ខេត្តកំពង់ចាម ៖ នៅមុននេះបន្តិច ប្រតិបត្តិការរុករក និងស្រង់យកគ្រាប់យុទ្ធភណ្ឌពីនាវាចម្បាំង ដែលបានលិចក្នុងទន្លេមេគង្គ នៅភូមិសាស្ត្រខេត្តកំពង់ចាម កាលសម័យសង្ក្រាមឆ្នាំ១៩៧០ ដល់១៩៧៥ បានប្រទះឃើញ…
ខេត្តកំពង់ចាម ៖ នៅមុននេះបន្តិច ប្រតិបត្តិការរុករក និងស្រង់យកគ្រាប់យុទ្ធភណ្ឌពីនាវាចម្បាំង ដែលបានលិចក្នុងទន្លេមេគង្គ នៅភូមិសាស្ត្រខេត្តកំពង់ចាម កាលសម័យសង្ក្រាមឆ្នាំ១៩៧០ ដល់១៩៧៥ បានប្រទះឃើញ ឆ្អឹងមនុស្ស អាវុធមួយចំនួន និងគ្រាប់យុទ្ធភណ្ឌរាប់តោន ។
នៅថ្ងៃទី២៨ មករា ២០២១ នេះកងកន្លាំងបោសសម្អាតយុទ្ធភ័ណ្ឌមិនទាន់ផ្ទុះក្រោមទឹក សហការជាមួយបញ្ជាការដ្ឋានកងទ័ពពិសេស នៃក្រសួងការពារជាតិ បានរកឃើញគ្រាប់យុទ្ធភ័ណ្ឌមិនទាន់ផ្ទុះនៅក្រោមទឹក (ទឹកទន្លេមេគង្គ) ជម្រៅ២៨ម៉ែត្រ បន្ថែមទៀត ដែលរួមមានជាប្រភេទគ្រាប់ផ្លោង ៨១មម ៦០មម គ្រាប់បាញ់១២.៧ គ្រាប់១០៥មម និងប្រភេទគ្រាប់ជាច្រើនទៀត ដែលគ្រាប់ទាំងនេះផលិតនៅប្រទេសអាមេរិច ។
មិនតែប៉ុណ្ណោះ កម្លាំងពិសេស បានរកឃើញឆ្អឹងមនុស្ស (សង្ស័យធាតុរបស់កងទ័ពម៉ារីន) ដែលខ្មោចនាវាចម្បាំង ចំនួន២គ្រឿង បានឆេះលិចនៅក្នុងសម័យសង្គ្រាមឆ្នាំ១៩៧០ ស្ថិតនៅភូមិវាល ឃុំមានជ័យ ស្រុកស្រីសន្ធរ និងស្រុកកងមាស ខេត្តកំពង់ចាម ។
លោកឧត្តមសេនីយ៍ទោ ម៉ី សុភា មេបញ្ជាការបោសសម្អាតគ្រាប់មិនទាន់ផ្ទុះ នៃមជ្ឈមណ្ឌលជាតិគ្រប់គ្រងកងរក្សាសន្តិសុខបោសសម្អាតមីន និងកាកសំណល់សង្គ្រាម បានឲ្យដឹងថា លទ្ធផលនៃយុទ្ធនាការរបស់កងកម្លាំងជំនាញបានប្រមូលស្រង់គ្រាប់កាំភ្លើងចេញពីក្នុងនាវាចម្បាំង ដែលបានលិចនៅបាតទន្លេមេគង្គ ស្រុកស្រីសន្ធរ និងស្រុកកងមាស អំឡុងឆ្នាំ១៩៧០-១៩៧៥ គឺសរុបប្រហែលជាង ៦.០០០ គីឡូក្រាម ។
ឧត្តមសេនីយ៍ទោ ម៉ី សុភា បានបន្តថា ក្នុងនោះ ក្រុមរុករក បានប្រទះឃើញឆ្អឹងមនុស្ស និងស្លាកឈ្មោះទាហានម៉ារីនខ្មែរម្នាក់ ដែលសរសេរជាភាសាបារាំង CHHIM-CHHEANG-LY Marine Nationale Khme’re, ដែកចំនួនមួយ និងកាំបិតទាហានមួយ ។
លោកឧត្តមសេនីយ៍ ម៉ី សុភា បានបន្ថែមថា ប្រតិបត្តិការ បាននិងកំពុងរុករកប្រមូលគ្រាប់យុទ្ធភណ្ឌនេះ ក្រុមរុករកបានធ្វើក្រោមផ្ទៃទឹកទន្លេជុំវិញនាវា ដែលលិចចំនួនពីរគ្រឿង ដែលបានកប់ក្រោមខ្សាច់ជម្រៅ ប្រមាណ ០៥ម៉ែត្រ ក្នុងជម្រៅទឹកទន្លេ ចាប់ពី ២០ ទៅ ៣០ម៉ែត្រ ក្នុងរង្វង់ផ្ទៃ បានទន្លេប្រហែល ១៥០ហិកតា ។
សូមចញ្ជាក់ថា យុទ្ធនាការរុករកនេះ បានចាប់ផ្តើមតាំងពីចុងឆ្នាំ២០២០ ដោយក្រុមរុរកមិនទាន់អាចកំណត់បានពេលច្បាស់លាស់ ក្នុងការស្រង់យកនាវាចម្បាំង ឡើងមកលើគោក នៅពេលណា នៅឡើយទេ ៕
ចែករំលែកព័តមាននេះ