រាជធានីភ្នំពេញ ៖ ក្នុងឆ្នាំ២០២០ បទល្មើសគ្រឿងញៀនបានកើនឡើង ខណៈសមត្ថកិច្ចបានធ្វើការបង្ក្រាបបទល្មើសគ្រឿងញៀន និងឃាត់ខ្លួនជនសង្ស័យមានការកើនឡើង ហើយចាប់យកសារធាតុញៀនជិត៤ពាន់គីឡូក្រាម ។ នេះបើតាមលោក មាស វិរិទ្ធ អគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ។
ប្រាប់ក្រុមអ្នកសារព័ត៌មាន ក្រោយបញ្ចប់កិច្ចប្រជុំក្រុមការងារអន្ដរក្រសួងរបស់អាជ្ញាធរជាតិប្រយុទ្ធប្រឆាំងគ្រឿងញៀន នាថ្ងៃទី២៩ ខែមករា ឆ្នាំ២០២១ នៅទីស្ដីការក្រសួង មហាផ្ទៃ លោក មាស វិរិទ្ធ បានបញ្ជាក់យ៉ាងដូច្នេះថា ៖«បើធ្រៀបទៅនឹងឆ្នាំមុន (ឆ្នាំ២០១៩) តាមរយៈសេចក្ដីព្រាងរបាយការណ៍ គឺករណីបង្ក្រាបបទល្មើសមានការកើនឡើង (បទល្មើសគ្រឿងញៀន) ៧ភាគរយកើនឡើង អីញ្ចឹងករណីនៃការបង្ក្រាបក៏មានការកើនឡើង ចំនួនអ្នកប្រព្រឹត្តិបទល្មើសក៏ត្រូវបានឃាត់ខ្លួន មានការកើនឡើងដែរ។ ប៉ុន្ដែបរិមាណសារធាតុញៀនដែលត្រូវចាប់យកដោយសមត្ថកិច្ច គឺមានការកើនឡើងខ្ពស់ គឺពីឆ្នាំទៅ (ឆ្នាំ២០១៩) យើងចាប់យកបាន៧៥០គីឡូជាង ។ដោយឡែកឆ្នាំ២០២០នេះ សមត្ថកិច្ចអនុវត្តច្បាប់គ្រប់ លំដាប់ថ្នាក់ចាប់យកសារធាតុញៀនដល់ទៅ៣៨៧៦គីឡូ» ។
ចំពោះការកើនឡើងនូវបទល្មើសគ្រឿងញៀននេះ លោកអគ្គនាយកអាជ្ញាធរជាតិក៏រៀបរាប់ថា មូលហេតុនៃបទល្មើសគ្រឿងញៀនកម្ពុជាមានការកើនឡើង ដោយសារ ក្រុមឧក្រិដ្ឋជនបានផ្លាស់ប្ដូរការផលិតពីការផលិតគ្រឿងញៀនធម្មជាតិ ដែលប្រើប្រាស់រយៈពេលយូរ មកជាការផលិតគ្រឿងញៀនសំយោគ ។ លោកបន្ដថា ការផលិតគ្រឿងសំយោគធ្វើឡើងដោយសារមានសារធាតុគីមីផ្សំ ដូច្នេះសារធាតុគីមីផ្សំ ងាយហូរចូលទៅតំបន់ផលិត ជាពិសេសប្រទេសផលិតសារធាតុគីមី ដូចជា ៖ ចិន ឥណ្ឌា ដែលប្រទេសទាំងពីរនេះ មិននៅឆ្ងាយប៉ុន្មានពីតំបន់ត្រីកោណមាស ដូច្នេះតំបន់ត្រីកោណមាសនៅចន្លោះប្រទេសផលិតសារធាតុគីមីផ្សំ ។
ជាមួយគ្នានោះដែរ លោកក៏បានបញ្ជាក់ថា គ្រឿងញៀនដែលពួកក្រុមឧក្រិដ្ឋជនផលិ តហើយ មានអាយុការរបស់វា បើផលិតទុកចោលឆាប់ខូចដូចថ្នាំពេទ្យដែរ ដូច្នេះ ក្រុមឧក្រិដ្ឋជនរិះរកមធ្យោបាយ និងកសាងបណ្ដាញ ដើម្បីដឹកជញ្ជូនគ្រឿងញៀនពីតំបន់ផលិតទៅរកទីផ្សារនៃការប្រើប្រាស់ ។ លោកបន្ថែមថា បញ្ហាគ្រឿងញៀន គឺរឿងសកលមានភាពស្មុគស្មាញ ហើយប្រទេសណាមួយក៏មិនអាចដោះស្រាយបញ្ហាគ្រឿងញៀនតែឯងបានជោគជ័យឡើយ ។
ដោយឡែក សម្រាប់ប្រទេសកម្ពុជា គឺជាប្រទេសត្រូវបានក្រុមឧក្រិដ្ឋជនប្រើប្រាស់ជាកន្លែងឆ្លងកាត់ ។ លោកបានឲ្យដឹងទៀតថា កាលពេលមុនគ្រឿងញៀនឆ្លងកាត់ពីប្រទេសឡាវមកកម្ពុជា ឥឡូវនេះគ្រឿងញៀនឆ្លងពីថៃ មកម្ពុជា ដូច្នេះសព្វថ្ងៃនេះបញ្ហាគ្រឿងញៀននៅថៃមានភាពស្មុគស្មាញជាងនៅកម្ពុជាទៅទៀត ។ ក្នុងឱកាសនោះដែរលោកក៏បានលើកឡើងថា ក្នុងបរិបទមានការគំរាមគំហែងដោយសារជំងឺកូវីដ-១៩ ហើយបញ្ហាគ្រឿងញៀនត្រូវបានប្រែប្រួលអំពីចរាចរណ៍គ្រឿងញៀនច្រើនមានការដឹកជញ្ជូនគ្រឿងញៀនតាមផ្លូវគោក ផ្លូវអាកាស និងផ្លូវទឹក ។
ជុំវិញបញ្ហាខាងលើនេះ អាជ្ញាធរជាតិប្រយុទ្ធប្រឆាំងគ្រឿងញៀនកម្ពុជាបានធ្វើការបង្ក្រាបគ្រឿងញៀនច្រើននៅតាមបញ្ញើប្រៃណីយ៍ ។ ដើម្បីឲ្យការងារបង្ក្រាបគ្រឿងញៀននៅកម្ពុជាកាន់តែមានប្រសិទ្ធភាពបន្ថែមទៀត អាជ្ញាធរជាតិប្រយុទ្ធ ប្រឆាំងគ្រឿងញៀន ក៏បានលើកឡើងថា អាជ្ញាធរនឹងធ្វើការពង្រឹងប្រសិទ្ធភាពការងារបន្ថែមទៀត ជាពិសេសលើកកម្ពស់ការងារផ្សព្វផ្សាយទៅដល់ប្រជាពលរដ្ឋ និងយុវជន ដើម្បីលុបបំបាច់ទីផ្សារគ្រឿងញៀននៅកម្ពុជា ។
ជាងនេះសូមឲ្យប្រជាពលរដ្ឋ និងភាគីពាក់ព័ន្ធចូលរួមសហការណ៍ក្នុងការផ្តល់ព័ត៌មានពិតអំពីករណីជួយ ដូរគ្រឿងញៀន ដើម្បីចាប់ជនល្មើសមកផ្តន្ទាទោសតាមច្បាប់ជាធរមាន ៕
ចែករំលែកព័តមាននេះ