ស្ត្រីវិចិត្រករអ៊ុយក្រែនម្នាក់យកសម្បកគ្រាប់ដែលប្រមូលបាននៅភាគខាងកើតអ៊ុយក្រែនជាង៥០០០សម្បកដាក់តម្រៀបជារូបផ្ទៃមុខលោកវ្ល៉ាឌីមៀរ៍ ពូទីន ប្រធានាធិបតីរុស្ស៊ី ដោយដាក់ឈ្មោះថា «ទឹកមុខនៃសង្គ្រាម» ។
សារព័ត៌មានបរទេសកាលពីថ្ងៃទី២៨ កក្កដា ២០១៥ ផ្សាយថា អ្នកនាងដារីយ៉ា ម៉ាឆេនកូ វិចិត្រករជនជាតិអ៊ុយក្រែន បានបង្កើតរូបសិល្បៈឆ្លុះបញ្ចាំងពីការប្រយុទ្ធគ្នានៅភាគខាងកើតប្រទេស ដែលកើតឡើងកាលពីឆ្នាំមុន ខណៈរុស្ស៊ីប្រើកម្លាំងទ័ពវាយលុក ។ ចាត់ទុកថាជាទំនាស់ផ្នែកយោធាដ៏ធំនៅតំបន់អឺរ៉ុប ចាប់តាំងពីសង្គ្រាមលោកលើកទី២បានបញ្ចប់ រួមទាំងបង្កការរង្គោះរង្គើនៅលើពិភពលោក និងសម្លាប់មនុស្សជាង៣០.០០០នាក់ ។ រូបភាពនោះមានឈ្មោះថា «ផ្ទៃមុខនៃសឹកសង្គ្រាម» ជារូបកើតឡើងដោយសារការយកសម្បកគ្រាប់ជាង៥០០០សម្បក ជាកាកសំណល់សង្គ្រាមនៅភាគខាងកើតអ៊ុយក្រែន ដាក់តម្រៀបគ្នាជាផ្ទៃមុខរបស់លោកវ្លាឌីមៀរ៍ ពូទីន ប្រធានាធិបតីរុស្ស៊ី ។ ចាត់ទុកថាជាលើកដំបូងដែលមានការច្នៃរូបភាពពីសម្បកគ្រាប់ក្នុងបច្ចេកវិទ្យាខ្ពស់បង្ហាញក្នុងនិន្នាការនៃសង្គ្រាម ។ រូបភាពនោះបានតាំងបង្ហាញនៅមជ្ឈមណ្ឌលសិល្បៈមួយក្នុងក្រុងគៀវប្រទេសអ៊ុយក្រែន ៕
ចែករំលែកព័តមាននេះ