សហរដ្ឋអាមេរិក ៖ ទីក្រុងអាមេរិកធំៗពិសេសរដ្ឋធានីវ៉ាសិុនតោន ស្ថិតក្រោមការប្រកាសអាសន្ន ប្រឈមមុខចំពោះការភ័យខ្លាច កើតមានអំពើហិង្សានានា ពីសំណាក់ពួកអ្នកគាំំទ្រលោកដូណាល់ត្រាំ នាថ្ងៃទី២០មករាជាថ្ងៃធ្វើសច្ចាប្រណិធានចូលកាន់តំណែង របស់ប្រធានាធិបតីថ្មីលោកចូបៃដិន។
ប៉ូលិសសហព័ន្ធFBIបានចេញការប្រកាសអាសន្ន ពីវត្តមានរបស់ពួកបាតុករប្រដាប់អាវុធដែលជឿតាមការអះអាងរបស់លោកដូណាល់ត្រាំផ្ទួនៗទាំងគ្មានភស្ដុតាង ពីការក្លែងបន្លំក្នុងការបោះឆ្នោតប្រធានាធិបតី។ កងកម្លាំងសន្តិសុខអាមេរិក បានប្រមូលកម្លាំងមុនពិធីចូលកាន់តំណែងនោះ ដោយខ្លាចក្រែងពួកបាតុករលើកគ្នាអុកឡុកនៅក្រៅក្រុងវ៉ាសិុនតោន។
កងកម្លាំងឆ្មាំជាតិក៏ត្រូវបានដាក់ពង្រាយពិសេសជុំវិញនិងខាងក្នុងវិមានកាពីតូល ដែលច្រកចូលនានាត្រូវបិទ និងរបងត្រូវបានបន្ថែមដោយលួសបន្លា។ ពួកអ្នកគាំទ្រលោកត្រាំបានអំពាវនាវឲ្យមានការប្រមូលផ្ដុំគ្នា។
ដោយឡែក ពួកអ្នកសើុបអង្កេត របស់ក្រសួងយុត្តិធម៌អាមេរិក រហូតមកទល់ពេលនេះនៅមិនទាន់រកឃើញភស្ដុតាងណាមួយដែលថា ពួកបះបោរដែលវាយប្រហារវិមានកាពីតូល កាលពីសប្ដាហ៍មុនមានគម្រោងចាប់និងធ្វើឃាតបណ្ដាសមាជិកសភាឡើយ៕
ចែករំលែកព័តមាននេះ