ខេត្តសៀមរាប៖ «តាង៉ែនបន្ទាយស្រី»៖ ផ្អែមមុត ឈ្ងុយឆ្ងាញ់ ស្រស់ថ្មីពីធម្មជាតិ! សំខាន់អាចទៅលេងដល់ចម្ការ ហើយដើរកាច់ពីដើមដោយខ្លួនឯងបានទៀត។
ដើមតាង៉ែនទាំងនេះ មិនមានបាញ់ថ្នាំគីមីឡើយ មានសុវត្ថិភាព ១០០ភាគរយ សម្រាប់ការបេះហូបភ្លាមៗពីដើមផ្ទាល់ តែមានលក្ខខណ្ឌតម្រូវឱ្យទិញចាប់ពី ១០ គីឡូ ឡើងទៅ ទើបអាចធ្វើដូច្នេះបាន (ព្រោះខ្លាចដើរហូបឆ្អែតហើយ ទិញតែកន្លះគីឡូ)។ និងដើម្បីចូលរួមជម្រុញឱ្យមានការរីកចម្រើន និងបង្កើនភាពទាក់ទាញខាងផ្នែកកសិទេសចរណ៍ នៅក្នុងស្រុកបន្ទាយស្រី ម្ចាស់ចម្ការបានយល់ព្រមសហការជាមួយរដ្ឋបាលស្រុក ដោយលក់ជូនក្នុងតម្លៃពិសេស (ត្រឹមតែ៥០០០រៀលក្នុងមួយគីឡូ) សម្រាប់អ្នកទេសចរ ដែលអញ្ជើញមកទិញដល់ចម្ការផ្ទាល់ ហើយអនុញ្ញាតឱ្យដើរកាច់យកខ្លួនឯង និងអាចបេះហូបពីដើម «មួយសេរី» ដោយមិនគិតថ្លៃបន្ថែមទៀតផង។
អ្នកមីង សំណាង ដែលជាម្ចាស់ចម្ការតាង៉ែន មានទីតាំងនៅ ជើងភ្នំគូលែន ចូលតាមច្រកផ្លូវវត្តស្គន់ ក្នុងភូមិស្គន់ ឃុំត្បែង ស្រុកបន្ទាយស្រី ខេត្តសៀមរាប បានថ្លែងប្រាប់សារព័ត៌មានកោះសន្តិភាពថ្ងៃទី ២០ ខែ មករា ឆ្នាំ២០២១ នេះថា ៖ «កាលពីម្សិលមិញ ខ្ញុំបានលក់អស់ ៣០០ គីឡូ និងភាគច្រើនអ្នកនៅក្នុងស្រុកសៀមរាបយើងនេះទេ។ ខ្ញុំដាំវាក្នុងចម្ការ ប្រើជីអាចជ៍គោ ជីអាចជ៍មាន់ និងស្រោចទឹកជាដើម មិនមានជាតិគីមីនោះទេ ព្រោះខ្ញុំចង់ឱ្យប្រជាជនយើងបរិភោគផ្លែឈើធម្មជាតិ និងជារបស់ខ្មែរយើងជាអ្នកដាំ គឺខ្ញុំគិតគូដល់សុខភាពបងប្អូនប្រជាជនយើងជាអាទិភាព។ រីឯតាង៉ែននេះទៀតសោត គឺអាចមានផ្លែលុះត្រាតែយើង មានការមើលថែរនឹងដាក់ជីជាប្រចាំ ហើយក្នុងមួយឆ្នាំវាអាចមានផ្លែតែម្តងទេ»។
សូមជម្រាបជូនផងដែរថា មីងសំណាង ក៏មានសេវាផ្ញើរតាង៉ែន ជូនអតិថិជនទៅគ្រប់ខេត្តក្រុងនានា ក្នុងប្រទេសកម្ពុជា ប៉ុន្តែទាល់តែបងប្អូនកម្ម៉ង់ចាប់ពី ២០ គីឡូឡើងទៅ។
តោះ! មកដឹងអំពីប្រវត្តិចម្ការតាង៉ែននេះទាំងអស់គ្នា!
ក្នុងការដាំដំណាំក្នុងចម្ការមីងសំណាង បច្ចុប្បន្នគាត់មានដី១៥ហិកតាសម្រាប់ធ្វើការដាំដុះផ្លែឈើ ដោយអ្នកមីងប្រើដីអស់ត្រឹមតែ ៩ហិកតាទេ ព្រោះ ៦ហិកតាទៀតខ្ញុំនឹងដាំបន្ត។ ក្នុងដី៩ហិកតា ខ្ញុំដាំតាង៉ែន៣ហិកតា ខ្នុរការ៉ុត៣ហិកតា និងដាំធុនរ៉េន ៣ហិកតាទៀត ដូចនេះអ្នកមីងសង្ឃឹមថាអាច ពង្រីកដាំផ្លែឈើទាំងនេះរហូតដល់ ១៥ ហិកតាបន្ថែមទៀត។ ដីនៅសល់មីងនឹងធ្វើបន្ត គ្រាន់តែឥឡូវមិនទាន់មានលទ្ធភាពដាំឱ្យគ្រប់ ទាល់តែមានថវិការគ្រប់ មីងនឹងដាំឱ្យអស់ដីតែម្តង។
មីង សំណាងបន្តទៀតថា៖ «ខ្ញុំចាប់ផ្តើមដាំដំបូងក្នុងឆ្នាំ ២០១៣ ដោយខ្ញុំបានប្រើដើមទុនទិញ ៤៥០ដើមពីប្រទេសថៃ ហើយក្នុងមួយដើម ៣ដុល្លារអាមេរិក កាលនោះខ្ញុំមិនទាន់មានដីច្រើនហិកតានោះទេ ដោយខ្ញុំដាំបណ្តើរ សន្សំលុយពង្រីកដីបណ្តើរ ហើយមិនទាន់ថាអាចរកប្រាក់ចំណេញបាននៅឡើយដែរ ព្រោះបន្តអាជីវកម្មរហូត មិនបានគិតរឿងប្រាក់ចំណេញទេ សំខាន់ខ្ញុំចង់ឱ្យមានផ្លែឈើធម្មជាតិសម្រាប់បងប្អូនបរិភោគ»។
បច្ចុប្បន្នមីងសំណាង មានកម្មករ ៨ នាក់ហើយ បើទោះបីពួកគាត់បានទទួលប្រាក់ចំណូលមិនច្រើនណាស់ណា ប៉ុន្តែរឿងបាយទឹក ថ្នាំសង្កូវផ្សេងៗ ការពិនិត្យសុខភាពអស់នឹង គឺមីងសំណាង គិតគូខ្លាំងណាស់ ព្រោះមីងមិនចង់ឱ្យបងប្អូនយើងធ្វើការចំណាកស្រុកនោះទេ។
អ្នកមីង សំណាង ក៏មានការលើកទឹកចិត្តដូចនេះថា ៖ «ខ្ញុំសូមលើកទឹកចិត្តនិងគាំទ្រ កូនខ្មែរទាំងឡាយដែលមានចិត្តចង់បង្ករបង្កើនផលឡើងវិញ ដាំហើយរក្សាគុណភាពដំណាំរបស់ខ្លួនឯងរៀងៗខ្លួន កុំជឿគេ កុំតាមគេ ដូចខ្ញុំ ខ្ញុំមិនតាមអ្នកណាគេទេ ខ្ញុំតាមគំនិតរបស់ខ្ញុំ ខ្ញុំដាំខូចខាត ខ្ញុំពិសោធន៍ គឺលើយើងខ្លួនឯង ។
រាល់ថ្ងៃខ្ញុំ សង្កេតលើប្រជាជនយើងជាមុនសិន ខ្ញុំមិនទាន់មើលទៅលើទីផ្សារនោះទេ ខ្ញុំគ្រាន់តែចង់ឱ្យប្រជាជនយើងបានបរិភោគរបស់គ្មានជាតិគីមី និងមានរសជាតិឆ្ងាញ់ ហើយអ្នកដែលបានញាហើយ ពួកគេអាចមកញុំាម្តងទៀតនៅឆ្នាំក្រោយ។ ហើយអ្នកដែលផលិតបានហើយ កុំបោះបង់ចោល ត្រូវតែដុសខាត់វាបន្តទៀត ធ្វើឱ្យល្អ បើទោះបីជួបឧបសគ្គកុំបាក់ទឹកចិត្ត យើងត្រូវរកមធ្យោបាយដោះស្រាយ»៕
ចែករំលែកព័តមាននេះ