កាលពីពេល ថ្មីៗនេះក្រុមហ៊ុនស្ថាបត្យកម្មរបស់អុីតាលីឈ្មោះ «Luca Curci» បានបង្ហាញពីគម្រោងអគារទីក្រុងក្នុងទឹក ។ គម្រោងនេះរួមបញ្ចូលទាំងនិរន្តរភាពរវាងដង់ស៊ីតេប្រជាជន និងជាអគារបៃតងប្រចាំប្រវត្តិសាស្ត្រផងដែរ។ វានឹងលាតត្រដាងក្នុងកម្ពស់៧៥០ម៉ែត្រ ចំនួន១៨ ជាន់ និងអាចផ្ទុកមនុស្សបានចំនួន២៥.០០០ នាក់ ។
នេះគឺជាគម្រោងសំណង់អគារទីក្រុងដំបូងបង្អស់ដែលសាងសង់លើទឹកដោយប្រើប្រាស់សម្ភារបច្ចេកទេសសំណង់ល្អឥតខ្ចោះដើម្បីទប់លំនឹងក្នុងបរិយាកាស ។ វាគ្របដណ្តប់ដោយផ្ទាំងកញ្ចក់ photovoltaic ដែលផ្តល់ចរន្តអគ្គិសនីទៅកាន់អគារទាំងមូល និងផ្គត់ផ្គង់ជានិរន្តរភាព ។ រាល់ជាន់អគារ នីមួយៗរួមមានទីតាំងកម្សាន្ត បន្ទប់ការិយាល័យ កន្លែងប្រជុំ សណ្ឋាគារលំដាប់ខ្ពស់ កន្លែងហាត់ប្រាណនិងទីតាំងកម្សាន្តមួយចំនួនទៀតដែលរៀបចំឡើងយ៉ាងល្អប្រណីតស្របតាមប្រព័ន្ធរៀបចំនៃការតុបតែងខាងក្នុង ។ ជាមួយគ្នានេះដែរអគារទីក្រុងនេះស្ថិតក្នុងបរិយាកាសធម្មជាតិពោលគឺមានសួនបៃតងនៅជាន់ នីមួយៗ ។
ក្រុមស្ថាបត្យករនៃគម្រោងនេះឱ្យដឹងថា អគារនេះសម្រាប់មនុស្សគ្រប់ឋានៈ ដែលស្វែងរកការរស់នៅប្រកបដោយផាសុកភាព និងសុភមង្គល ។ វាជាគម្រោង «អគារទីក្រុងក្នុងទឹក» លើកដំបូង តែនឹងលេចរូបរាងនាពេលខាងមុខ ៕
ចែករំលែកព័តមាននេះ