ខេត្តតាកែវ៖ ដើម្បីរក្សាបាននូវបូរណភាពដែនដី សុខសន្តិភាព និងទប់ស្កាត់រាល់បទល្មើសផ្សេងៗ ក៏ដូចជា ការទប់ស្កាត់នូវការរីករាលដាលនៃជំងឺកូវីដ-១៩ ដែលអាចកើតមាន ឆ្លងកាត់តាមខ្សែបន្ទាត់ព្រំដែនកម្ពុជា-វៀតណាម នៅព្រឹកថ្ងៃទី២២ ខែមករា ឆ្នាំ២០២១ លោកឧត្តមសេនីយ៍ត្រី នាង សុភារ៉ា មេបញ្ជាការ តំបន់ប្រតិបត្តិការសឹករងតាកែវ បានចាត់តាំងកម្លាំង ចេញល្បាតតាមខ្សែបន្ទាត់ព្រំដែន កម្ពុជា-វៀតណាម (តាកែវ-គៀនយ៉ាង) ស្ថិតក្នុងភូមិភ្នំក្រពើឃុំព្រៃរំដេង ស្រុកគិរីវង់ ខេត្តតាកែវ។
ការចុះល្បាត គឺត្រូវបានធ្វើឡើង ដើម្បីការពារឲ្យបាននូវសុខសន្តិភាព ស្ថិរភាព ជូនប្រជាពលរដ្ឋ ដែលរស់នៅតាមខ្សែបន្ទាត់ព្រំដែន ក្នុងការប្រកបរបរទទួលទាន និងធ្វើកសិកម្មផ្សេងៗ។
ជាការកត់សម្គាល់ គឺពុំមានបទល្មើសឆ្លងដែន ឬមានបញ្ហាអសន្តិសុខកើតឡើង ក្នុងតំបន់នេះឡើយ។
កងកម្លាំងទាំងអស់ បានបន្តចុះល្បាតជាប់ជាប្រចាំ តាមផែនការ និងបទបញ្ជារបស់ថ្នាក់ដឹកនាំយោធភូមិភាគទី៣ និងមេបញ្ជាការកងទ័ពជើងគោក បានដាក់ចុះប្រកបដោយភាពម៉ឺងម៉ាត់ និងការទទួលខុសត្រូវខ្ពស់ សំដៅធានាការពារឲ្យបានចំពោះបូរណភាពទឹកដី និងអធិបតេយ្យភាពកម្ពុជា ស្របតាមមាគ៌ាដឹកនាំរបស់ប្រមុខរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី៕ ដោយ៖ សុខ សារ៉ាយ
ចែករំលែកព័តមាននេះ