លែងឲ្យអ្នកសារព័ត៌មានចូលថត ឫផ្សាយផ្ទាល់ ក្នុងពេលសមត្ថកិច្ចកំពុងអនុវត្តការងារ
រាជធានីភ្នំពេញ ៖ នៅព្រឹកថ្ងៃទី២១ ខែមករា ឆ្នាំ២០២១ ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ…
រាជធានីភ្នំពេញ ៖ នៅព្រឹកថ្ងៃទី២១ ខែមករា ឆ្នាំ២០២១ ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានដឹកនាំកិច្ចប្រជុំ ស្តីពីការកែសម្រួល ក្រុមប្រតិបត្តិការ បង្ក្រាបបទល្មើស ពាក់ព័ន្ធការងារ សន្តិសុខ ព្រហ្មទណ្ឌ គ្រឿងញៀន ការជួញដូរមនុស្ស អន្តោប្រសេន៍ និងល្បែងស៊ីសងខុសច្បាប់ ក្នុងរាជធានីភ្នំពេញ ។
សមាសភាពចូលរួមក្នុងកិច្ចប្រជុំនេះរួមមាន លោកប្រធាន និងអនុប្រធាន ក្រុមការងារ ដើម្បីទទួលមតិណែនាំល្អៗ របស់លោកស្នងការ អំពីរបៀបចំផែនការ នៃការតាមដាន ស្រាវជ្រាវ រហូតឈានដល់ការបង្ក្រាបទីតាំងប្រកបដោយប្រសិទ្ធភាព ។
ជាកិច្ចបញ្ចប់លោកស្នងការ ស ថេត បានធ្វើការណែនាំដល់មន្ត្រីអនុវត្តច្បាប់ទាំងអស់ ត្រូវធ្វើការងារឲ្យបានច្បាស់លាស់ ហាមមិនឲ្យអ្នកសារព័ត៌មានមួយចំនួនចូលថត ឬឡាយ សកម្មភាពទាំងឡាយណា ដែលសមត្ថកិច្ចកំពុងតែអនុវត្តការងារ ឬកំពុងតែធ្វើការតាមដាន ស្រាវជ្រាវកំណត់មុខសញ្ញាល្មើស បង្ក្រាបបទល្មើស ក៏ដូចជាកំពុងធ្វើការជំនាញសំខាន់ផ្សេងៗទៀត ។
ចំពោះអ្នកដែលបំពាន មិនស្តាប់តាមការណែនាំរបស់សមត្ថកិច្ច នោះសមត្ថកិច្ចនឹងចាត់ការតាមវិធានការច្បាប់ ក៏ដូចជាច្បាប់សារព័ត៌មាន ។
គួរជម្រាបដែរថា បើតាមប្រសាសន៍ឯកឧត្តម ខៀវ កញ្ញរិទ្ធ រដ្ឋមន្ត្រីក្រសួងព័ត៌មាន ដែលបានផ្សាយតាមទូរទស្សន៍ជាតិកម្ពុជា ទទក បានរម្លឹកដល់អ្នកសារព័ត៌មានទាំងអស់ កុំទៅថត យកព័ត៌មាន នៅក្នុងដែនសមត្ថកិច្ច របស់អាជ្ញាធរដែលហាមឃាត់ កំពុងបំពេញកិច្ចការ ព្រោះខុសវិជ្ជាជីវៈសារព័ត៌មាន បើនៅមិនស្តាប់ការហាមឃាត់នោះទេ សមត្ថកិច្ចមានសិទ្ធិចាប់ឃាត់ខ្លួនអ្នកសារព័ត៌មាន ពេលនោះ តែម្តង ៕
ចែករំលែកព័តមាននេះ