ប្រទេសថៃ ៖ តុលាការថៃកាលពីថ្ងៃទី១៩ ខែមករា ឆ្នាំ២០២១ បានកាត់ទោសនារីម្នាក់អាយុ៦៥ឆ្នាំដាក់ពន្ធនាគារដល់ទៅ៤៣ឆ្នាំ ពីបទចែកចាយបណ្ដាសារដែលរិះគន់ប្រមាថព្រះមហាក្សត្រ តាមបណ្ដាញសង្គម។ នោះជាសេចក្ដីរាយការណ៍របស់មេធាវីម្នាក់របស់នារីរូបនោះ ដែលទោសនេះ គឺជាទោសធ្ងន់បំផុត ពុំធ្លាប់មានក្នុងប្រទេសចំពោះរឿងប្រមាថស្ដេច។
ការកាត់ទោសដ៏ធ្ងន់នេះ កើតមានក្នុងពេលដែលថៃ កំពុងជួបប្រទះនឹងបាតុកម្មជាប់រដឹក ទាមទារឲ្យនាយករដ្ឋមន្ត្រីលោកប្រាយុទ្ធ ចាន់អូចា លាលែងចេញពីតំណែង កែទម្រង់រដ្ឋធម្មនុញ្ញ និងកាត់បន្ថយអំណាចព្រះមហាក្សត្រ។ បាតុកម្មទាំងនោះ រហូតដល់ទាមទារឲ្យព្រះមហាក្សត្របោះបង់ចោលទ្រព្យសម្បត្តិដ៏មហាសាលទៀតផង។ ពីដើមរៀងមកទោសប្រមាថព្រះមហាក្សត្រគេឃើញមានយ៉ាងច្រើនត្រឺមដាក់គុក១៥ឆ្នាំប៉ុណ្ណោះ។
មេធាវីលោកស្រី PAWINEE CHUMSRI ថ្លែងប្រាប់រ៉យទ័រថា លោកស្រី ANCHAN PREELERT ទទួលការកាត់ទោសពីបទចោទប្រកាន់ដល់២៩ករណីផ្សេងៗពីគ្នា ទាក់ទិនការចែកចាយ និងចេញផ្សាយបណ្ដាវីដេអូ តាម YOUTUBE និង FACEBOOK រវាងឆ្នាំ២០១៤ និង២០១៥។
លោកស្រីដំបូងត្រូវកាត់ទោសដាក់គុកដល់៨៧ឆ្នាំ តែទោសនោះត្រូវបានសម្រាល ក្រោយពីលោកស្រីព្រមទទួលស្គាល់កំហុស។ មេធាវីអះអាងថា កូនក្ដីរបស់គាត់អាចតវ៉ាទៅសាលាឧទ្ធរណ៍ចំពោះការកាត់ទោសនេះ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ