ខេត្តស្ទឹងត្រែង ៖ ទឹកជាប្រភពធម្មជាតិមួយដែលមិនអាចខ្វះបានសម្រាប់មនុស្សប្រើប្រាស់ជាប្រចាំទោះស្ថិតនៅច្រកល្ហកណាក៏ដោយ។ ជាពិសេសនៅតាមតំបន់ព្រៃភ្នំជ្រលងដងអូរ ដែលភាគច្រើនសម្បូរទៅដោយជនជាតិដើម ភាគតិចរស់នៅតដំណែលបន្តរក្សាទម្លាប់ប្រើប្រាស់នូវធនធានធម្មជាតិក្បែរខ្លួនទល់បច្ចុប្បន្ន បើទោះស្ថិតក្នុងសម័យកាលជឿនលឿនក្តី។ ប្រូវជនជាតិដើមភាគតិចមួយស្ថិតក្នុងអម្បូរ ជនជាតិភាគតិចជាច្រើនទៀត រស់នៅភូមិកាតូត ឃុំកំភុន ស្រុកសេសាន ខេត្តស្ទឹងត្រែងបានរក្សាទម្លាប់យកទឹកអូរដែលធ្លាក់ចេញពីភ្នំឫសឈើធម្មជាតិដងមុជ ដាក់ធុងទុកសម្រាប់ដាំផឹក និងស្លជាដើម។
កាតូតកាលពីសម័យដើមជាភូមិកុលសម្ព័ន្ធមួយដាច់ដោយឡែក។ តែភូមិនោះមិនឆ្ងាយប៉ុន្មានពីទីរួមខេត្ត និងពុំឆ្ងាយពីទីរួមស្រុកសេសានឡើយ។ ជនជាតិប្រូវភូមិនោះនៅតែប្រើទម្លាប់តាមបែបធម្មជាតិដដែល។ លោក សុវណ្ណ ពិសិដ្ឋ អភិបាលស្រុក សេសានបានប្រាប់ឲ្យដឹងថា ដោយមើលឃើញពីការរស់នៅតាមទំនៀមទម្លាប់របស់បងប្អូនជនជាតិដើមភាគតិចយកទឹកអូរពីប្រភពធម្មជាតិ ប្រើប្រាស់ជាសំខាន់នោះ លោកក៏បានដឹកនាំមន្ត្រីសហការជាមួយបងប្អូនប្រជាពលរដ្ឋនៅតំបន់នោះយកបាវខ្សាច់ទៅទប់ទឹកកែច្នៃឲ្យបានទៅជាកន្លែងដែលងាយស្រួលសម្រាប់ដងទឹកមុជប្រើប្រាស់ប្រចាំថ្ងៃ។
លោកអភិបាលស្រុកបានសម្លឹងវែងឆ្ងាយថា បើសិនជាមានថវិកាគ្រប់គ្រាន់ណាមួយនោះនឹងកែច្នៃតំបន់អូរនេះជាទំនប់ទឹកមួយដើម្បីងាយស្រួលសម្រាប់អ្នកភូមិប្រើប្រាស់។ លោកអភិបាលស្រុកបាននិយាយបន្តថា នៅក្នុងស្រុករបស់លោកមានអណ្ដូងស្នប់ដែលបានផ្ដល់ឱ្យពួកគាត់ប្រើប្រាស់ដែរប៉ុន្តែជាទម្លាប់របស់ជនជាតិដើមភាគតិចធ្លាប់ប្រើប្រាស់ទឹកហូរបែបនេះហើយគាត់នៅតែរក្សាទម្លាប់យកទឹកអូរដែលចេញពីធម្មជាតិមកប្រើប្រាស់ជាដដែល។ លោកគ្រោងនឹងរៀបចំអូរនេះឲ្យក្លាយជាទំនប់ទឹកមួយបង្កលក្ខណៈងាយស្រួលដល់ប្រជាពលរដ្ឋនៅថ្ងៃខាងមុខ៕ ដោយ ៖ រ៉ូ សាលី
ចែករំលែកព័តមាននេះ