រាជធានីភ្នំពេញ ៖ រថយន្តតូយ៉ូតាព្រូសបើកបរឆ្លងផ្លូវខ្វះការប្រុងប្រយ័ត្នត្រូវរថយន្តបែនដឹកដីជាន់ហ្វ្រាំងមិនទាន់ជ្រុលទៅបុកពេញទំហឹងបណ្ដាលឲ្យគាបជាប់រងការខូចខាតយ៉ាងធ្ងន់ធ្ងរ បង្កឲ្យមានការភ្ញាក់ផ្អើលកាលពីវេលាម៉ោង៨ និង៣០នាទីយប់ ថ្ងៃទី២០ ខែមករា ឆ្នាំ២០២១ នៅតាមបណ្ដោយផ្លូវបេតុង ភូមិតិក្ខិប្បញោ សង្កាត់សំរោងក្រោម ខណ្ឌពោធិ៍សែនជ័យ។ រថយន្ដបង្កជារថយន្តបែនដឹកដី ពណ៌ខ្មៅ លាយទឹកមាស ពាក់ស្លាកលេខ ព្រះសីហនុ 3A-6044 បើកបរក្នុងទិសដៅពីលិចទៅកើតក្នុងល្បឿនយ៉ាងលឿនដោយវាក់ ហើយបានជាន់ហ្វ្រាំងមិនជាប់ជ្រុលទៅបុកពេញទំហឹង។
ចំណែករថយន្ដរងគ្រោះម៉ាកតូយ៉ូតាព្រូស ពណ៌ក្រហម ពាក់ស្លាកលេខ ភ្នំពេញ 2BD-3901 បើកបរក្នុងទិសដៅពីជើងទៅត្បូងក្នុងល្បឿនមធ្យមរងការខូចខាតយ៉ាងធ្ងន់ធ្ងរខ្ទេចមួយចំហៀងផ្នែកខាងស្ដាំដៃ។ តាមប្រភពព័ត៌មានពីម្ចាស់រថយន្តតូយ៉ូតាព្រូសបាននិយាយប្រាប់ថា នៅមុនពេលកើតហេតុគាត់បើកបរក្នុងទិសដៅពីជើងទៅត្បូងឆ្លងផ្លូវក្នុងគោលបំណងបត់ទៅលិចហើយក៏វាក់នឹងរថយន្តមួយគ្រឿងដែលនៅពីខាងមុខក៏ស្រាប់តែមានរថយន្តបែនដឹកដីបើកបរក្នុងទិសដៅពីលិចទៅកើតក្នុងល្បឿនយ៉ាងលឿនបុករថយន្តរបស់គាត់ពេញទំហឹងផ្នែកខាងស្ដាំបណ្ដាលឲ្យអូសគាបជាប់គ្នារងការខូចខាតយ៉ាងធ្ងន់ធ្ងរ ភ្លាមៗនោះដែរភាគីទាំងសងខាងបានជជែកយកតែត្រូវរៀងៗខ្លួន បន្ទាប់មក៏មានកម្លាំងសមត្ថកិច្ចនគរបាលប៉ុស្តិ៍សំរោងក្រោមបានចុះទៅដល់ហើយបានទាក់ទងទៅផ្នែកជំនាញចរាចរណ៍ខណ្ឌពោធិ៍សែនជ័យ។
ដោយសារផ្នែកជំនាញចរាចរណ៍ខណ្ឌជាប់រវល់ដោះស្រាយចរាចរណ៍ផ្សេងទៀតមិនទាន់បានឲ្យកម្លាំងសមត្ថកិច្ចនគរបាលប៉ុស្តិ៍សំរោងក្រោមបាញ់ថ្នាំរថយន្តទាំងពីរគ្រឿងយកចេញពីកន្លែងកើតហេតុដើម្បីកុំឲ្យកកស្ទះចរាចរណ៍ និងឲ្យភាគីទាំងសងខាងជជែក សម្របសម្រួលគ្នា ដោយភាគីខាងរថយន្តរងគ្រោះទាមទារឲ្យសងថ្លៃខូចខាតចំនួន២០០ដុល្លារ តែខាងរថយន្តបែនដឹកដីសុំចុះថ្លៃត្រឹម១៥០ដុល្លារ បញ្ចប់រឿងនៅកន្លែងកើតហេតុតែម្ដង៕ ដោយ ៖ យឹម ឈឿន
ចែករំលែកព័តមាននេះ