ខេត្តស្ទឹងត្រែង៖ ទណ្ឌិតប្រមាណ៨៧នាក់ ស្ថិតក្រោមការឃុំខ្លួនពីបទចោទផ្សេងៗគ្នាក្រោយស្ថាប័នតុលាការសម្រេចដាក់ពន្ធនាគារ ត្រូវបានរំលែកបញ្ជូនមកឃុំខ្លួនបន្តក្នុងពន្ធនាគារខេត្តស្ទឹងត្រែង ដោយសារស្ថានភាពនៅខេត្តក្រចេះ ចំនួនអ្នកជាប់ទោសមានកំណើនកើនឡើងលើសចំណុះ។ ការសម្រេចបញ្ជូនទណ្ឌិត ត្រូវបានកងកម្លាំងនគរបាល ការពារយ៉ាងតឹងរឹង ទាំងការការពារពេលដឹកជញ្ជូនមក និងការការពារពេលទទួលផ្ទេរបញ្ជូលក្នុងពន្ធនាគារខេត្តស្ទឹងត្រែង កាលពីថ្ងៃទី១៧ មករា ២០២១ ។
តាមស្នងការនគរបាលខេត្តស្ទឹងត្រែង លោកឧត្តមសេនីយ៍ទោ អូត ស៊ីវុត្ថា អោយដឹងថាកម្លាំងនគរបាលខេត្តស្ទឹងត្រែង រួមមានកម្លាំងការិយាល័យចម្រុះបានបែកចែកជាក្រុមតាមគោលដៅដើម្បីការពាសន្តិសុខ ខណៈពេលដែលកម្លាំងនគរបាលខេត្តក្រចេះដឹកជញ្ជូនទណ្ឌិតចំនួន៨៧នាក់ ផ្ទេរមកឃុំបន្តនៅពន្ធនាឮគារខេត្តស្ទឹងត្រែង។ ជាលទ្ធផលពុំមានការរាំងស្ទះ និងខកខានចំណុចណាឡើយ។
នាយកពន្ធនាគារខេត្តស្ទឹងត្រែង លោកឈុន ដារ៉ា បានប្រាប់ឲ្យដឹងនៅថ្ងៃទី១៨ មករា នេះថា កាលពីថ្ងៃទី១៧ ម្សិលមិញពន្ធនាគារខេត្តស្ទឹងត្រែង ពិតជាបានទទួលទណ្ឌិតមកពីខេត្តក្រចេះចំនួន៨៧នាក់ ប្រាកដមែនបន្ទាប់ពីមានការស្នើសុំពីពន្ឋនាគារខេត្តក្រចេះទៅកាន់អគ្គនាយកដ្ឋានពន្ធនាគារក្រសួងមហាផ្ទៃ ហើយថ្នាក់លើក៏បានសម្រេចតាមការស្នើសុំដោយផ្ទេរទណ្ឌិតទាំងនោះបញ្ជូនមកឃុំខ្លួនបន្តក្នុងពន្ធនាគារខេត្តស្ទឹងត្រែង។
នាយករងអគ្គនាយកដ្ឋានពន្ធនាគារក្រសួងមហាផ្ទៃ លោក នុត សាវនា បានប្រាប់
ក្រុមអ្នកសារព័ត៌មាននៅព្រឹកថ្ងៃទី១៨មករានេះដែរថាការផ្ទេរទណ្ឌិតចំនួន៨៧នាក់ចេញពីពន្ធនាគារខេត្តក្រចេះមកកាន់ខេត្តស្ទឹងត្រែងដោយសារតែក្នុងពន្ធនាគារខេត្តក្រចេះមានចំនួនអ្នកជាប់ឃុំរហូតដល់ទៅ៧០៧នាក់ខណៈពន្ធនាគារខេត្តនេះ
អាចដាក់អ្នកជាប់ឃុំបានក្រោម400នាក់ប៉ុណ្ណោះ។ ដោយសារទីតាំងមានលក្ខណៈ
តូចចង្អៀត។
លោកនាយរងអគ្គនាយកដ្ឋានពន្ធនាគារក្រសួងមហាផ្ទៃបន្តថាពន្ធនាគារនៅខេត្តស្ទឹង
ត្រែងមានលក្ខណៈធំទូលាយបន្ទាប់មានការសង់អគារបន្ថែមជាបន្តបន្ទាប់ដែលអាចដាក់អ្នកជាប់ឃុំបានចំនួនច្រើន ។ ម្យ៉ាងទៀត ពន្ធនាគារខេត្តក្រចេះ និងស្ទឹងត្រែងស្ថិតនៅភូមិភាគឦសានតែមួយ បង្កលក្ខណៈងាយស្រួលសម្រាប់សាច់ញាតិសួរសុខទុក្ខជនជាប់ឃុំ។ បន្ថែមពីនេះ ការនាំខ្លួនអ្នកជាប់ឃុំឡើងសាវនាការទៅសាលាដំបូងខេត្តក្នុងតំបន់ជិតគ្នាក៏កាន់តែមានលក្ខណៈងាយស្រួលផងដែរ៕
ចែករំលែកព័តមាននេះ