រាជធានីភ្នំពេញ ៖ កីឡាករវ័យក្មេង សុខ លឹមហេង បានបង្ហាញមោទនភាពចំពោះខ្លួនឯងដែលនៅតែរក្សាបានជ័យជម្នះ សម្រាប់ការប្រកួតអុកចត្រង្គ បន្ទាប់ពីរូបគេបានបន្តឈ្នះតំណែងជើងឯក នៅក្នុងការប្រកួតអុកចត្រង្គជ្រើសរើសជើងឯកថ្នាក់ជាតិប្រចាំឆ្នាំ២០២០ កាលពីថ្ងៃទី៧…
រាជធានីភ្នំពេញ ៖ កីឡាករវ័យក្មេង សុខ លឹមហេង បានបង្ហាញមោទនភាពចំពោះខ្លួនឯងដែលនៅតែរក្សាបានជ័យជម្នះ សម្រាប់ការប្រកួតអុកចត្រង្គ បន្ទាប់ពីរូបគេបានបន្តឈ្នះតំណែងជើងឯក នៅក្នុងការប្រកួតអុកចត្រង្គជ្រើសរើសជើងឯកថ្នាក់ជាតិប្រចាំឆ្នាំ២០២០ កាលពីថ្ងៃទី៧ មករា នៅក្លិបសេះខៀវ រាជធានីភ្នំពេញ។
កីឡាករដែលទើបមានអាយុ ២១ ឆ្នាំ សុខ លឹមហេង បានប្រាប់អ្នកសារព័ត៌មាន នៅក្រោយបញ្ចប់ការប្រកួតថា៖ «នៅក្នុងការប្រកួតចំនួន ៦ ព្រឹត្តិការណ៍ជាប់ៗគ្នា ក្នុងរយៈពេល ២ ឆ្នាំនេះ គឺគិតមកដល់ពេលនេះ នៅមិនទាន់មានអ្នកណាដណ្តើមបានជយលាភីជើងឯកពីខ្ញុំនៅឡើយទេ។
ទោះបីជាយ៉ាងណា កីឡាករមាន ដើម កំណើត នៅភ្នំពេញ សុខ លឹមហេង បានបន្ថែមថា៖ «ខ្ញុំមិនអាចថា ខ្លួនខ្ញុំខ្លាំងជាងគេទេ ព្រោះអាចមានជើងខ្លាំងមួយចំនួនទៀត មិនទាន់ចេញមុខ ហើយការប្រកួតអាចចាញ់ ឬឈ្នះ អាស្រ័យលើការគិតបានលឿន និងយុទ្ធសាស្ត្រលាក់ល្បិច មិនឲ្យដៃគូចាប់បាន»។
អ្នកលេងអុកវ័យក្មេងមកពីក្លិបសេះខៀវ និងជានិស្សិតសាកលវិទ្យាល័យវ៉ាន់ដាគណនេយ្យឆ្នាំទី៤ រួបនេះ បានឈ្នះជើងចាស់ជាច្រើនរូប ដើម្បីទទួលបានលេខ ១ ចំនួន ៦ ព្រឹត្តិការណ៍មកហើយ ហើយអ្វីដែលគួរកត់សម្គាល់ គឺនៅក្នុងស្រុកខ្មែរ មិនទាន់មានជើងខ្លាំងណាមួយប្រជែងយកឈ្នះរូបគេបានឡើយ។
តាមប្រវត្តិនៃភាពជោគជ័យរបស់ សុខ លឹមហេង គឺទី១ គេបានឈ្នះតំណែងស្តេចអុកនៅអង្គរសង្ក្រាន្ដ ខេត្តសៀមរាប កាលពីឆ្នាំ ២០១៨ ទី២ ឈ្នះពានរង្វាន់អុកចត្រង្គរបស់សហព័ន្ធអុកចត្រង្គកម្ពុជា កាលពីចុងខែតុលា ឆ្នាំ ២០១៩ ទី៣ ឈ្នះតំណែងជើងឯកអុកចត្រង្គប្រចាំឆ្នាំ ២០១៩ ទី៤ ឈ្នះតំណែងជើងឯកបុណ្យទន្លេ នៅកំពង់ឆ្នាំងឆ្នាំ ២០១៩ ទី៥ ឈ្នះជើងឯកព្រឹត្តិការណ៍អបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែអកអំបុក កាលពីថ្ងៃទី ១២ ខែ វិច្ឆិកា ឆ្នាំ ២០១៩ និងបន្តឈ្នះជើងឯកថ្នាក់ជាតិកាលពីថ្ងៃទី៧ មករា ឆ្នាំ២០២០។ម្ចាស់ជើងឯកកីឡាអុកចត្រង្គ សុខ លឹមហេងក៏បានបង្ហាញពីមហិច្ឆតារបស់ខ្លួនចង់ឱ្យកីឡាករខ្មែរឈានទៅដណ្ដើមយកមេដាយមាសពីការប្រកួតកីឡាស៊ីហ្គេមលើកទី៣២ឆ្នាំ២០២៣ផងដែរ។
សុខ លឹមហេង បានរៀបរាប់ពីប្រវត្តិលេងអុករបស់ខ្លួនថា តាមពិតលោកចូលចិត្តមើលគេលេងអុកចត្រង្គខ្មែរតាំងពីនៅតូចៗម៉្លេះរហូតដល់អាយុប្រហែលជា១០ឆ្នាំ លោកចេះលេង
អុកបាត់ទៅហើយប៉ុន្តែមិនសូវជាពូកែនោះទេ ។
ពេលទំនេរពីការរៀនសូត្រ លោកលេងជាមួយមិត្តភក្តិជួនចាញ់ជួនឈ្នះ ព្រោះវាគ្រាន់តែជា
ការលេងកម្សាន្តប៉ុណ្ណោះ។ លុះចូលមកដល់ឆ្នាំ២០១៧ លោកក៏បានដាក់ពាក្យប្រកួតជ្រើសរើសជើងឯកថ្នាក់ជាតិ ប៉ុន្តែគួរឱ្យស្ដាយលោកបានធ្លាក់នៅក្នុងវគ្គជម្រុះ១៦នាក់។ទោះជាបែបនេះក្ដីលោកនៅតែមិនបោះបង់ក្ដីស្រមៃក្នុងការក្លាយជាម្ចាស់ជើងឯកបានឡើយ ។
ឈានចូលមកដល់ឆ្នាំ២០១៨ លោកបានដាក់ពាក្យប្រកួតជាលើកទី២ប៉ុន្តែសម្រាប់ការដាក់ពាក្យប្រកួតលើកនេះគឺត្រូវបានគណៈកម្មការរៀបចំការប្រកួតលើកយកទៅធ្វើនៅក្នុងកម្មវិធីអង្គរសង្ក្រាន នៅឯខេត្តសៀមរាប។
ក្នុងចំណោមកីឡាករទាំង៨រូបដែលមានឈ្មោះទៅប្រកួតនៅវគ្គផ្ដាច់ព្រ័ត្រនោះក៏មានរូបលោកម្នាក់ដែរ ។ អ្វីដែលធ្វើឱ្យលោកបារម្ភនោះគឺលោកត្រូវជួបជាមួយស្ដេចអុក២ជំនាន់ឈាវ បូរ៉ា នៅវគ្គផ្ដាច់ព្រ័ត្រចុងក្រោយ ប៉ុន្តែលោកបានតាំងចិត្តតាំងអារម្មណ៍ថាត្រូវយកឈ្នះឱ្យបាន ទីបំផុតទោះបីជាការប្រកួតមានភាពតឹងតែងខ្លាំងបន្តិចមែន តែលោកនៅតែអាចសម្រចបាននូវក្ដីស្រមៃរបស់ខ្លួនយ៉ាងពិតប្រាកដ ដោយលោកបានក្លាយជាម្ចាស់ពានរង្វាន់អង្គរសង្ក្រានឆ្នាំ២០១៨ និងបន្តឈ្នះតំណែងជើងឯកអុកចត្រង្គប្រចាំឆ្នាំ២០១៩ ។
ចូលមកដល់ឆ្នាំ២០២០ លោកក៏បានដាក់ពាក្យប្រកួតជ្រើសរើសជើងឯកថ្នាក់ជាតិម្ដងទៀត ។ លោកបានឆ្លងកាត់ពីរវគ្គប្រកួតជម្រុះឡើងមកដល់វគ្គផ្ដាច់ព្រ័ត្រត្រូវប៉ះកីឡាករឈាវ បូរ៉ា ម្ដងទៀត។ ប៉ុន្តែការប្រកួតលើកនេះមិនសូវតឹងតែងដូចលើកមុននោះទេព្រោះអីលោកបាន
ស្គាល់ពីល្បិចប្រកួតរបស់អតីតស្ដេចអុក២ជំនាន់រូបនេះខ្លះទៅហើយ ។ ទីបំផុតលោកបានក្លាយជាម្ចាស់ពានរង្វាន់ជើងឯកថ្នាក់ជាតិឆ្នាំ២០២០ទាល់តែបាន ។
ជាចុងក្រោយ ម្ចាស់ជើងឯកថ្នាក់ជាតិកីឡាអុកចត្រង្គឆ្នាំ២០២០ សុខ លឹមហេង បានប្រាប់កោះសន្តិភាពថា សម្រាប់ការប្រកួតឆ្នាំក្រោយៗទៀត លោកមិនប្រាកដថានឹងអាចគ្រោងតំណែងជាម្ចាស់ពានរង្វាន់ដូចលើកនេះទៀតឬក៏អត់ទេ ដោយសារតែលោកគិតថា ធនធានកីឡាអុករបស់ខ្មែរយើងគឺមានច្រើន ដូច្នេះបើសិនជាលោកចាញ់ការប្រកួតលើកក្រោយ លោកនឹងទទួលយកដោយភាពសប្បាយរីករាយ។ លោកក៏ចង់ឃើញកូនខ្មែរឈានទៅប្រកួតដណ្ដើមយកមេដាយមាសពីព្រឹត្តិការណ៍កីឡាស៊ីហ្គេមផងដែរ ៕
ចែករំលែកព័តមាននេះ