រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបញ្ជា និងស្នើសុំយ៉ាងទទូចថា ការធ្វើចត្តាឡីស័កដាច់ខាតត្រូវតែធ្វើឲ្យបានពេញ១៤ ថ្ងៃ មិនអាចបន្ថយមកត្រឹម…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបញ្ជា និងស្នើសុំយ៉ាងទទូចថា ការធ្វើចត្តាឡីស័កដាច់ខាតត្រូវតែធ្វើឲ្យបានពេញ១៤ ថ្ងៃ មិនអាចបន្ថយមកត្រឹម ១០ ថ្ងៃ ឬមួយសប្តាហ៍បានឡើយ ព្រោះមានករណីច្រើនណាស់ដែលអ្នករកឃើញវិជ្ជមានកូវីដ ១៩ គឺនៅថ្ងៃទី ១៣ នៃការធ្វើចត្តាឡីស័ក ។
ថ្លែងនៅព្រឹកថ្ងៃច័ន្ទ ទី១ ខែកុម្ភៈ ឆ្នាំ២០២០ នាឱកាសអញ្ជើញបើកការដ្ឋានសាងសង់រោងចក្រប្រព្រឹត្តកម្មទឹកស្អាតបាក់ខែង និងសម្ពោធរោងចក្រប្រព្រឹត្តកម្មទឹកស្អាតចំការមន ដែលប្រព្រឹត្តទៅនៅខណ្ឌជ្រោយចង្វា រាជធានីភ្នំពេញ សម្តេចតេជោ ហ៊ុន សែន បានបញ្ជាក់យ៉ាងច្បាស់ៗថា សម្តេចសុទ្ធចិត្តចំណាយលុយចិញ្ចឹមបងប្អូនកំពុងធ្វើចត្តាឡីស័កទាំងអស់ ឲ្យធ្វើចត្តាឡីស័កឲ្យបានត្រឹមត្រូវ ដើម្បីការពារកុំឲ្យកូវីដ១៩ ឆ្លងចូលសហគមន៍នៅកម្ពុជាសារជាថ្មីម្តងទៀត ។
សម្តេចបានមានប្រសាសន៍ថា ស្នើសុំបងប្អូនពលករខ្មែរត្រឡប់មកពីថៃ និងពលរដ្ឋខ្មែរផ្សេងទៀតដែលត្រូវធ្វើដំណើរមកកម្ពុជា ត្រូវតែធ្វើចត្តាឡីស័ក ១៤ ថ្ងៃដាច់ខាត ដូច្នេះសុំការយោគយល់របស់បងប្អូនជនរួមជាតិទាំងអស់ ។ សម្តេចបានបន្តថា បច្ចុប្បន្នមានបងប្អូនកំពុងធ្វើចត្តាឡីស័កជាង ៧ ពាន់នាក់នៅខេត្តទាំង ៧ ដែលក្នុងនោះខេត្ត បន្ទាយមានជ័យជាង៣ពាន់ ឧត្តរមានជ័យជាង២ពាន់ និងបាត់ដំបងជាង១ពាន់នាក់ ដែលសុទ្ធជាពលករមកពីថៃ ។
សម្តេចបានបញ្ជាក់ថា «ចត្តាឡីស័ក ១៤ ថ្ងៃមិនអាចដោះដូរបានទេ ខ្ញុំសូមអង្វរកបងប្អូនយើង ចត្តាឡីស័កមិនអាចស្ថិតក្រោម ១៤ ថ្ងៃបានទេ » ។ សម្តេចតេជោ នាយករដ្ឋមន្ត្រីបានបន្ថែមថា ការគ្រប់គ្រងកូវីដ-១៩ ដែលកម្ពុជាទទួលបានបទពិសោធន៍ជោគជ័យក្នុងការគ្រប់គ្រង គឺដោយសារតែការធ្វើចត្តាឡីស័កត្រឹមត្រូវ ១៤ ។
សម្តេចបានលើកឧទាហរណ៍ជាក់ស្តែងថា ករណីជាក់ស្តែងថ្ងៃនេះ ដែលមានឆ្លងមួយករណីនៅខេត្តប៉ៃលិន ស្ត្រីរូបនេះមកដល់ប៉ៃលិនតាំងពីថ្ងៃទី ១៥ មករា ប៉ុន្តែដោយគាត់ធ្វើដំណើររួមគ្នានឹងអ្នកកើតកូវីដ-១៩ ហើយតេស្តលើកទី ៣ ចំថ្ងៃទី ១៣ នៃការចត្តាឡីស័ក សឹងតែត្រូវបានចេញពីការធ្វើចត្តាឡីស័ក ក៏ត្រូវបានធ្វើតេស្តលើកទី ៣ ស្រាប់តែរកឃើញវិជ្ជមានកូវីដ ១៩ តែម្តង ។
សម្តេចបន្តថា អ៊ីចឹងករណីបែបនេះមានច្រើនហើយ កុំបន្ថយឲ្យសោះនូវការធ្វើចត្តាឡីស័ក
សូមអង្វរ.កពលករមកពីប្រទេសថៃ និងបងប្អូនមកពីក្រៅប្រទេស មកស្រុក ត្រូវធ្វើត្តាឡីស័ក ១៤ ថ្ងៃ ដើម្បីធ្វើឲ្យបានត្រឹមត្រូវ ហើយកូវីដ ១៩ មិនត្រូវបណ្តោយឲ្យនាំចូលសហគន៍សារជាថ្មីទេ ។ ព្រោះការឆ្លងចូលសហគមន៍ជាថ្មីកំពុងវាយលុកនៅប្រទេសជិតខាងកម្ពុជា ដូចជានៅថៃឆ្លងកាលពីថ្ងៃសៅរ៍ជាង ៩០០ នាក់ និងថ្ងៃអាទិត្យជាង ៨០០ នាក់ ខណៈនៅវៀតណាម រកឃើញការឆ្លងក្នុងសហគមន៍ ជាង ៥០នាក់ផងដែរ ។
សម្តេចបញ្ជាក់ថា កូវីដ ១៩ ទោះបីជាគ្រប់គ្រងបានតែចំនួននៃការឆ្លងរកឃើញនៅកម្ពុជាទាំងការនាំចូល ទាំងព្រឹត្តិការណ៍ ៣ វិច្ឆិកា និងព្រឹត្តិការណ៍សហគមន៍ ២៨ វិច្ឆិកា គឺគិតត្រឹមថ្ងៃទី១ កុម្ភៈ គឺមានចំនួនសរុប ៤៦៦នាក់ មាន៤៤៣នាក់ បានជាសះស្បើយពីជំងឺនេះ និង២៣នាក់ទៀត កំពុងសម្រាកព្យាបាលនៅមន្ទីរពេទ្យរាជធានីភ្នំពេញ និងនៅតាមមន្ទីរពេទ្យបង្អែកខេត្ត៕
ចែករំលែកព័តមាននេះ