រដ្ឋាភិបាលកូរ៉េខាងជើងបានកែសម្រួលផ្លូវសំខាន់ក្នុងក្រុងព្យុងយ៉ាង ឱ្យមានចំណែកសម្រាប់ទោចក្រយាន ខណៈមានអ្នកនិយមជិះកង់កាន់តែច្រើនឡើង ។ ទោចក្រយានទោះបីមានតម្លៃខ្ពស់ ប៉ុន្តែកំពុងពេញនិយមខណៈពលរដ្ឋកូរ៉េខាងជើងពុំសូវមានលទ្ធភាពទិញរថយន្តប្រើប្រាស់ ។
ស្ត្រីកូរ៉េខាងជើងចូលចិត្តជិះកង់ទៅផ្សារខណៈកន្លែងជួសជុលកង់រកចំណូលបានច្រើន។ផ្លូវថ្មើរជើងដែលមានក្រាលឥដ្ឋកូរ៉ូឡា និងចាក់បេតុងនៅកណ្តាលក្រុងព្យុងយ៉ាងត្រូវបានចែកចេញជាខ្សែផ្លូវសម្រាប់ជិះកង់ និងថ្មើរជើង ដោយលាបពណ៌ស សម្គាល់ជាផ្លូវសម្រាប់ទោចក្រយាន។
រ៉យទ័រ កាលពីដើមខែកក្កដា ២០១៥នេះ បាបង្ហាញឱ្យឃើញខ្សែផ្លូវសម្រាប់ជិះកង់ទើបសាងសង់រួចរាល់ឆ្ពោះទៅសណ្ឋាគារ «Ryngyong» ជាអគាររាងពីរ៉ាមីតមាន១០៥ជាន់ ជានិមិត្តរូបរបស់ក្រុងព្យុងយ៉ាង ។
អ្នកទេសចរ និងពលរដ្ឋក្នុងក្រុងព្យុងយ៉ាងបញ្ជាក់ថា ក្នុងរយៈពេលជាច្រើនឆ្នាំកន្លងមក អ្នកជិះកង់ត្រូវជិះនៅលើផ្លូវថ្មើរជើង ព្រោះមិនបានទទួលការអនុញ្ញាតឱ្យជិះលើដងផ្លូវ ។ លោកសៃមុន ខកគ័ររ៉េស បម្រើការនៅក្រុមហ៊ុនទេសចរណ៍ «ឃ័រយ៉ូធួរ៍» ក្នុងក្រុងប៉េកាំងបញ្ជាក់ថា «កន្លងមកមានអ្នកជិះកង់ជ្រុលទៅបុកអ្នកថ្មើរជើងជា រឿយៗ ដោយសារផ្លូវថ្មើរជើង និងផ្លូវជិះកង់ជាមួយគ្នា» ។
ទោះបីជាអ្នកប្រើកង់នៅក្រុងព្យុងយ៉ាងកើនឡើងប្រហែល៥០% ក្នុងរយៈពេលប៉ុន្មានឆ្នាំកន្លងមកក៏ដោយ ប៉ុន្តែនៅតែជាជម្រើសមិនល្អ សម្រាប់ពលរដ្ឋមួយចំនួនទៀត ៕
ចែករំលែកព័តមាននេះ