រាជធានីភ្នំពេញ ៖ រថយន្តកុងតឺន័រមួយគ្រឿងបើកលឿនក៏ជ្រុលទៅបុកអូសម៉ូតូមួយគ្រឿងជាច្រើនម៉ែត្រ បណ្តាលឲ្យអ្នកបើកបរម៉ូតូរងរបួសធ្ងន់ម្នាក់ ហើយត្រូវបានរថយន្តឯកជនដឹកយកទៅសង្គ្រោះភ្លាមៗ ដែលហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង៩និង៣០នាទីយប់ថ្ងៃទី២០ ខែមករា ឆ្នាំ២០២១ នៅតាមបណ្តោយវិថីចោមចៅ (វ៉េងស្រេង) ស្ថិតក្នុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
រថយន្តកុងតឺន័រមួយគ្រឿងខាងលើម៉ាកហ៊ីណូ (Hino) ពណ៍ខៀវខ្ចីលាយពណ៌ត្រួយចេក ពាក់ស្លាកលេខ ភ្នំពេញ 3C-8853 អ្នកបើកបរមិនស្គាល់អត្តសញ្ញាណ ។ ចំណែកភាគីខាងលើម៉ូតូ ម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 1FR-8395អ្នកបើកបរមិនស្គាល់អត្តសញ្ញាណ បានរងរបួសធ្ងន់ ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញជនរងគ្រោះជិះម៉ូតូម៉ាកហុងដាឌ្រីម ធ្វើដំណើរក្នុងទិសដៅពីកើតទៅលិចក្នុងល្បឿនមធ្យម លុះមកដល់ចំណុចកើតហេតុខាងលើ ក៏ស្រាប់តែមានរថយន្តកុងតឺន័របើកបរក្នុងទិសដៅស្របគ្នាជាមួយម៉ូតូ ហើយក៏បានបើកបុកម៉ូតូពីក្រោយយ៉ាងពេញទំហឹង បណ្ដាលឲ្យអូសជាច្រើនម៉ែត្រធ្វើឱ្យអ្នកបើកបរម៉ូតូរងគ្រោះរងរបួសយ៉ាងធ្ងន់ធ្ងរ ។
តាមប្រភពខាងលើបានបន្តថា ភ្លាមៗនោះជនរងគ្រោះត្រូវបានរថយន្តសង្គ្រោះគ្លីនិកឯកជនមកដឹកយកទៅសង្គ្រោះបន្ទាន់ភ្លាមៗនៅមន្ទីរពេទ្យ ។ ចំណែកឯរថយន្តកុងតឺន័រវិញ បន្ទាប់ពីបុកជនរងគ្រោះភ្លាម អ្នកបើកបរក៏បានរត់គេចខ្លួនបាត់ស្រមោល បន្សល់ទុកតែរថយន្តកុងតឺន័រនៅកន្លែងកើតហេតុ។
ក្រោយពេលកើតហេតុ កម្លាំងនគរបាលប៉ុស្តិ៍ចោមចៅទី២បានចុះមកដល់កន្លែងកើតហេតុ ហើយបានទំនាក់ទំនងទៅផ្នែកជំនាញចរាចរណ៍ខណ្ឌពោធិ៍សែនជ័យ ដើម្បីឱ្យចុះមកវាស់វែង និងយករថយន្តកុងតឺន័រ ព្រមទាំងម៉ូតូទៅរក្សាទុក ដើម្បីរង់ចាំធ្វើការដោះស្រាយនៅពេលក្រោយទៀត ៕
ចែករំលែកព័តមាននេះ