រាជធានីភ្នំពេញ ៖ មានការភ្ញាក់ផ្អើលមួយបានកើតឡើង បន្ទាប់ពីមានព័ត៌មានមួយផ្ដល់ជូននគរបាលខណ្ឌដង្កោថា មានអគ្គិភ័យឆាបឆេះផ្ទះ និងរោងចក្រ ហើយដំណឹងនេះក៏មិនច្បាស់លាស់ថា កើតឡើងនៅកន្លែងណាទៀតផង។ ប៉ុន្តែក្រោយពីទទួលព័ត៌មាននេះភ្លាម កម្លាំងនគរបាលបានចេញរថយន្តពន្លត់អគ្គិភ័យដែលប្រចាំការនៅសាលាខណ្ឌដង្កោភ្លាមៗនិងតាមរកទីតាំងដែរថា មានភ្លើងឆេះនោះពីកន្លែងមួយទៅកន្លែងមួយ។
មិនតែប៉ុណ្ណោះ ក៏បានឲ្យតាមបណ្ដាប៉ុស្តិ៍រដ្ឋបាលមួយចំនួនជួយឆែកមើលផងដែរ ហើយទីបំផុតក៏បានរកឃើញទីតាំងដែលមានភ្លើងឆេះ តែពុំមែនឆេះផ្ទះ ឬរោងចក្រនោះទេ គឺឆេះស្មៅនៅក្នុងទីតាំងពុះដីឡូតិ៍មួយកន្លែងទៅវិញ។ ហេតុការណ៍នេះបានកើតឡើងកាលពីម៉ោង១១ព្រឹក ថ្ងៃទី១៩ ខែមករា ឆ្នាំ២០២១ ស្ថិតនៅក្នុងភូមិព្រៃវែងខាងកើត សង្កាត់ព្រៃវែង ខណ្ឌដង្កោ រាជធានីភ្នំពេញ។
តាមប្រភពព័ត៌មានបានឲ្យខឹងថា នៅមុនពេលកើតហេតុ មានអ្នកផ្ដល់ព័ត៌មានទៅកាន់នគរបាលខណ្ឌដង្កោថា មានអគ្គិភ័យកំពុងឆាបឆេះផ្ទះ និងរោងចក្រ ប៉ុន្តែពុំបានប្រាប់ឲ្យច្បាស់ថា ឆេះនៅកន្លែងណាទេ ដោយម្ដងថា ឆេះនៅម្ដុំជិតស្ពានព្រែកជ្រៃ សង្កាត់ស្ពានថ្ម និងម្ដងទៀតថា ឆេះនៅសង្កាត់ព្រែកកំពឹស និងសង្កាត់ព្រៃស ជាដើម។ ពេលនោះនគរបាលបាននាំយករថយន្តពន្លត់អគ្គិភ័យដែលប្រចាំការនៅសាលាខណ្ឌដង្កោ ចេញដើររកគោលដៅដែលត្រូវភ្លើងឆេះនោះពីកន្លែងមួយទៅកន្លែងមួយ ចំណែកឯតាមបណ្ដាប៉ុស្តិ៍រដ្ឋបាលមួយចំនួនជួយរកមើលផងដែរ។
ប្រភពដដែលបានបន្តថា ក្រោយមកទើបរកឃើញទីតាំងដែលត្រូវភ្លើងឆេះពិតប្រាកដ គឺស្ថិតនៅក្នុងបុរីផ្ទះល្វែងមួយកន្លែង ដែលទើបតែចាក់ដីចាប់ផ្ដើមសាងសង់ ហើយពុំមែនឆេះផ្ទះ ឬរោងចក្រអ្វីនោះទេ គឺភ្លើងឆេះស្មៅលើផ្ទៃដីដែលពុំទាន់ចាក់ដីបំពេញរួចតែប៉ុណ្ណោះ។ម្យ៉ាងទៀត ពុំមានការព្រួយបារម្ភខ្លាចឆាបឆេះដល់ផ្ទះសម្បែងអ្នកដទៃនោះឡើយ ព្រោះថា ទីតាំងមួយនេះស្ថិតនៅដាច់ឆ្ងាយពីភូមិឋានអ្នកស្រុក។
ប្រភពដដែលបន្តទៀតថា បន្ទាប់មករថយន្តពន្លត់អគ្គិភ័យ ក៏បានធ្វើសកម្មភាពបាញ់ពន្លត់ ប៉ុន្តែជួបការលំបាកបន្តិច ព្រោះតែរថយន្តពន្លត់អគ្គិភ័យមិនអាចបើកចូលទៅជិតបានឡើយ ដោយសារតែភ្លើងឆេះរាងមុខធំ ដូច្នេះទាល់តែប្រើប្រាស់ទុយោវែងមែនទែន ទើបអាចបាញ់ទឹកពន្លត់កើត៕
ចែករំលែកព័តមាននេះ