ខេត្តកំពង់ឆ្នាំង ៖ ពិតជាគួរឲ្យសង្វេគចិត្តអាណិតភរិយាសពមន្ត្រីពន្ធនាគារខេត្តកំពង់ឆ្នាំងម្នាក់សម្រក់ទឹកភ្នែកទម្លាយរឿងជាសាធារណៈ រៀបរាប់រឿងប្ដីស្លាប់ជាង៣ខែមកហើយ នៅតែមិនអាចបើកប្រាក់ឧបត្ថម្ភគោលនយោបាយរបស់សមាគមបានទេ ។ បន្ទាប់ពីមានការអន្តរាគមន៍របស់អគ្គស្នងការនគរបាលជាតិ នៅព្រឹកថ្ងៃទី២៥ ខែមករា ឆ្នាំ២០២១ នេះមន្ត្រីហិរញ្ញវត្ថុសាលាខេត្តកំពង់ឆ្នាំង បានបើកប្រាក់ឧបត្ថម្ភរបស់សមាគម ជូនភរិយានៃសពហើយ ។
លោកស្រី វង្ស វណ្ណារី អាយុ៦០ឆ្នាំ ជាភរិយារបស់លោកវីរសេនីយ៍ទោ ពេជ្រ សុខ អាយុ៦២ឆ្នាំ ជាមន្ត្រីពន្ធនាគារខេត្តកំពង់ឆ្នាំង បានទទួលមរណភាព ជាង៣ខែមកហើយ ដោយរោគារពាធ ដែលមានទីលំនៅ ក្នុងភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង ។
បើតាមលោកស្រី វង្ស សុវណ្ណារី បានប្រាប់ថា ក្រោយមានការជួយសម្របសម្រួលពីនាយឧត្តមសេនីយ៍សន្ដិបណ្ឌិត នេតសាវឿន អគ្គស្នងការ នគរបាលជាតិ នៅវេលាម៉ោង១០ និង៣០នាទីព្រឹកថ្ងៃទី២៥ មករា ២០២១ លោកស្រីត្រូវបានមន្ត្រីហិរញ្ញវត្ថុ សាលាខេត្តកំពង់ឆ្នាំង ហៅឲ្យទៅបើកប្រាក់សមាគមមន្ត្រីពន្ធនាគារ ដែលមានទឹកប្រាក់ចំនួន ៤,៥០០,០០០រៀល ។
ជាមួយគ្នានោះដែរ នៅល្ងាចថ្ងៃទី២៥ ខែមករា ឆ្នាំ២០២១ មានតំណាងរបស់ឧត្តមសេនីយ៍ឯក ឌី វិជ្ជា និងលោកស្រី ហ៊ុន ម៉ាណា បាននាំយកអំណោយទៅប្រគល់ជូនលោកស្រី វង្ស សុវណ្ណារី មានថវិកាចំនួន ៥លានរៀល រួមនិងសម្ភារមួយចំនួន ផងដែរ ។
កាលពីព្រឹកថ្ងៃទី២៤ មករា ម្សិលមិញនេះ លោកស្រី វង្ស វណ្ណារី បានរៀបរាប់ទាំងទឹកភ្នែកប្រាប់អ្នកសារព័ត៌មានថា ប្ដីលោកស្រីបានចូលនិវត្តន៍ពីរបីឆ្នាំមកហើយ ។ ហើយប្ដីលោកស្រីបានទទួលមរណភាពកាលពីថ្ងៃទី០៦ ខែ១០ ឆ្នាំ២០២០ ដោយសារជំងឺឡើងឈាម គិតមកដល់ពេលនេះមានរយៈពេលជាងបីខែ ។ ពេលប្ដីស្លាប់ លោកស្រីបានចំណាយប្រាក់ធ្វើបុណ្យឲ្យប្ដី សរុបអស់៨លានរៀល ក្នុងនោះ៣លានរៀល ជាប្រាក់ខ្ចីគេ ។
លោកស្រី បានអោយដឹងបន្តថា កាលពីជាង១០ថ្ងៃមុន លោកស្រីបានទូរស័ព្ទទៅសួរស្ត្រីម្នាក់ជាអ្នកបើកលុយធ្វើការនៅសាលាខេត្ត ពីថវិកាឧបត្ថម្ភពីសមាគម ដែលតាមលក្ខន្តិកៈគឺភរិយារបស់គាត់ត្រូវទទួលបាន ។ ពេលនោះស្ត្រីខាងលើបានឆ្លើយតបមកវិញថា អត់មានលុយទេ ទាល់តែមានអ្នកស្លាប់បួនដប់នាក់ ទើបគេបើកលុយសមាគមនេះ ឲ្យម្ដង ។
ចំណាត់ការនេះ បានធ្វើអោយស្ត្រីមេម៉ាយរូបនេះ ជួបការលំបាកយ៉ាងខ្លាំង គឺជីវភាពខ្វះខាត ព្រមទាំងនៅជំពាក់លុយគេ ដើម្បីយកលុយមកធ្វើបុណ្យសពប្ដី ហេតុនេះហើយទើបរូបគាត់មិនអាចទ្រាំបានតទៅទៀត ក៏ទម្លាយព័ត៌មានទាំងទឹកភ្នែក អោយអ្នកសារព័ត៌មានជួយផ្សព្វផ្សាយ ដើម្បីសុំការអន្តរាគមន៏ពីថ្នាក់ដឹកនាំ ។ បន្ទាប់ពីមានការអន្តរាគមន៏រួចមក ទើបមន្ត្រីសាលាខេត្តទាក់ទងអញ្ជើញទៅបើកប្រាក់ភ្លាមៗតែម្ដង ៕
ចែករំលែកព័តមាននេះ