ភ្នំពេញ៖ ស្រ្តីក្លាហានម្នាក់ បានបើករថយន្តតូយ៉ូតាព្រូស ខឹងបុរសបើករថយន្តកុងតឺន័រដឹកដែក បុករថយន្តគាត់ពីក្រោយ ហើយមិនទទួលខុសត្រូវ ព្យាយាមបើករត់ ក៏បន្ថែមល្បឿនបើករថយន្តដេញតាម កាកពីមុខរថយន្តកុងតឺរន័រ ស្រែកអោយប្រជាពលរដ្ឋ ជួយឃាត់អ្នកបើកបររថយន្ត បង្កហេតុ។ អ្នកបើករថយន្តកុងតឺន័រនោះ ត្រូវបានគេវាយឡើងទក់សាច់។
ហេតុការណ៍នេះ បានកើតឡើង កាលពីវេលាម៉ោង ១០យប់ ថ្ងៃទី២៣ ខែមករា ឆ្នាំ២០២១នៅចំណុចផ្លូវជាតិលេខ១ ស្ថិតនៅភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ។
ស្រ្តីម្ចាស់ឡានព្រូស ឈ្មោះ គឹម សុធារ៉ា អាយុ ២៩ឆ្នាំ ស្នាក់នៅផ្ទះលេខ៥៩Eo តាមផ្លូវ១ ភូមិ២ សង្កាត់ចតុមុខ ខណ្ឌដូនពេញ បានប្រាប់អ្នកយកព័ត៌មានថា មុនកើតហេតុ គាត់បើករថយន្តព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2BC-1364 តាមផ្លូវជាតិលេខ១ ក្នុងទិសដៅពីកើតទៅលិច ស្របទិសគ្នាជាមួយរថយន្តកុងតឺន័រ ដោយបើកទទឹមគ្នា មកដល់ម្ដុំមុខវត្តវាលស្បូវ ក្នុងសង្កាត់វាលស្បូវ រថយន្តបង្កហេតុ កុងតឺន័រដឹកដែក មកដេញកៀររថយន្តគាត់ និងបុកពីខាងក្រោយ បែកស្តុប និងកាងរថយន្ត។ តែមិនទទួលខុសត្រូវ ហើយព្យាយាមបើករត់ តែត្រូវគាត់បន្ថែមល្បឿន ក្នុងគោលបំណងដេញតាមអោយទាន់ ដើម្បីចង់ដឹងហេតុផលបើកបុក ហើយមិនទទួលខុសត្រូវ ខណៈបើកដេញតាមដល់ចំណុចកើតហេតុខាងលើ ដេញតាមរថយន្តទាន់ គាត់ក៏សំរេចចិត្តបួងចង្កូតរថយន្ត ទៅខាងឆ្វេងដៃរួចជាន់ហ្រ្វាំងឈប់ពីមុខរថយន្តកុងតឺន័រ។ តែរថយន្តបង្កនោះ បានបុកបន្ថែម គៀបរថយន្តគាត់ជាប់ខាងមុខរថយន្តកុងតឺន័រអូសជាង ៥ម៉ែត្រ ធ្វើអោយខូចខាតរថយន្តព្រូសយ៉ាងខ្លាំង ដោយបែកកញ្ចក់ទៀត ទើបគាត់ស្រែកអោយប្រជាពលរដ្ឋជួយឃាត់បុរសបើករថយន្ត។ តែប្រជាពលរដ្ឋឃើញបើកបរសាហាវពេក ទ្រាំមិនបានទាញកអាវចុះពីលើរថយន្តដាក់ម្នាក់ ១ដៃ ១ជើង ទន់ខ្លួន ដេកសន្លប់។ ក្រោយមក ក៏ត្រូវសមត្ថកិច្ចដឹកយកទៅពេទ្យ។
អ្នកបើកបររថយន្តកុងតឺន័រ មានឈ្មោះ យឹម ផាត អាយុ ២៥ឆ្នាំ មានស្រុកកំណើត នៅភូមិឃុំអណ្ដូង ស្រុកសំរោងទង ខេត្តកំពង់ស្ពឺ។
រថយន្តទាំង ២គ្រឿង ត្រូវបានប៉ូលិសនៃការិយាល័យនគរបាលចរាចរណ៍ផ្លូវគោក ស្នងការដ្ឋានរាជធានីភ្នំពេញ វាស់វែង ហើយយកទៅរក្សាទុក រង់ចាំដោះស្រាយគ្នា៕ ដោយ៖ យឹម ឈឿន
ចែករំលែកព័តមាននេះ