រាជធានីភ្នំពេញ ៖ បឹងតាមោកហៅបឹងកប់ស្រូវ អាចនឹងបាត់រូបរាងនៅពេលអនាគតដោយសារក្លាយជាតំបន់អភិវឌ្ឍន៍ជាបណ្តើរៗ ដែលផ្នែកមួយចំនួនត្រូវបានក្រុមហុ៊នឯកជន និងរដ្ឋចាក់ដីលុប បន្ទាប់ពីទទួលបាន ស.ជ.ណ របស់រាជរដ្ឋាភិបាលកម្ពុជា ប្រគល់ឲ្យដើម្បីអភិវឌ្ឍន៍ ។ រីឯផ្នែកមួយចំនួនទៀត ត្រូវបានរំលោភយកដោយអ្នកមានអំណាច យកមកធ្វើជាកម្មសិទ្ធិផ្ទាល់ខ្លួន ព្រោះតែដីនៅតំបន់នោះកំពុងមានហាងឆេងខ្ពស់ ទោះបីត្រូវចាក់ដីលុបក្តី។
បឹងតាមោកហៅបឹងកប់ស្រូវ ជាបឹងធម្មជាតិមួយលាតសន្ធឹងក្នុងទំហំជិត៤ពាន់ហិតតា មានព្រំប្រទល់ខាងត្បូងជាប់មហាវិថីឈ្នះ ឈ្នះ ក្នុងសង្កាត់គោករកា ខាងលិចជាប់សង្កាត់ពន្សាំងផ្នែកខាងជើងជាប់ផ្លូវលេខ១៥១ សង្កាត់ពញាពន់ និងផ្នែកខាងកើតជាប់នឹងសង្កាត់សំរោងនិងសង្កាត់ព្រែកព្នៅ ក្នុងខណ្ឌព្រែកព្នៅ រាជធានីភ្នំពេញ ។
នៅកំឡុងឆ្នាំ២០១០ គេនៅចាំបានថា រាជរដ្ឋាភិបាលកម្ពុជាបានប្រគល់ចំណែកបឹងដ៏តូចមួយនៅក្នុងសង្កាត់ព្រែកព្នៅ ដើម្បីឲ្យក្រុមហ៊ុន មួយធ្វើការអភិវឌ្ឍន៍ជាកន្លែងលំហែកាយគឺ«តំបន់ឡុង ឈិន» ។ លុះក្រោយមក រដ្ឋមន្ត្រីក្រសួងធនធានទឹកនិងឧតុនិយម ឯកឧត្តម លឹមគានហោ បានដឹកនាំកម្លាំងវាយកម្ទេចចោល ដោយចោទថាជាការរំលោភយកដីបឹងកប់ស្រូវ ។
ទោះបីជាយ៉ាងណា ផ្ទៃបឹងមួយផ្នែកនៅអតីត«តំបន់ឡុង ឈិន»នោះមិនបានរក្សាឲ្យនៅគង់វង្សទុកជាសម្បត្តិរដ្ឋនោះទេ ហើយបច្ចុប្បន្ន ក៏បានក្លាយទៅជាកម្មសិទ្ធិរបស់អ្នក
មានអំណាចខ្លះដែលមួយភាគធំសុទ្ធសឹងជាឧត្តមសេនីយ៍យោធារំលោភយកធ្វើជាកម្មសិទ្ធិដោយធ្វើជាភូមិគ្រឹះ(ផ្ទះវីឡា)អស់ទៅហើយ គីស្របខាងលិចផ្លូវ និងស្ពានឡុង ឈិន នោះចាប់ពីកែងមហាវិថីឈ្នះ ឈ្នះ រហូតដល់ផ្លូវលេខ១៥១ ។ ត្រូវបានមហាជននិយាយថា មិនខុសពីបង្ខំយកពីក្អែក ចែកឱ្យតាវ៉ៅឡើយ…ហេ ! ហេ !
តាមមន្ត្រីអាជ្ញាធរបានទម្លាយឲ្យដឹងថាអតីត«តំបន់ឡុង ឈិន»តែមួយផ្នែកតូច ប៉ុណ្ណោះបានក្លាយជាកម្មសិទ្ធិរបស់រដ្ឋនៅពេលនេះ ហើយការកាយដីដែលចាក់លុបបឹងកប់
ស្រូវនោះ ហាក់ដូចជាកាយចេញតិចតួចណាស់ ឯក្រៅពីនោះធ្លាក់ទៅលើដៃឯកជនរំ
លោភយកអស់ហើយ។ នៅកំឡុងឆ្នាំ២០១៥ រាជរដ្ឋាភិបាលមានគម្រោងអភិវឌ្ឍន៍បឹងតាមោកហៅបឹងកប់ស្រូវ ដោយទុកពាក់កណ្តាលធ្វើជាអាងស្តុកទឹក និងពាក់កណ្តាលធ្វើការអភិវឌ្ឍ ។ ទន្ទឹមនោះ សាលារាជធានីភ្នំពេញក៏បានចាក់ដីធ្វើផ្លូវ៦០ម៉ែត្រពុះចែកផ្ទៃបឹងជាពីរផងដែរ ។
ដោយសារតែគម្រោងនេះ ធ្វើឲ្យតម្លៃដីនៅជុំវិញបឹងតាមោកហក់ឡើងខ្ពស់ ហើយឈ្មួញនិងអ្នកមានអំណាច ខ្លះអ្នកមានលុយ ទន្ទ្រានកាន់កាប់ផ្ទៃបឹងតាមោក តាមរយៈការទិញពីប្រជាពលរដ្ឋដែលអាស្រ័យផល ហើយវាតទីបោះបង្គោលលក់បឹងតៗគ្នា ដោយពុំមានការដឹងឮពីអាជ្ញាធរឡើយ ។ ស្របពេលនោះដែរ ផ្ទៃបឹងប្រមាណ២០ហិតតា ត្រូវបានរាជរដ្ឋាភិបាលប្រគល់ឲ្យក្រុលហ៊ុនមួយ ដើម្បីអភិវឌ្ឍន៍ធ្វើជាផ្សារបន្លែ ក្នុងវត្ថុបំណងយកផ្សារបន្លែនៅផ្សារដើមគមកដាក់នៅទីតាំងនេះ តែគម្រោងនោះកំពុងតែអភិវឌ្ឍន៍មិនទាន់រួចរាល់នៅឡើយទេ ។
ក្រៅពីនោះ ក៏បានប្រគល់ឲ្យទៅក្រុមហ៊ុនមួយចំនួន និងក្រសួង មន្ទីរ អង្គភាពរដ្ឋមួយចំនួនធ្វើការអភិវឌ្ឍ ។ ទោះបីជាយ៉ាងណាគេពុំដឹងពីទំហំផ្ទៃដីដែលត្រូវអភិវឌ្ឍន៍ពិតប្រាកដឡើយ ។ ដោយឡែក ដីបឹងចំនួន២០ហិកតាត្រូវបានរាជរដ្ឋាភិបាលដកហូតពីលោក លន់ ហាក់ និងលោក ឈុន ចាន់ធី ត្រឡប់មកវិញកាលពីពេលថ្មីៗនេះ បន្ថែមពីលើការដកហូតមុននេះចំនួន៣០ហិកតា ។
ការសម្រេចនេះ គឺធ្វើឡើងតាមអនុក្រឹត្យមួយកាលពីថ្ងៃទី១៣ ខែមករា ឆ្នាំ ២០២១ ដើម្បីទុកជាសម្បត្តិរដ្ឋវិញ ។ ដីនោះជាថ្នូរនឹងការដោះដូរសាងសង់អាគារកម្ពស់៣ជាន់ និងបំពាក់គ្រឿងបរិក្ខារ ស្ថិតនៅក្នុងសង្កាត់ស្រះចក ខណ្ឌដូនពេញ ។
ដោយចង់ដឹងពីស្ថានភាពបឹងតាមោក រយៈពេល២ថ្ងៃគីព្រឹកថ្ងៃទី១៤និងទី១៥ ខែមករា ឆ្នាំ ២០២១ កោះសន្តិភាពក៏បានចុះទៅផ្ទាល់នៅជុំវិញបឹង និងសង្កេតឃើញបឹងទាំងមូលបានរងការបំពានយ៉ាងខ្លាំង ដែលជាហេតុធ្វើឲ្យបឹងតាមោកកាន់តែរួមតូចទៅៗ មើលទៅដូចអត់មានសល់ទេ ។ តាមព័ត៌មានឲ្យដឹងថា ក្នុងរយៈពេលប៉ុន្មានខែចុងក្រោយនេះ ផ្ទៃបឹងនៅផ្នែកឦសានបានត្រូវប្រជាពលរដ្ឋនាំគ្នាបោះបង្គោលកាន់កាប់ដោយធ្វើជាស៊ងចិញ្ចឹមត្រីពេញផ្ទៃទឹកលាតសន្ធឹងរហូតទៅដល់ផ្លូវថ្មី ដែលចាក់ពុះផ្ទៃបឹងជា២នោះ ។
ដោយឡែក អតីត«តំបន់ឡុង ឈិន»កោះសន្តិភាពមិនបានលើកមកបង្ហាញទេ ព្រោះ
ត្រូវបានកាន់កាប់អស់ទៅហើយ និងមិនដឹងថាជាការកាន់កាប់ដោយស្របច្បាប់ឬក៏
បែបណានោះទេ ។ កោះសន្តិភាពនៅចាំបានថា កាលពីពេលវាយកម្ទេចទីក្រុង ឡុង ឈិន របស់ថៅកែជាជនជាតិចិន បានចាត់ទុកថា ដើម្បីកាយយកដីដែលលុបបឹងកប់ស្រូវសង្គ្រោះការជន់លិចរាជធានីភ្នំពេញ ។
ភូមិគ្រឹះប្រណីតៗជាច្រើន ត្រូវបានវាយកម្ទេចចោលគួរឲ្យសោកស្តាយ ។ ចំណែក ស្របតាមមហាវិថីឈ្នះ ឈ្នះ ត្រូវបានគេចាក់ដីលុបចូលផ្ទៃបឹង លាតសន្ទឹងចាប់ពីដងផ្លូវប្រមាណកន្លះគីឡូម៉ែត្រ និងកំពុងតែចាក់ដីលុបជាបន្តទៀតទាំងយប់ទាំងថ្ងៃ ។
នៅតាមដងផ្លូវនេះ គម្រោងផ្សារបន្លែប្រមាណ២០ហិតតា ក៏កំពុងសាងសង់ដែរ ។ ឯនៅខាងលិចគម្រោងផ្សារបន្លែ ស្របតាមផ្លូវចូលពុះចែកផ្ទៃបឹង គេឃើញរណ្តៅដ៏សែនធំមួយរបស់ឧកញ៉ា ញឹក ផន ហៅតាកៅ ថៅកែរណ្តៅដីដែលលាតសន្ធឹងរាប់រយហិកតា កំពុងតែដំណើរការជីកយកអាចម៍ដីយ៉ាងគគ្រឹកគគ្រេងជម្រៅរហូតចង់ហួសក្បាលប្រេតហើយនៅតែមិនឈប់ ព្រោះត្រូវការអាចម៍ដីដឹកយកមកចាក់លុបផ្ទៃបឹងតាមោក និងតំបន់មួយចំនួនទៀតនៅក្នុងរាជធានីភ្នំពេញភាគខាងជើង ។
ក្រៅពីនោះ មានទំនប់ព័ទ្ធយកដីបឹងទុកបន្តទៀតរាប់រយហិកតាផងដែរ ។ បើក្រឡេកមើលនៅផ្នែកខាងលិចនៃបឹងវិញ គេឃើញនៅលើផ្ទៃបឹងដែលមានទឹកពណ៌បៃតងដោយសារតែទឹកស្អុយហូរចូលរាល់ថ្ងៃនោះ សុទ្ធតែបង្គោលនិងស៊ងចិញ្ចឹមត្រី តែមិនមានត្រីទេ គឺគេធ្វើដើម្បីយកដីបឹងនោះ ដែលសុទ្ធតែអ្នកមានអំណាចបោះរំលោភយក ក្នុងនោះក៏មានបង្គោលដែលរដ្ឋកំណត់ព្រំដីដែលទទួលបានសិទ្ធិពីរាជរដ្ឋាភិបាលប្រគល់ឲ្យអភិវឌ្ឍន៍ផងដែរ លាយឡំគ្នាដូចបាយបិណ្ឌជាបាយបាត្រ ។
នៅផ្នែកខាងលិច ក្នុងភូមិកោះរង៉ាង សង្កាត់ពន្សាំង គេឃើញរណ្តៅដីដ៏ធំមួយទៀតរបស់ឈ្មោះ ធា ដែលអះអាងថា រូបគេជាកូនប្រសារដ្ឋមន្ត្រីមួយរូប ។ តាមអ្នកមើលការឲ្យដីឧកញ៉ាម្នាក់ ប្រាប់ថាឈ្មោះ ធា នោះបានប្រមូលទិញដីបឹងពីប្រជាពលរដ្ឋអាស្រ័យផល ហើយបានជីកយកអាចម៍ដីទៅចាក់ឲ្យក្រុមហ៊ុនសាងសង់ផ្ទះល្វែងដ៏ធំមួយនៅមុខវត្តភ្នៀត ។
នៅក្នុងការជីកយកដីបឹងនេះ ត្រូវបានគេអះអាងថា បានជាន់លើដីបឹងដែលប្រមុខរាជ
រដ្ឋាភិបាលប្រគល់ឲ្យទៅក្រសួងការពារជាតិមួយផ្នែកផងដែរ ។ តាមអ្នកមើលការរូបនោះបានឲ្យដឹងទៀតថា ផ្ទៃបឹងជិត៤ពាន់ហិកតាដែលជាដីសាធារណៈរបស់រដ្ឋ កំពុងត្រូវបានឈ្មួញនិងអ្នកមានអំណាច មានទ្រព្យសម្បត្តិស្តុកស្តម្ភដែលជាជើងខ្លាំង អ្នកណាខ្លាំងអ្នកហ្នុងឈ្នះអ្នកណាទៅដល់មុន…ឈ្នះរំលោភយកអស់ហើយ ក្រោមរូបភាពប្រមូលទិញពីប្រជាពលរដ្ឋដែលអាស្រ័យផល ។
ក្រៅពីនេះក៏មានដីបឹងជារបស់ក្រុមហ៊ុន ក្រសួង និងអង្គភាពរដ្ឋ ដែលទទួលបានសិទ្ធិពីរាជរដ្ឋាភិបាលក្នុងការអភិវឌ្ឍន៍លាយឡំផងដែរ ។ ដោយឡែក មួយផ្នែកទៀត នៅភាគពាយ័ព្យ ផ្ទៃបឹងក៏ត្រូវបានគេបោះបង្គោល និងចាក់ដីរំលោភយកដូចគ្នាដែរ ។
ចំណែកនៅខាងជើង ដែលជាប់នឹងផ្លូវលេខ១៥១ក៏ដូចគ្នា ។ អនាគតទៅ ការដណ្តើមកាន់កាប់ចាក់គ្នា មិនដឹងយ៉ាងណាយ៉ាងណីទេ បើតែយ៉ាងហ្នឹង ។ទោះជាយ៉ាងណា ជុំវិញការអភិឌ្ឍនិងការរំលោភផ្ទៃបឹងតាមោកនេះ កោះសន្តិភាពពុំទទួលបានការបំភ្លឺណាមួយពីអាជ្ញាធរខណ្ឌព្រែកព្នៅជាម្ចាស់ស្រុកនៅឡើយទេ ព្រោះការសាកសួរចំឈ្មោះបឹងតាមោកគឺម្នាក់ៗរុញដាក់គ្នាដោយមិនហ៊ានធ្វើការបំភ្លឺឡើយ ។
ឱ ! វាសនាបឹងតាមោកអើយ…អនាគតទៅ មិនដឹងថា អ្នកណាខ្លះក្លាយជាអ្នកមានបាន…ក្លាយជាសេដ្ឋី…ក្លាយជាអ្នកទោស ពិតប្រាកដនៅឡើយទេ…សង្ស័យអ្នកខ្លាំងប្រាកដជាឈ្នះ…ហេ ! ហេ ! ម៉េង ធា
ចែករំលែកព័តមាននេះ