ខេត្តប៉ៃលិន ៖ មានប្រសាសន៍ថ្លែងនៅក្នុងកិច្ចប្រជុំផ្សព្វផ្សាយសេចក្តីប្រកាសកំណត់តំបន់ធ្វើការវិនិច្ឆ័យ សម្រាប់ការចុះបញ្ជីដីធ្លីលក្ខណៈជាប្រព័ន្ធ នៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន កាលព្រឹកថ្ងៃទី២០ ខែមករា ឆ្នាំ២០២១នេះ នៅបរិវេណវត្តព្រំមរកត ឯកឧត្តម ហុក សុផល អភិបាលខេត្តស្តីទី បានស្នើដល់ប្រជាពលរដ្ឋត្រូវត្រៀមឯកសារពាក់ព័ន្ធ និងព្រំប្រទល់ដីរបស់ខ្លួនឱ្យបានច្បាស់លាស់ ដើម្បីងាយស្រួលដល់មន្ត្រីជំនាញក្នុងការចុះបញ្ជីដីធ្លីលក្ខណៈជាប្រព័ន្ធឱ្យបានឆាប់រហ័ស ព្រោះការធ្វើប័ណ្ណកម្មសិទ្ធិគឺជាការកំណត់ព្រំប្រទល់ដីធ្លីស្របច្បាប់ ហើយប័ណ្ណកម្មសិទ្ធិនេះពិតជាមានសារៈសំខាន់ណាស់សម្រាប់ការកំណត់អត្តសញ្ញាណដីធ្លី ងាយស្រួលចែកបន្តដល់កូនចៅជំនាន់ក្រោយ សម្រាប់ប្រើប្រាស់តាមតម្រូវការចាំបាច់ដោយគ្មានជនណាម្នាក់អាចកេងបន្លំបានឡើយ។
ឯកឧត្តម ហុក សុផល បានមានប្រសាសន៍ថា ៖ កន្លងមករាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី បានប្តេជ្ញាអនុវត្តកំណែទម្រង់ស៊ីជម្រៅលើគ្រប់វិស័យ ក្នុងនោះក៏មានការកំណែទម្រង់វិស័យដីធ្លីទៅតាមការចាំបាច់របស់ប្រជាពលរដ្ឋនៅមូលដ្ឋានយ៉ាងពិតប្រាកដ។ ដូច្នេះការប្រកាសកំណត់តំបន់ធ្វើការវិនិច្ឆ័យ សម្រាប់ការចុះបញ្ជីដីធ្លីមានលក្ខណៈជាប្រព័ន្ធ ពិតជាមានភាពងាយស្រួលក្នុងការផ្តល់សិទ្ធិកាន់កាប់ទ្រព្យសម្បតិ្តជូនដល់ប្រជាពលរដ្ឋដោយស្របច្បាប់។
ឯកឧត្តមអភិបាលខេត្តស្តីទី បានមានប្រសាសន៍ផ្តាំផ្ញើដល់ប្រជា ពលរដ្ឋ ដែលបានមកចូលរួមនាពេលនេះ សូមជួយផ្សព្វផ្សាយបន្តឲ្យប្រជាពលរដ្ឋដទៃទៀត ដែលមិនបានចូលរួមឲ្យយល់ដឹងពីនីតិវិធី នៃការចុះបញ្ជីដីធ្លីមានលក្ខណៈជាប្រព័ន្ធ ដោយត្រូវត្រៀមឯកសារពាក់ព័ន្ធមួយចំនួនដូចជា៖ សំបុត្រកំណើត អត្តសញ្ញាណប័ណ្ណ សំបុត្រអាពាហ៍ពិពាហ៍ សំបុត្រមរណៈភាព និងសៀវភៅគ្រួសារជាដើម ហើយក្នុងនោះអាជ្ញាធរមូលដ្ឋានគ្រប់លំដាប់ថ្នាក់ និងស្ថាប័នពាក់ព័ន្ធ រួមទាំងបងប្អូនប្រជាពលរដ្ឋ ដែលជាអ្នកកាន់កាប់ដីក្នុងតំបន់វិនិច្ឆ័យនេះ សូមផ្តល់ភាពងាយស្រួល និងចូលរួមសហការឲ្យបានល្អជាមួយក្រុមការងារចុះបញ្ជីដីធ្លី ដើម្បីឲ្យការអនុវត្តនីតិវិធី នៃការចុះបញ្ជីដីធ្លីមានលក្ខណៈជាប្រព័ន្ធប្រព្រឹត្តទៅដោយរលូន និងជោគជ័យទៅតាមផែនការ។
លោក សូ សុខុន ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តប៉ៃលិន បានឲ្យដឹងថា ៖ នីតិវិធីនៃការចុះបញ្ជីដីធ្លីមានលក្ខណៈប្រព័ន្ធមាន៥ដំណាក់កាល ៖ ១-ត្រៀមរៀបចំ គឺការកំណត់តំបន់វិនិច្ឆ័យ ការបង្កើតគណៈកម្មការរដ្ឋបាល ការជូនដំណឹង កិច្ចប្រជុំផ្សព្វផ្សាយ និងដំណើរការផ្សព្វផ្សាយ ពីការចុះបញ្ជីដីធ្លីមានលក្ខណៈជាប្រព័ន្ធ។ ២-ប្រតិបតិ្តការបច្ចេកទេស គឺការចុះកំណត់ព្រំ វាស់វែង និងវិនិច្ឆ័យ ដើម្បីកសាងប្លង់សុរិយោដី និងបញ្ជីឈ្មោះម្ចាស់ដី។
៣-បិទផ្សាយជាសាធារណៈនូវឯកសារនៃការវិនិច្ឆ័យ (ប្លង់សុរិយោដី និងបញ្ជីឈ្មោះម្ចាស់ដី) រយៈពេល១៥ថ្ងៃ ដើម្បីទុកលទ្ធភាពឲ្យម្ចាស់ដី និងអ្នកពាក់ព័ន្ធ ធ្វើការផ្ទៀងផ្ទាត់ឈ្មោះ ស្ថានភាពគ្រួសារ និងក្បាលដីរបស់ខ្លួន ព្រមទាំងធ្វើការតវ៉ាក្នុងករណីមានការខុសឆ្គង។ ៤-សម្រេចលើឯកសារវិនិច្ឆ័យ របាយការណ៍ពីលទ្ធផលនៃការបិទផ្សាយជាសាធារណៈនូវឯកសារនៃការវិនិច្ឆ័យរបស់គណៈកម្មការរដ្ឋបាលជូនអភិបាលខេត្ត ដើម្បីពិនិត្យ និងសម្រេចលើការផ្តល់សិទ្ធិចំពោះក្បាលដីណា ដែលមិនមានទំនាស់ ឬមានការពាក់ព័ន្ធនឹងដីរបស់រដ្ឋ និង ៥-ចុះបញ្ជីចេញប័ណ្ណ និងចែកប័ណ្ណជូនម្ចាស់ដី។
សូមបញ្ជាក់ថា ៖ ភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដែលប្រកាសកំណត់តំបន់ធ្វើការវិនិច្ឆ័យ សម្រាប់ការចុះបញ្ជីដីធ្លីមានលក្ខណៈជាប្រព័ន្ធ គឺមានប្រជាជនសរុបចំនួន៧២៦គ្រួសារ ស្មើនឹងចំនួន៣១២៦នាក់ ស្រី ៦១៦នាក់ មានផ្ទៃដីទំហំ ២២៩ហិកតា ស្មើនឹង ១៤៣៤ក្បាលដី ក្នុងនោះដីលំនៅដ្ឋានចំនួន ២០០ហិកតា និងដីកសិកម្មមានចំនួន ២៩ហិកតា ហើយក្រុមការងារចុះវាស់វែងដីធ្លីមានលក្ខណៈជាប្រព័ន្ធនឹងចាប់ផ្តើមវាស់វែងនៅថ្ងៃទី២៥ ខែមករា ឆ្នាំ២០២១ នេះតទៅ៕ ដោយ ៖ នីយ៉ា
ចែករំលែកព័តមាននេះ