ខេត្ដក្រចេះ ៖ យ៉ាងហោចណាស់ក៏មាន យុវជនម្នាក់ត្រូវស្លាប់ ជ្រូក១ក្បាល និងឆ្កែ១ក្បាលត្រូវងាប់ ដោយសាររន្ទះបាញ់កាលពីល្ងាច ថ្ងៃទី៣១ កក្កដា នៅចំណុចចំការពាមទេរ ស្ថិតក្នុងសង្កាត់រកាកណ្ដាល ក្រុងក្រចេះ ខណៈមាន ភ្លៀងធ្លាក់ ។ យុវជនដែលត្រូវរន្ទះបាញ់ស្លាប់នេះ ឈ្មោះប៊ុន ធារ៉ា អាយុ១៩ឆ្នាំ មានទីលំនៅភូមិ រកាកណ្ដាលទី២ សង្កាត់រកាកណ្ដាល ក្រុងក្រចេះ ហើយហេតុការណ៍បានកើតឡើង ខណៈពេលយុវជនរូបនេះ ដើរទៅដឹកគោនៅឯចំការ លុះត្រឡប់មកផ្ទះវិញ ក៏ជួបឧប្បត្ដិហេតុនេះតែម្ដង ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅល្ងាចថ្ងៃទី៣១ កក្កដា នោះ ខណៈពេលដែលមេឃកំពុងធ្លាក់ភ្លៀងខ្លាំង ព្រមទាំងមានផ្លេកបន្ទោរខ្វាត់ខ្វែងពេញផ្ទៃមេឃផង យុវជនរងគ្រោះក៏បានដើរទៅចំការដើម្បីដឹកគោ មកផ្ទះ លុះពេលដើរមកដល់ចំណុចក្បាលស្ពានពាមទេរ ក៏ត្រូវរន្ទះបាញ់បណ្ដាលឱ្យដួលស្លាប់ នៅនឹងកន្លែងតែម្ដង ។ ប្រភពដដែលបានឱ្យដឹងទៀតថា នៅក្នុងឧប្បត្ដិហេតុគ្រោះថ្នាក់ ដោយរន្ទះបាញ់នេះ មិនត្រឹមតែឆក់យកជីវិត យុវជនម្នាក់នេះទេ សូម្បីតែសត្វឆ្កែមួយក្បាល និងជ្រូក១ក្បាល ដែលនៅក្បែរនោះក៏ត្រូវរន្ទះបាញ់ងាប់ក្នុងពេលជាមួយគ្នានោះដែរ ៕
ចែករំលែកព័តមាននេះ