ខេត្តព្រះវិហារ ៖ ព្រះរាជអាជ្ញារងអមសាលាដំបូងខេត្ត បានដឹកនាំសមត្ថកិច្ចជំនាញចុះបង្ក្រាបឈើខុសច្បាប់ជាង១០ម៉ែត្រគូប ដែលឈ្មួញទុច្ចរិតដឹកពីព្រៃយកមកស្តុកទុកនៅក្នុងភូមិអូរស្នៀត ឃុំតស៊ូ ស្រុកជ័យសែន បម្រុងដឹកចេញទៅទីផ្សារខេត្តកំពង់ធំ ។
លោក វុធ សាវី ព្រះរាជអាជ្ញារងនៃអយ្យការអមសាលាដំបូងខេត្ត បានឱ្យដឹងថា ការបង្ក្រាបឈើខុសច្បាប់នេះមានការចូលរួមពីកងកម្លាំងប្រដាប់អាវុធស្រុកជ័យសែន រួមជាមួយខាងរដ្ឋបាលព្រៃឈើ ធ្វើឡើងកាលពីរសៀលថ្ងៃទី២០ ខែមករា ឆ្នាំ២០២១ ។
នៅក្នុងការបង្ក្រាបនេះ សមត្ថកិច្ចបានរឹបអូសវត្ថុតាងឈើប្រភេទលេខ១មាន ស្រឡៅចំនួន១៣៤សន្លឹកស្មើនឹងជាង១០ម៉ែត្រគូប និងគោយន្តកន្ត្រៃដឹកឈើចំនួន៥គ្រឿង យកមករក្សាទុកនៅសង្កាត់រដ្ឋបាលព្រៃឈើជ័យសែន ដើម្បីកសាងសំណុំរឿងបន្តតាមផ្លូវច្បាប់ ។
លោកបន្តថា ជាវិធានការបន្ត ក្នុងនាមស្ថាប័នតុលាការ នឹងអនុវត្តប្រកបដោយតម្លា
ភាព និងមិនមានការលើកលែងចំពោះសកម្មភាពទាំងឡាយក្នុងការដឹកជញ្ជូន និងការកាប់បំផ្លាញព្រៃឈើជាដាច់ខាត ដើម្បីចូលរួមទប់ស្កាត់ និងការពារធនធានធម្មជាតិដែលនៅសេសសល់ឱ្យនៅគង់វង្ស ។
បើតាមប្រជាពលរដ្ឋនៅក្បែរនោះ បានឱ្យដឹងថា ឈ្មួញទុច្ចរិតជារៀងរាល់ថ្ងៃតែងតែបានដឹកជញ្ជូនឈើចេញពីព្រៃមកគរទុក និងខ្លះទៀតយកមកផ្ញើទុកនៅផ្ទះអ្នកភូមិ ។ បន្ទាប់មក ពួកគេបានប្រើប្រាស់រថយន្តសាំយ៉ុងកែច្នៃ ដឹកចេញនៅពេលយប់ដោយមិនញញើតសមត្ថកិច្ចសោះឡើយ ៕
ចែករំលែកព័តមាននេះ