ភ្នំពេញ៖ អ្នកជំនាញសុវត្ថិភាពចរាចរណ៍ បានជំរុញឲ្យរថយន្តដឹកកម្មករទាំងអស់ ផ្លាស់ប្តូរទៅជារថយន្តស្តង់ដារ ដើម្បីការពារ និងចូលរួមបង្ការទប់ស្កាត់គ្រោះថ្នាក់ចរាចរណ៍ ដែលកើតមានជាយថាហេតុលើកម្មករកាត់ដេរ។ ក្នុងសិក្ខាសាលាបណ្តុះបណ្តាល ស្តីពី…
ភ្នំពេញ៖ អ្នកជំនាញសុវត្ថិភាពចរាចរណ៍ បានជំរុញឲ្យរថយន្តដឹកកម្មករទាំងអស់ ផ្លាស់ប្តូរទៅជារថយន្តស្តង់ដារ ដើម្បីការពារ និងចូលរួមបង្ការទប់ស្កាត់គ្រោះថ្នាក់ចរាចរណ៍ ដែលកើតមានជាយថាហេតុលើកម្មករកាត់ដេរ។
ក្នុងសិក្ខាសាលាបណ្តុះបណ្តាល ស្តីពី សុវត្ថិភាពចរាចរណ៍ផ្លូវគោក សម្រាប់មន្ត្រីសហភាពសហព័ន្ធ និងសហជីពកម្មករនិយោជិត កាលពីព្រឹកថ្ងៃទី២៥ ខែមករា ឆ្នាំ២០២១ នៅសាលប្រជុំមជ្ឈមណ្ឌលសហប្រតិបត្តិការកម្ពុជា-ជប៉ុន ក្នុងរាជធានីភ្នំពេញ លោក គឹម បញ្ញា នាយកអង្គការមូលនិធិបង្ការរបួសអាស៊ី ប្រចាំកម្ពុជា បានជំរុញឲ្យមានការផ្លាស់ប្តូរ ការប្រើរថយន្តដឹកទំនិញ មកជារថយន្ត ដែលមានស្តង់ដារ សម្រាប់កម្មកររោងចក្រកាត់ដេរ។ មូលហេតុ ដោយ សារតែរថយន្តកូរ៉េដឹកទំនិញ ដែលបានប្រើប្រាស់សម្រាប់ដឹកកម្មកររោងចក្រកាត់ដេរ សព្វថ្ងៃ ផ្ទុកលើសចំណុះ ដែលមានហានិភ័យក្នុងគ្រោះថ្នាក់ចរាចរណ៍ខ្ពស់។
ដើម្បីជំរុញឲ្យផ្លាស់ប្តូររថយន្តដឹកកម្មករកាត់ដេរ ពីរថយន្តដឹកទំនិញ មកជារថយន្តទេសចរណ៍ តាមស្តង់ដារត្រឹមត្រូវនេះ គឺបន្ទាប់ពីការសិក្សាស្រាវជ្រាវកន្លងមក ហើយនៅខែកុម្ភៈខាងមុខនេះ អង្គការមូលនិធិបង្ការរបួសអាស៊ី នឹងជួបជាមួយភាគីរោងចក្រ កម្មករ និងអ្នកដឹកកម្មករដោយផ្ទាល់ ដើម្បីជំរុញបញ្ហានេះ ឲ្យមានដំណោះស្រាយ ឲ្យបានឆាប់រហ័ស។
អង្គការមូលនិធិបង្ការរបួសអាស៊ី ប្រចាំកម្ពុជា បានលើកឡើងថា ជារៀងរាល់ថ្ងៃ កម្មករ និយោជិត ប្រមាណជាង ៧០ ម៉ឺននាក់ កំពុងប្រឈមនឹងហានិភ័យ ក្នុងការធ្វើដំណើរ ប្រចាំថ្ងៃ ទៅមកធ្វើការងារ លើដងផ្លូវ ដែលមានចរាចរណ៍មមាញឹក និងប្រកបដោយគ្រោះថ្នាក់ ដើម្បីតែជីវភាពគ្រួសារ។ ស្ទើរតែ ២០ ភាគរយ នៃជនរងគ្រោះថ្នាក់ចរាចរណ៍ទាំងអស់ នៅកម្ពុជា គឺជាកម្មករនិយោជិត ( គ្រប់វិស័យទាំងអស់ និងទាំងក្នុងអំឡុងពេលបំពេញការងារ ទៅមក និងការធ្វើដំណើរឯកជន) ហើយភាគច្រើនជាស្ត្រី។
ដោយឡែក លោកស្រី មឹន មាណវី រដ្ឋលេខាធិការក្រសួងសាធារណការ នឹងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក បានអះអាងថា ប៉ុន្មានឆ្នាំចុងក្រោយនេះ រថយន្តដឹកកម្មករ ប្រហែលជាពាក់កណ្តាល ដែលបានផ្លាស់ប្តូររថយន្ត ដែលមានសុវត្ថិភាព។
បើតាមលោកស្រី មឹន មាណវី ក្នុងឆ្នាំ២០២០ កន្លងទៅនេះ គ្រោះថ្នាក់ចរាចរណ៍ ដែលបានកើតលើរថយន្តកូរ៉េ ប្រើសម្រាប់ដឹកញ្ជូនកម្មករ មានចំនួន ១៥លើក ដោយបានសម្លាប់កម្មករកាត់ដេរ ដែលកំពុងធ្វើដំណើរទៅធ្វើការងារ ចំនួន ៤នាក់ និងរងរបួស សរុប ៣៥៣នាក់។
របាយការណ៍របស់បេឡាជាតិសន្តិសុខសង្គម ប.ស.ស កាលពីឆ្នាំ២០១៩ បង្ហាញថា មានរថយន្តដឹកកម្មករនិយោជិត សរុបចំនួន ៤៥៣៧គ្រឿង បានចរាចរណ៍ និងប្រើប្រាស់នៅកម្ពុជា ក្នុងនោះ រថយន្តប្រភេទទេសចរណ៍ មានចំនួន ១៧១០គ្រឿង ស្មើនឹង ៣៨% និងរថយន្តដឹកទំនិញ មានចំនួន ២៨២៧គ្រឿង ស្មើនឹង ៦២%។
ដូច្នេះដើម្បីផ្លាស់ប្តូរឡានដឹកកម្មករកាត់ដេរ ពីឡានកូរ៉េ ទៅជាឡានទេសចរណ៍ តាមស្តង់ដារត្រឹមត្រូវ ទាមទារឲ្យមានការចូលរួមពីគ្រប់ភាគី។ ភាគីសំខាន់ទី១ គឺអង្គការសង្គមស៊ីវិល ក្រសួងការងារ និងភាគីរោងចក្រសហគ្រាស ដោយតម្រូវឲ្យកម្មករទាំងអស់ ដែលទទួលបានលុយថ្លៃធ្វើដំណើរ ត្រូវតែចំណាយលុយនោះ ទៅលើការធ្វើដំណើរដោយសុវត្ថិភាព។ ពោលគឺលុយថ្លៃធ្វើដំណើរ ដែលរោងចក្រសហគ្រាស បើកផ្តល់ឲ្យកម្មករ ត្រូវតែចំណាយឲ្យចំគោលដៅ ពោលគឺរោងចក្រ និងក្រសួងការងារ ត្រូវពិនិត្យលើឡានដឹកជញ្ជូន តើឡាន ដែលមានសុវត្ថិភាព មិនផ្ទុកលើសចំណុះ។ បើកម្មករ ធ្វើដំណើរដោយម៉ូតូខ្លួនឯង ឬម៉ូតូឌុប ក៏ត្រូវតែមានសុវត្ថិភាពជាចម្បង។
ចំណែកកម្មករខ្លួនឯង ក៏ត្រូវប្រើប្រាស់មធ្យោបាយ ប្រកបដោយសុខសុវត្ថិភាព ព្រោះថា បើកម្មករកាត់ដេរ ចង់អស់លុយតិច សុខចិត្តជិះឡានប្រជ្រៀតគ្នា ឈរលើសចំនួន គឺប្រឈមនឹងគ្រោះថ្នាក់ ហើយបើសិនជាគ្រោះថ្នាក់មែន នោះខាតបង់លើសការរិះថាំលុយធ្វើដំណើរប្រចាំខែនោះទៅទៀត។ បើសិនជារហូតដល់របួស ពិការ ហើយបើធ្ងន់ធ្ងរដល់ស្លាប់នោះ គឺមិនគួររិះលុយ លើការចំណាយក្នុងការធ្វើដំណើរប្រកបដោយសុវត្ថិភាពនោះទេ។
ដោយឡែក អ្នករកស៊ីបើកឡានដឹកកម្មករកាត់ដេរ ក៏ដូចគ្នា។ គួរតែគិតពីសុវត្ថិភាពជាចម្បង។ ប្តូរពីឡានកូរ៉េដឹកទំនិញ មកជាឡានទេសចរណ៍ សម្រាប់ដឹកអ្នកដំណើរ ហើយដាក់កម្មករ កុំឲ្យច្រើន លើសចំណុះ។ ស៊ូយកថ្លៃ ឲ្យរួចថ្លៃប្រេង ហើយសល់ខ្លះ ជាជាងយកថ្លៃថោក តែខំប្រឹងដាក់ញាត់មនុស្ស រហូតដល់មួយឡាន ២០ ទៅ ៣០ ឬ ៤០នាក់ ដោយឲ្យកម្មករឈរប្រជ្រៀតគ្នា គឺមិនត្រូវទាល់តែសោះ ព្រោះថា បើកើតហេតុ ជួបគ្រោះថ្នាក់ នោះគឺខាតបង់ធ្ងន់ធ្ងរ ពិសេសអាយុជីវិតអ្នកដំណើរ រួមទាំងតៃកុងឡាន ដែលដឹកមនុស្សលើសចំណុះនោះទៀត។
ការត្រួតពិនិត្យរបស់អាជ្ញាធរសមត្ថកិច្ច ដោយសហការជាមួយនឹងប៉ូលិស និងភាគីរោងចក្រសហគ្រាស ជារឿងសំខាន់ ដើម្បីកាត់បន្ថយគ្រោះថ្នាក់ចរាចរណ៍ផង និងដើម្បីផ្លាស់ប្តូររថយន្តដឹកកម្មករ ឲ្យមានសុវត្ថិភាព។ ទី១-អ្នកបើកបររថយន្តដឹកកម្មករ ត្រូវមានបណ្ណបើកបរ និងឆ្លងកាត់ការរៀនបើកបរ និងប្រឡងត្រឹមត្រូវ ដោយមិនមែនសូកលុយ ដើម្បីបានពាក់មីឡើយ។ ទី២-បើជាឡានកូរ៉េដឹកទំនិញ គឺមិនអនុញ្ញាតឲ្យប្រកបអាជីវកម្ម ដឹកកម្មករជាដាច់ខាត។ ទី៣-ការដឹកជញ្ជូនកម្មករកាត់ដេរ ត្រូវមិនដាក់លើសចំណុះ។ ពោលគឺបើត្រឹមឡានទូរីស ១២កៅអី គឹត្រូវតែត្រឹម ១២នាក់ ដោយម្នាក់ អង្គុយ ១កៅអី។ ទី៤-ឡានណា មិនគោរពតាមការណែនាំ ត្រូវចាប់ដកហូត ហើយមិនឲ្យដឹកកម្មករកាត់ដេរ រីឯកម្មករកាត់ដេរណា មិនស្តាប់តាមការណែនាំ ជិះឡានមិនត្រូវតាមស្តង់ដារ គឺមិនអនុញ្ញាតឲ្យចូលធ្វើការនៅរោងចក្រសហគ្រាសឡើយ។
ទន្ទឹមនឹងវិធានការខាងលើនេះ សំខាន់បំផុតទៀត អ្នកបើកបរឡានដឹកជញ្ជូនទាំងអស់ ពិសេសឡានដឹកកម្មករកាត់ដេរ ត្រូវតែគោរពច្បាប់ចរាចរណ៍ត្រឹមត្រូវ ហើយសូមចងចាំថា អាយុជីវិតអ្នកដំណើរ១ឡាននេះ ពឹងលើតៃកុងឡានតែម្នាក់នេះហើយ។ សូមចំណេញតិច ជាជាងខាតបង់ទាំងឡាន និងបាត់បង់ទាំងអាយុជីវិត៕ ដោយ៖ មុត ស្រីពៅ
ចែករំលែកព័តមាននេះ