AFP កាលពីពេល ថ្មីៗនេះផ្សាយថា រដ្ឋមហារាស្ត្រា (Maharashtra ) បានចេញសេចក្តីណែនាំដល់ឪពុកម្តាយ ឬអាណាព្យាបាលឱ្យដាក់បម្រាមកូនចៅរបស់ខ្លួនកុំឱ្យស្ពាយកាតាបធ្ងន់លើសពី១០% នៃទម្ងន់ខ្លួន ដើម្បីការពារសុខភាពរាងកាយរបស់កុមារក្នុងពេលអនាគត ។
អភិបាលរដ្ឋបានចេញបំរាមថ្មីកាលពីពេល ថ្មីៗកន្លងមក ដោយកំណត់ដល់កុមារអាយុចាប់ពី៥ឆ្នាំ ដែលចូលរៀនថ្នាក់ទី១ ត្រូវយកកាតាបដាក់ថ្លឹងពេលទៅដល់សាលារៀន ដើម្បីត្រួតពិនិត្យកាតាបមិនឱ្យលើសពី២,៥គីឡូក្រាម ។ បើសិស្សថ្នាក់ទី៨ ដែលមានអាយុ១២ឆ្នាំ ត្រូវយួរកាតាបទម្ងន់មិនលើសពី៤,២គីឡូក្រាម ដើម្បីកុំឱ្យឆ្អឹងខ្នង និងឆ្អឹងសន្លាក់រងរបួស ។
លោកណាន គូម៉ា មន្ត្រីមន្ទីរអប់រំក្នុងរដ្ឋ Maharashtra បញ្ជាក់នៅក្នុងសេចក្តីប្រកាសថា «លក្ខខណ្ឌទូទៅ គឺកាបូបសិស្សត្រូវមានទម្ងន់មិនលើសពី១០%នៃទម្ងន់ខ្លួនរបស់កុមារ។ កន្លងមកយើងប្រទះឃើញកុមារយួរ ឬស្ពាយកាតាបទម្ងន់ពី២០%ទៅ៣០% នៃទម្ងន់ខ្លួន ព្រោះមានផ្ទុកសៀវភៅ ផ្សេងៗ និងឧបករណ៍សិក្សាដែលមិនចាំបាច់ជាច្រើន ឬគ្រឿងសំអាងនានា ។ ការស្ពាយធ្ងន់បែបនោះអាចបង្កគ្រោះថ្នាក់ដល់ឆ្អឹងខ្នង និងឆ្អឹងសន្លាក់ រួមទាំងបង្កភាពតប់ប្រមល់ និងនឿយណាយដល់ខ្លួន ។ ដើម្បីមានឱកាសសិក្សាបន្តនៅថ្នាក់ខ្ពស់ សិស្សឥណ្ឌាភាគច្រើនប្រកួតប្រជែងក្នុងថ្នាក់ ដោយយកសៀវភៅ និងឧបករណ៍សិក្សាច្រើនតាមខ្លួន ។
អាជ្ញាធរបានអំពាវនាវដល់គ្រូត្រូវធ្វើកាលវិភាគឱ្យសិស្សធ្វើលំហាត់នៅផ្ទះ ដើម្បីឱ្យសិស្សមិនចាំបាច់យកសៀវភៅច្រើនក្បាលតាមខ្លួន និងស្នើដល់អាណាព្យាបាលរបស់សិស្សត្រូវពិនិត្យកុំឱ្យកូនយកឧបករណ៍លើសកំណត់ ៕
ចែករំលែកព័តមាននេះ