ខេត្តកំពង់ចាម៖ ផ្លូវដីក្រាលក្រួសក្រហម ដែលមានទីតាំងស្ថិតនៅក្រោយវត្តនគរបាជ័យ ឆ្ពោះទៅឃុំក្រឡា មានចម្ងាយជិត ១០គីឡូម៉ែត្រ នៅក្នុងឃុំអំពិល ស្រុកកំពង់សៀម ជាផ្លូវដែលបែកភក់ នៅរដូវវស្សា និងហុយនៅរដូវប្រាំង។ ប៉ុន្តែដោយមានការគិតគូរខ្ពស់ពីអាជ្ញាធរខេត្ត ផ្លូវនេះ នឹងត្រូវសាងសង់ក្នុងពេលឆាប់ៗ ជាផ្លូវក្រាលកៅស៊ូ ដើម្បីបង្កលក្ខណៈងាយស្រួលដល់ប្រជាកសិករដឹកកសិផល និងធ្វើដំណើរដោយងាយស្រួល។
លោក រ័ត្ន គឹមហៃ មេឃុំអំពិល មានប្រសាសន៍ កាលពីព្រឹកថ្ងៃទី១៨ ខែមករា ឆ្នាំ២០២១ ថា លោក អ៊ុន ចាន់ដា អភិបាលខេត្ត បានយកចិត្តទុកដាក់គិតគូរខ្ពស់ពីហេដ្ឋារចនាសម្ព័ន្ធនានា នៅក្នុងស្រុកកំពុងសៀម ដោយកន្លងមក ក្នុងឃុំអំពិល លោកអភិបាលខេត្ត បានជួយស្ថាបនាផ្លូវបេតុងចំនួន ២ ខ្សែ មានប្រវែង ២.២៣០ម៉ែត្រ ក្នុងអំឡុងឆ្នាំ២០១៩ ។ បន្ទាប់មកទៀត លោកបានជួយស្ថាបនាផ្លូវបេតុង ជុំវិញប្រាសាទនគរបាជ័យ មានប្រវែង១.៧០០ ម៉ែត្រ ព្រមទាំងដាំដើមក្ងោកលំអតាមដងផ្លូវ។ ដោយឡែក ផ្លូវក្រាលកៅស៊ូមួយខ្សែ ចាប់ពីហង្ស នៅជើងភ្នំប្រុសភ្នំស្រី រហូតដល់ព្រលានយន្តហោះ ក៏កំពុងតែដំណើរការសាងសង់ បានប្រមាណ ៦០% ហើយ។
លោកមេឃុំអំពិល មានប្រសាសន៍បន្តថា កាលពីរសៀលថ្ងៃទី១៥ មករា ឆ្នាំ២០២១ លោកអភិបាលខេត្ត បានដឹកនាំមន្ត្រីជំនាញ និងអាជ្ញាធរស្រុកកំពង់សៀម អញ្ជើញចុះពិនិត្យគម្រោងផ្លូវកៅស៊ូ ប្រភេទ DBST ០១ខ្សែប្រវែង ៨.០០០ ម៉ែត្រ ចាប់ពីក្រោយវត្តនគរបាជ័យ ក្នុងឃុំអំពិល ស្រុកកំពង់សៀម ដោយឆ្លងកាត់ភូមិចំនួន០៥ គឺភូមិរលាក បន្ទាយថ្ម រមាស ស្យា និងអំពិលលើ ដែលគ្រោងនឹងដំណើរការស្ថាបនាក្នុងពេលឆាប់ៗ ខាងមុខនេះហើយ។
លោកមេឃុំ បន្តថា សមិទ្ធិផលទាំងនេះ បង្ហាញឲ្យឃើញថាអាជ្ញាធរខេត្ត ពិតជាបានយកចិត្តទុកដាក់ ក្នុងការអភិវឌ្ឍនូវហេដ្ឋារចនាសម្ព័ន្ធ ពិសេសផ្លូវកៅស៊ូ ផ្លូវបេតុង នៅជុំវិញក្រវាត់ក្រុងកំពង់ចាម គឺកាន់តែធ្វើឱ្យប្រជាពលរដ្ឋងាយស្រួល ក្នុងការធ្វើដំណើរទៅវិញទៅមក ដោយឆាប់រហ័ស។
លោកតា ចាន់ សៀងហ៊ី អាយុ ៧៥ឆ្នាំ នៅភូមិរមាស ឃុំអំពិល ស្រុកកំពង់សៀម មានប្រសាសន៍ថា ចាប់តាំងពីក្រោយឆ្នាំ១៩៧៩ គាត់បានមករស់នៅក្នុងភូមិនេះ ដែលកាលនោះ ផ្លូវនៅមុខផ្ទះ គឺជាប្រភេទផ្លូវដី តូចចង្អៀត សូម្បីតែកង់ ម៉ូតូ ក៏ពិបាកជិះនៅក្នុងរដូវវស្សាត្រូវបែកភក់ ជួនជិះរអិលដួល ក៏មានដែរ។ ក្រោយមក អាជ្ញាធរបានពង្រីកផ្លូវ ក្រាលគ្រួសក្រហម ដែលមានទទឹងប្រមា ណ៥ម៉ែត្រ គឺបានជួយសម្រួល ក្នុងការធ្វើដំណើរទៅវិញទៅមក បានមួយកម្រិត។
នៅដើមឆ្នាំ ២០២១ លោកតាបានទទួលដំណឹងថា លោកអភិបាលខេត្ត បានគិតគូរ យកចិត្តទុកដាក់ ដោយជួយស្ថាបនាផ្លូវក្រាលកៅស៊ូមួយខ្សែ ចាប់ពីក្រោយវត្តនគរបាជ័យ រហូតទៅដល់វិហារធំ ក្នុងឃុំក្រឡា ស្រុកកំពង់សៀម មានចម្ងាយប្រមាណជិត ១០ គីឡូម៉ែត្រ គឺគាត់ក៏ដូចជាអ្នកភូមិផ្សេងទៀត រីករាយ និងសាទរសមិទ្ធិផល ដែលទទួលបាន នឹងលេចរូបរាងក្នុងពេលខាងមុខ។
ពេលដែលបានផ្លូវងាយស្រួលហើយនោះ លោកតា សូមឲ្យអ្នកដែលមានមធ្យោបាយយានយន្តគ្រប់ប្រភេទ ធ្វើដំណើរទៅវិញទៅមក ដោយគោរពច្បាប់ចរាចរណ៍៕ ដោយ៖ ចាន់ ថេត
ចែករំលែកព័តមាននេះ