បណ្ដាមេធាវីលោកត្រាំនាំគ្នារត់ចោលលោក
សហរដ្ឋអាមេរិក ៖ ទូរទស្សន៍ CNN និងបណ្ដាសារព័ត៌មានអាមេរិករាយការណ៍នាថ្ងៃទី៣១ ខែមករា ឆ្នាំ២០២១ថា មេធាវីជាច្រើនរូបរបស់អតីតប្រធានាធិបតីអាមេរិក លោកដូណាល់ ត្រាំ…
សហរដ្ឋអាមេរិក ៖ ទូរទស្សន៍ CNN និងបណ្ដាសារព័ត៌មានអាមេរិករាយការណ៍នាថ្ងៃទី៣១ ខែមករា ឆ្នាំ២០២១ថា មេធាវីជាច្រើនរូបរបស់អតីតប្រធានាធិបតីអាមេរិក លោកដូណាល់ ត្រាំ បានបោះបង់ចោលការការពារលោក ខណៈសល់ពេលប៉ុន្មានថ្ងៃទៀត ដល់ពេលបើកសវនាការដកហូតតំណែងលោកក្នុងព្រឹទ្ធសភា។
ដោយដកស្រង់ប្រភពមិនបង្ហាញឈ្មោះនានា ទូរទស្សន៍ CNN អះអាងថា មេធាវី៥រូបក្នុងនោះ២រូបសន្មត់ថា ជាអ្នកដឹកនាំក្រុមមេធាវី ការពារក្ដីលោកត្រាំ បានបោះបង់ចោលការការពារនោះ ក្រោយពីមានការខ្វែងគំនិតគ្នាលើវិធីនៃកិច្ចការពារបែបណាមក។ លោកត្រាំចង់ឲ្យបណ្ដាមេធាវីលោកបន្តតវ៉ាលើប្រធានបទនៃការក្លែងបន្លំសន្លឹកឆ្នោត ក្នុងការបោះឆ្នោតប្រធានាធិបតី ដែលបេក្ខជនគណបក្សប្រជាធិបតេយ្យ លោកចូបៃដិនជាអ្នកឈ្នះ ជាជាងផ្ដោតលើភាពមិនស្របច្បាប់កាត់ក្ដី ប្រធានាធិបតីដែលលែងកាន់តំណែងទៅហើយ។
ក្នុងចំណោមមេធាវីដែលរត់ចោលលោកត្រាំមាន លោកBUTCH BOWERS និងលោកDEBORAH BARBIER ដែលត្រូវដឹកនាំក្រុមមេធាវីការពារលោក។
សវនាការកាត់ក្ដីលោកត្រាំពីបទអុជអាលឲ្យមានការបះបោរ ក្រោយការលុកលុយអុកឡុកវិមានសភាកាពីតូល កាលពីថ្ងៃទី៦មករា ដោយពួកអ្នកគាំទ្រលោកត្រាំ ត្រូវចាប់ផ្ដើមនាថ្ងៃទី៩កុម្ភៈ។ ប៉ុន្តែមានព្រឹទ្ធសមាជិកគណបក្សសាធារណរដ្ឋតែ៥រូបប៉ុណ្ណោះ បានត្រៀមចូលរួមដៃជាមួយព្រឹទ្ធសមាជិកគណបក្សប្រជាធិបតេយ្យ៥០រូប ដែលបែបនោះនាំឲ្យការបោះឆ្នោតក្នុងព្រឹទ្ធសភា នឹងពុំមានសំឡេងភាគច្រើនគ្រប់គ្រាន់២ភាគ៣ ក្នុងការសម្រេចដកតំណែងលោកត្រាំឡើយ។
ទាល់តែព្រឹទ្ធសមាជិកគណបក្សសាធារណរដ្ឋ១០រូបចូលរួមបោះឆ្នោតគាំទ្រ ទើបមានសំឡេងគ្រប់គ្រាន់បាន២ភាគ៣ក្នុងការដកតំណែងលោកត្រាំ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ