រាជធានីភ្នំពេញ ៖ ខឹងកូនតូចៗ៣នាក់រពឹសខ្លាំងពេក ម្តាយក៏ចាក់សោពីក្រៅទុកឱ្យនៅក្នុងផ្ទះ ។ ស្រាប់តែចៃដន្យអាក្រក់ ផ្ទុះកំប៉ុងហ្គាសបណ្តាលឱ្យឆាបឆេះសម្ភារក្នុង
ផ្ទះហើយសំណាងល្អ មានការអន្តរាគមន៍ជួយទាន់ពេលវេលា មិនបង្កឲ្យមានរងរបួសមនុស្សនោះទេ ។ សមត្ថកិច្ចកំពុងពិនិត្យបន្តថា ម្តេចក៏ផ្ទុះកំប៉ុងហ្គាសបែបនេះ ។
ហេតុការណ៍នេះ កើតឡើងកាលពីវេលាម៉ោង១០និង៤០នាទីយប់ថ្ងៃទី២៥ មករា ២០២១ ស្ថិតនៅជាប់ផ្លូវរថភ្លើងភូមិថ្មី សង្កាត់គោកឃ្លាង ខណ្ឌសែនសុខ ។ តាមប្រភពព័ត៌មានពីប្រជាពលរដ្ឋបានអោយដឹងថា កន្លងមក ដោយសារតែផ្ទះកើតហេតុខាងលើនេះ មានកូនតូចៗដល់ទៅ៣នាក់ ហើយរពឹសខ្លាំងពេកពេលដែលម្តាយចេញទៅណាតែងតែចាក់សោពីខាងក្រៅទុកកូនតូចៗនៅក្នុងផ្ទះ នៅមុនពេលកើតហេតុស្ត្រីជាម្តាយបានចាក់សោទ្វារខាងក្រៅ ដោយទុកកូនតូចៗចំនួនបីនាក់អោយនៅក្នុងផ្ទះ ។
បន្ទាប់មក អ្នកជិតខាងឃើញផ្សែងហុយឆេះចេញពីក្នុងផ្ទះ ក៏នាំគ្នាស្រែកឆោឡោផ្អើលទាំងសមត្ថកិច្ចនគរបាលប៉ុស្តិ៍កាកាបទី១ ដែលកំពុងតែជិះម៉ូតូមកពីមើលរឿងករណី
ហិង្សាម្តាយចុងកាប់កូនចុងឃើញហេតុការណ៍កើតឡើង ហើយបាននាំគ្នាជួយធាក់បណ្ដាច់សោទ្វារផ្ទះ ដើម្បីសង្គ្រោះក្មេងចេញពីផ្ទះភ្លាមៗ ប្រជាពលរដ្ឋខ្លះទៀតរត់ទៅយកធុងប៉េត្រូដងទឹកទៅជួយជះពន្លត់គ្នាយ៉ាងញាប់ដៃញាប់ជើងរហូតទាល់តែភ្លើងរលត់អស់ទាំងស្រុង។
សំណាងល្អ ដោយមិនមានរងរបួសដល់ក្មេងៗគ្រាន់តែខូចខាតសម្ភារបន្តិចបន្តួចដូចជាខោអាវជាដើមប៉ុណ្ណោះ ព្រោះឆេះតែនៅផ្ទះបាយខាងក្រោយ ចំណែកក្មេងដែលអង្គុយលេងនៅក្នុងផ្ទះខាងមុខ។ ក្រោយពេលកើតហេតុសមត្ថកិច្ចបានបញ្ជាក់ប្រាប់ថា មូលហេតុដែលនាំឲ្យឆាបឆេះផ្ទះខាងលើនេះ បណ្តាលមកពីផ្ទុះកំប៉ុងហ្គាសបណ្ដាលឲ្យឆាបឆេះរាលដាលតែម្ដងទៅ ។
ចែករំលែកព័តមាននេះ