ខេត្តព្រះវិហារ ៖ គម្រោងសហប្រតិការសិក្សាស្រាវជ្រាវលើឡបុរាណ ទទួលបានការគាំទ្រលើកទី ២ ក្រោមជំនួយថវិការពី Waseda University និង Japan…
ខេត្តព្រះវិហារ ៖ គម្រោងសហប្រតិការសិក្សាស្រាវជ្រាវលើឡបុរាណ ទទួលបានការគាំទ្រលើកទី ២ ក្រោមជំនួយថវិការពី Waseda University និង Japan Government Fund ដែលនឹងចាប់ផ្តើម ក្នុងរយៈពេលពីរសប្តាហ៍ គិតចាប់ពីថ្ងៃទី ២៥ ខែមករា ដល់ថ្ងៃទី៧ ខែកុម្ភៈ ឆ្នាំ២០២១។
ក្នុងគម្រោងនេះផងដែរ អាជ្ញាធរជាតិព្រះវិហារ បានសហការជាមួយសាកលវិទ្យាល័យ Waseda នៃប្រទេសជប៉ុន ធ្វើការសិក្សាស្រាវជ្រាវបន្ថែម លើស្ថានីយ៍ឡបុរាណគោគដីឆ្នាំង ក្នុងរមណីយដ្ឋានប្រាសាទកោះកេរ។ ក្នុងគម្រោងសហប្រតិបត្តិការស្រាវជ្រាវលើកទី២នេះ ក្រុមការងារមានបំណងធ្វើកំណាយដើម្បីស្វែងរកឲ្យឃើញនូវស្នាកស្នាមនៃរចនាសម្ព័ន្ធសំណង់ឡបុរាណចងក្រងទុកជាឯកសារ។
សូមជម្រាបជូនថា កន្លងមកកាលពីខែកុម្ភះ ឆ្នាំ២០១៩ ក្រុមមន្ត្រីជំនាញនៃអាជ្ញាធរជាតិព្រះវិហារ បានធ្វើកំណាយលើកទី១ ម្តងរួចមកហើយ តែពុំទាន់រកឃើញនូវរចនាសម្ព័ន្ធ នៃសំណង់ឡដុតកុលាលភាជន៍បុរាណ ដោយរកឃើញតែសម្ភារៈខូចខាតនៃឡដែលគេបានបោះចោល មានដូចជាបំណែកជញ្ជាំងឡ បំណែកកំណល់ទ្រដុតក្បឿង និងក្បឿង រួមទាំងបំណែកភាជន៍ជាច្រើនសន្ធឹកសន្ធាប់ទៀត។
គួរបញ្ជាក់ផងដែរថា ក្នុងកិច្ចសហប្រតិបត្តិការលើការងារស្រាវជ្រាវនេះ មានមន្ត្រីបច្ចេកទេសបុរាណវិទ្យាពីររូប នៃនាយកដ្ឋានរមណីយដ្ឋាន និងបុរាណវិទ្យា គឺលោក ភិន សំណាង និងលោក ភិន ភក្តី ដឹកនាំការធ្វើកំណាយបុរាណវិទ្យា ដោយសហការណ៍ជាមួយអ្នកជំនាញផ្នែកស្រាវជ្រាវលើកុលាលភាជន៍ខ្មែរ និងចិន Dr. Yukitsugu Tabata អញ្ជើញមកពីសាកលវិទ្យាល័យ Waseda University៕
ចែករំលែកព័តមាននេះ