រាជធានីភ្នំពេញ ៖ ក្នុងជំនួបមិត្តភាពនៅលើសង្វៀនស៊ីអិនស៊ីកាលពីថ្ងៃទី១៧ មករា កន្លងមកនេះ កីឡាករឈឿន ល្វៃ មកពីក្លិបនាគរាជចតុមុខ ត្រូវបានគណៈកម្មការប្រកាសឱ្យឈ្នះដោយស្វ័យប្រវត្តិនៅត្រឹមទឹកទី៣ បន្ទាប់ពីកីឡាករ…
រាជធានីភ្នំពេញ ៖ ក្នុងជំនួបមិត្តភាពនៅលើសង្វៀនស៊ីអិនស៊ីកាលពីថ្ងៃទី១៧ មករា កន្លងមកនេះ កីឡាករឈឿន ល្វៃ មកពីក្លិបនាគរាជចតុមុខ ត្រូវបានគណៈកម្មការប្រកាសឱ្យឈ្នះដោយស្វ័យប្រវត្តិនៅត្រឹមទឹកទី៣ បន្ទាប់ពីកីឡាករ វង្ស វិឆ័យ មកពីក្លិបប្រដាល់បញ្ជាការដ្ឋានកងទ័ពពិសេស បង្កកំហុសដោយវាយកែងថែមពីក្រោយបណ្ដាលឱ្យរូបគេដួលសន្លប់។
ការប៉ះគ្នារវាងគូសងសឹកលើកនេះបានធ្វើឱ្យអ្នកតាមដានការប្រកួតមានការចាប់អារម្មណ៍យ៉ាងខ្លាំង ដោយសារតែពួកគេទាំងពីរវាយគ្នាមិនបង្អង់ដៃឡើយ ចាប់តាំងពីបើកឆាកក្នុងទឹកទី១មកម៉្លេះ ។ វង្ស វិឆ័យដែលជាកីឡាករចាស់វស្សាជាងនោះ មានបំណងចង់ផ្ដួលឈឿន ល្វៃឱ្យសន្លប់បានឆាប់តាមតែអាចធ្វើទៅបាន ។ ដូច្នេះរាល់ការវាយចេញរបស់គេហាក់បង្ហាញកំរោលចូលបន្តិច។
ឈឿន ល្វៃ មានស្នៀតជើងល្អជាង រាល់ការទាត់ចេញក៏ធ្ងន់ជាងដែរតែហាក់បីដូចជាមានការកោតញញើតវង្ស វិឆ័យ ខ្លាំងណាស់។
នៅទឹកទី២ការវាយរបស់កីឡាករទាំង២មានប្រៀបប្រហាក់ប្រហែល។ គ្រាន់តែចូលដល់ទឹកទី៣ភ្លាម វង្ស វិឆ័យ ចាប់ផ្ដើមប្ដូរស្នៀតកែងយ៉ាងសាហាវ ព្រោះតែមានបំណងចង់ផ្ដួលឈឿន ល្វៃឱ្យបានឆាប់បំផុត ។
ប៉ុន្តែឈឿន ល្វៃបុកកែងចូលសៀតផ្កាមុនពេញៗ ធ្វើឱ្យវង្ស វិឆ័យ ក្ដៅស្លឹកត្រចៀក វាយបកសងវិញប៉ុន្តែខុសបច្ចេកទេស ខណៈដែលឈឿន ល្វៃបែរខ្នង វង្ស វិឆ័យក៏បានវាយកែងថែមពីក្រោយពេញទំហឹង បណ្ដាលឱ្យឈឿន ល្វៃដួលទៅលើតាពី ។ ការវាយខុសបច្ចេកទេសបែបនេះ លោកអាជ្ញាកណ្ដាលក៏បានប្រកាសឱ្យចាញ់កីឡាករឈឿន ល្វៃដោយស្វ័យប្រវត្តិ។
រីឯកីឡាករ សេក គឹមរួន មកពីក្លិបមកុដរាជសីហ៍វិញនោះ នៅតែមិនអាចយកឈ្នះកីឡាករ ឡុង បេនលឿន មកពីក្លិបសាលវ័ន្តកីឡា។ តាមការឱ្យដឹងពីគណៈកម្មការរៀបចំការប្រកួតគូនេះធ្លាប់ប៉ះគ្នាជាច្រើនលើករួចមកហើយប៉ុន្តែភាគតិចណាស់ដែល សេក គឹមរួន អាចយកឈ្នះនោះ ។
សម្រាប់ការប្រកួតសងសឹកគ្នាលើកនេះ ចាប់តាំងពីទឹកទី៣រហូតទៅ សេក គឹមរួន ត្រូវកីឡាករ ឡុង បេនលឿនវាយចូលមុខពេញៗ ថែមទាំងបានបុកជង្គង់ចូលពោះទឹកផ្ទួនៗទៀតផង ធ្វើឱ្យកម្លាំងរបស់គេក៏កាន់តែធ្លាក់ចុះខ្លាំង ជាពិសេសឈានចូលដល់ទឹកទី៥សេក គឹមរួន បានត្រឹមតែវាយទប់ទល់ការពារខ្លួនប៉ុណ្ណោះ ។ ទីបំផុតចប់ការប្រកួតលោកអាជ្ញាកណ្ដាលប្រកាសឱ្យសេក
គឹមរួន ចាញ់ពិន្ទុដោយឯកច្ឆន្ទ៕
ចែករំលែកព័តមាននេះ