ខេត្តបន្ទាយមានជ័យ ៖ ពិតជាគួរឱ្យអាណិតអាសូរខ្លាំងណាស់ ស្ត្រីចំណាស់វ័យ៦៨ឆ្នាំម្នាក់ចិញ្ចឹមកូនប្រុសមានសតិមិនគ្រប់ផង និងចៅស្រី២នាក់ទៀត អាស្រ័យលើការដើររើសអេតចាយដោះស្រាយជីវភាព ដែលមើលទៅគឺពិតជាគួរឲ្យសង្វេគ ។ ស្ត្រីខាងលើឈ្មោះសានគីម អាយុ៦៨ឆ្នាំ…
ខេត្តបន្ទាយមានជ័យ ៖ ពិតជាគួរឱ្យអាណិតអាសូរខ្លាំងណាស់ ស្ត្រីចំណាស់វ័យ៦៨ឆ្នាំម្នាក់ចិញ្ចឹមកូនប្រុសមានសតិមិនគ្រប់ផង និងចៅស្រី២នាក់ទៀត អាស្រ័យលើការដើររើសអេតចាយដោះស្រាយជីវភាព ដែលមើលទៅគឺពិតជាគួរឲ្យសង្វេគ ។
ស្ត្រីខាងលើឈ្មោះសានគីម អាយុ៦៨ឆ្នាំ ចិញ្ចឹមកូនប្រុសមានសតិមិនគ្រប់ម្នាក់ឈ្មោះស៊ិនមន្នី ហៅសុខ អាយុ២១ឆ្នាំ និងចៅស្រី២នាក់ ក្នុងនោះម្នាក់ឈ្មោះម៉េង ស្រីទូច អាយុ១៣ឆ្នាំ និងម្នាក់ទៀតឈ្មោះម៉េង ស្រីមាស អាយុ៨ឆ្នាំ ។ បច្ចុប្បន្នពួកគាត់រស់នៅក្នុងភូមិសាមគ្គី មានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
ស្ត្រីចំណាស់រូបនេះរៀបរាប់ប្រាប់ឱ្យដឹងថា គាត់ជាស្ត្រីមេម៉ាយ ហើយបានរស់នៅក្នុងភូមិឃុំខាងលើជាយូរមកហើយ ដោយជីវភាពក្រីក្រពេក គាត់គ្មានប្រាក់បង្កើតមុខរបរ ក៏ចាប់យកមុខរបរដើររើសអេតចាយតាំងពីដើមរៀងមកជាង៣ឆ្នាំកន្លងមកហើយ។
ស្ត្រីចំណាស់រូបនេះបានរៀបរាប់ប្រាប់បន្តថា របររើសអេតចាយនាពេលបច្ចុប្បន្ន ស្ទើរដាច់បាយហើយ ពោលគឺដើររើសមិនសូវបាន បើទោះជាតម្លៃអេតចាយមិនធ្លាក់ចុះ ប៉ុន្តែអ្នករើសអេតចាយមានចំនួនច្រើនពេកក្នុងសម័យកូវីដនេះ។
ស្ត្រីចំណាស់រូបនេះបានរៀបរាប់ថា គាត់មិនដែលបានទទួលប្រាក់ឧបត្ថម្ភពីរាជរដ្ឋាភិបាលតាមរយៈអាជ្ញាធរ ឬហៅថាប័ណ្ណក្រីក្រនោះទេ ប៉ុន្តែធ្លាប់បានទទួលអំណោយជាគ្រឿងឧបភោគនិងបរិភោគពីអាជ្ញាធរនិងភ្នាក់ងារកោះសន្តិភាព៣ដងដែរ។
តាមប្រភពពីអ្នកស្រុកដែលរស់នៅក្នុងភូមិឃុំខាងលើបាននិយាយថា គ្រួសាររបស់ស្ត្រីចំណាស់មួយរូបខាងលើនេះប្រកបរបរដើររើសអេតចាយជាយូរមកហើយ ពួកគាត់មានការអាណិតអាសូរខ្លាំងណាស់ ព្រោះតែគាត់ចាស់ណាស់ហើយខំប្រឹងដើររើសអេតចាយដើម្បីចិញ្ចឹមកូនមានសតិមិនគ្រប់ផង និងចៅៗដែលឪពុកម្តាយរបស់ពួកគេក្រីក្រថែមទៀត។
កន្លងមក ពេលសាកសួរអាជ្ញាធរពាក់ព័ន្ធរឿងប័ណ្ណក្រីក្រ តែងតែលើកឡើងថាផ្តល់ឲ្យតែពលរដ្ឋទាំងឡាយណាមានឈ្មោះជាសមាជិកក្នុងភូមិ ឬឃុំសង្កាត់ ពិសេសមានទាំងសៀវភៅគ្រួសារ ឬសៀវភៅស្នាក់នៅត្រឹមត្រូវ លើកលែងតែអ្នកចំណូលថ្មី។
ជុំវិញករណីខាងលើនេះ លោកភោគ លន ចៅសង្កាត់ប៉ោយប៉ែត ដែលកន្លងមកធ្លាប់ប្រាប់កោះសន្តិភាពតាមទូរស័ព្ទថា កម្មវិធីចែកប័ណ្ណក្រីក្រមិនទាន់មានទៀតទេ ប៉ុន្តែលោកថា គ្រួសាមួយនេះ អាជ្ញាសង្កាត់និងក្រុងធ្លាប់ឲ្យអំណោយជាបន្តបន្ទាប់ផងដែរ៕
ចែករំលែកព័តមាននេះ