករណ៍ផ្សេងៗ ដែលមាននៅគោលដៅរបស់គាត់ ដោយត្រូវចេះដូចគ្នា ដើម្បីសង្គ្រោះបឋមនៅនឹងកន្លែងនោះ។ កាលណាវិធានការបង្ការ បានជោគជ័យ គឺករណីអគ្គិភ័យ កើតឡើង គឺមិនអាចកើតក្នុងទ្រង់ទ្រាយធំបានទេ។
ជាការពិត ករណីភ្លើងឆេះផ្ទះ មិនមែនឆេះឡើងភ្លាម ក៏ឆេះពេញផ្ទះទាំងមូលភ្លាមៗនោះដែរ គឺអាចចេញពីកន្លែងដាំបាយ ដុតភ្នក់ភ្លើងអាំងអ្វី ជាដើម ឬក៏ការដុតព្រៃ ឬក៏ផ្ទុះសេខ្សែភ្លើង ជាដើម។ តែភាគច្រើន គឺធ្វេសប្រហែស ដោយប្រជាពលរដ្ឋដោយច្រើន យល់ច្រឡំថា គ្រោះអគ្គិភ័យកើតឡើងដោយធម្មជាតិ តែភាគច្រើន ការពិតជាបង្កឡើង ដោយសារតែមនុស្សប៉ុណ្ណោះ។
យ៉ាងណាក៏ដោយ មានការកត់សម្គាល់ថា នៅរាជធានីភ្នំពេញ និងនៅក្នុងទីប្រជុំជន ឬនៅតាមបណ្តាខេត្តធំៗ នៅជុំវិញរាជធានីភ្នំពេញ ប្រជាពលរដ្ឋចូលរួមបង្ការទប់ស្កាត់ពី ៤០ ទៅ ៥០% ដែរ គឺផ្ទះពលរដ្ឋខ្លះ មានបំពង់ពន្លត់អគ្គិភ័យ មានធុងទឹក ជាដើម។
ឲ្យល្អជាងនេះទៅទៀត គឺការបង្ការ ទប់ស្កាត់គ្រោះអគ្គិភ័យ តាមរយៈការបង្កើនការប្រុងប្រយ័ត្ន លើចរន្តអគ្គិសនី ព្រមទាំងប្រយ័ត្នទៀនធូប ភ្លើងចង្ក្រាន្ត ឬភ្លើងដុតសំរាម ជាដើម គឺជារឿងល្អ។ ដូចពាក្យចាស់ថា ការពារប្រសើរជាងព្យាបាល។ ម្យ៉ាងចូរគិតបន្តិច ចំពោះអ្នកដុតធូបទៀន បូជាព្រះ ទេវតា កុងម៉ា ជាដើម សូមដុតទៀនធូប ដោយគិតផង ក្រែងលោ មិនមែនជាការជួយ បែរជាបង្កជាភ្លើងឆេះផ្ទះទៅវិញ។ ម្យ៉ាងទៀត បើមិនបង្កជាឆេះផ្ទះ ក៏ក្រុមអ្នកមាន ជំនឿ ងុបងល់ ដោយមិនគិតអ្វីសោះ លើការបន់ស្រន់ តាមរយៈដុតធូបទៀនរាល់ថ្ងៃ ព្រឹកល្ងាចនោះ គឺក៏អាចបង្កជាផ្សែង បណ្តាលឲ្យខូចសុខភាពខ្លួនឯងផង កូនចៅ អ្នករស់នៅផ្ទះនោះផង ហើយក៏ខូចជញ្ជាំង ពិដានផ្ទះ ដោយសារតែផ្សែងភ្លើងទៀនធូបនោះដែរ។ អ្វីៗក៏ដោយ សូមឲ្យជឿដោយបញ្ញា។ បើដុតទៀនធូប ក៏ត្រូវតែប្រុងប្រយ័ត្ន និងមើលឲ្យរលត់អស់ស្រួលបួល ចាំបិទទ្វារ ចេញពីផ្ទះ ឬទៅផ្សារ។ ភ្លើងចង្ក្រាន ហ្គាសជាដើម ក៏ត្រូវពិនិត្យ បិទក្រោយចំអិតម្ហូបអាហារដែរ៕ ដោយ៖ មុត ស្រីពៅ
ចែករំលែកព័តមាននេះ