ស្រ្តីម្នាក់មានវ័យកាន់តែចាស់ ភ្នែកមើលមិនសូវច្បាស់ ថែមទាំងមានរូបរាងធាត់ជាងមុនទៀតនោះ នៅពេលដែលនាងបានឃើញរូបថតចាស់ៗនៅក្នុងទូរស័ព្ទដៃរបស់ប្តី កំពុងដេកជាមួយស្រីក្មេងម្នាក់ ដោយមិនចាំថា ជារូបភាពរបស់នាងត្រូវបានប្តីថតកាលពីប៉ុន្មានឆ្នាំមុន ស្រាប់តែទាញកាំបិតចាក់ប្តីដោយកំហឹង ត្រូវជាច្រើនកាំបិតរងរបួសធ្ងន់ធ្ងរ ត្រូវបញ្ជូនទៅព្យាបាលនៅមន្ទីរពេទ្យ នេះបើយោងតាមសារព័ត៌មាន Daily Mail ។
ស្ត្រីដៃដល់ជាប្រពន្ធ មានឈ្មោះ Leonora R ត្រូវបានប៉ូលិសចាប់ខ្លួន កាលពីសប្តាហ៍មុន នៅផ្ទះរបស់ពួកគេ ក្នុងក្រុង Cajeme រដ្ឋ Sonora ប្រទេសម៉ិកស៊ិក ក្រោយពីមន្ត្រីប៉ូលិសទទួលបានរបាយការណ៍ស្តីពីករណីជម្លោះក្នុងគ្រួសារ ។
នៅពេលមន្ត្រីប៉ូលីសចុះមកដល់ផ្ទះកើតហេតុ បានរកឃើញថា ជនរងគ្រោះជាប្តី មានឈ្មោះថា Juan N បានរងរបួសជាច្រើនកន្លែង លើជើង និងដៃ ផងដែរ ។
បើតាមរបាយការណ៍របស់ប៉ូលិស អោយដឹងថា ការចាក់ប្រហារដោយកំហឹងនេះ បានកើតឡើងបន្ទាប់ពីអ្នកស្រី Leonora បានរកឃើញរូបថតនៅក្នុងទូរស័ព្ទដៃរបស់ប្តី ដែលបង្ហាញថា ប្តីបានដេកជាមួយស្រីក្មេង ដែលនាងជឿជាក់ថា ជានារីម្នាក់ទៀត ។ ដោយមិនទុកពេលឲ្យប្តីពន្យល់ខ្លួន អ្នកស្រី Leonora បានចាប់ផ្តើមជេរប្រមាថប្តី ម្តងហើយម្តងទៀត ខណៈកំពុងជេរ ស្រាប់តែនាងទាញកាំបិតចាក់ប្តីទាំងកំហឹង ។ អំឡុងពេលនោះ លោក Juan N ចាប់កាំបិតចេញពីដៃប្រពន្ធបាន ហើយបានសួរនាងថា តើអូនកំពុងនិយាយពីរូបអ្វី ?
បន្ទាប់មក លោកបានពន្យល់ប្រាប់ប្រពន្ធថា រូបថតទាំងអស់នោះ ពិតជារបស់បង ហើយនិងអូន ដែលបងថតតាំងពីប៉ុន្មានឆ្នាំមុន នៅពេលពួកយើងទើបតែណាត់ជួបគ្នាគ្រាដំបូងៗ ។
របាយការណ៍របស់ប៉ូលិស បន្តទៀតថា ភ្លាមៗនោះអ្នកស្រី Leonora មិនបានទទួលស្គាល់រូប ខ្លួនឯងភ្លាមៗទេ ពីព្រោះនារី ដែលមានក្នុងរូបភាពទាំងនោះ មើលទៅមានវ័យក្មេង និងមានរាងស្គមទៀត ។ បន្ទាប់មកលោក Juan N បានពន្យល់ប្រាប់ប្រពន្ធបន្ថែមថា ដោយសារថ្មីៗនេះ រូបលោកបានរកឃើញរូបភាពនៅក្នុងអ៊ីម៉ែលចាស់ៗ ហើយបានយករូបទាំងអស់នោះ មករក្សាទុកវា នៅក្នុងទូរស័ព្ទរបស់លោក ។
ប្រព័ន្ធផ្សព្វផ្សាយក្នុងស្រុក បាននិយាយថា អ្នកស្រី Leonora ត្រូវប៉ូលិស នាំខ្លួនទៅកាន់មន្ទីរឃុំឃាំងភ្លាមៗ ហើយស្ថិតនៅក្រោមការរង់ចាំការចោទប្រកាន់ពីសំណាក់តុលាការ តែប៉ុណ្ណោះ ៕
ចែករំលែកព័តមាននេះ