ខេត្តបន្ទាយមានជ័យ ៖ រយៈពេល០២ថ្ងៃ យ៉ាងហោចណាស់ក៏មានមនុស្សចំនួន០២នាក់បានស្លាប់ និង០១នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ដែលកើតឡើងចំនួន០២ករណីដោយឡែកពីគ្នា នៅស្រុកអូរជ្រៅ និងក្រុងសិរីសោភ័ណ ខេត្តបន្ទាយមានជ័យ ។
នគរបាលមូលដ្ឋាន បានឲ្យដឹងថា ៖ នៅវេលាម៉ោង០៧និង២០នាទីយប់ថ្ងៃទី១៤ខែមករា ឆ្នាំ២០២១ ចំណុចបង្គោលភ្លើងលេខ៣៨៣-៣៨៤ លើកំណាត់ផ្លូវជាតិលេខ៥ ស្ថិតក្នុងភូមិយាងថ្មី ឃុំកូប ស្រុកអូរជ្រៅ ខេត្តបន្ទាយមានជ័យ មានគ្រោះថ្នាក់ចរាចរណ៍បានកើតឡើងរវាងរយន្ត០១គ្រឿងមិនស្គាល់ម៉ាក ពណ៌ស បើក្នុងទិសដៅពីខាងកើតទៅលិច បុកអ្នកថ្មើជើង ដើរឆ្លងផ្លូវពីទិសខាងជើងទៅត្បូង បណ្តាលឲ្យស្លាប់ភ្លាមៗនៅនឹងកន្លែងកើតហេតុ ។
ជនរងគ្រោះឈ្មោះនី វាន់សាក់ ភេទប្រុស អាយុ៣៩ឆ្នាំ មានទីលំនៅភូមិយាងថ្មី ឃុំកូប ស្រុកអូរជ្រៅ ខេត្ត្តបន្ទាយមានជ័យ សពត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី ។ ចំណែកអ្នកបើកបររថយន្តមិនត្រូវបានគេស្គាល់អត្តសញ្ញាណនោះឡើយ ក្រោយពីកើតហេតុបានបើករថយន្តរត់គេចខ្លួនបាត់ស្រមោល ។
លោកនាយរងការិយាល័យ នគរបាលចរាចរណ៍ជើងគោកខេត្តបន្ទាយមានជ័យ វរសេនីយ៍ទោ សួន នីប៉ូ បានឲ្យដឹងថា នៅវេលាម៉ោង០៥ល្ងាចថ្ងៃទី១៦ ខែមករា ឆ្នាំ២០២១ ក្នុងទីប្រជុំជនលើកំណាត់ផ្លូវខេត្ត(៧មករា) ត្រង់ចំណុចប៉ុស្តិ៍យាមប្រជាការពារភ្នំបាក់ ស្ថិតភូមិភ្នំបាក់ សង្កាត់ទឹកថ្លា ក្រុងសិរីសោភ័ណ្ឌ មានករណីគ្រោះថ្នាក់ចរាចរណ៍កើតឡើងរវាងម៉ូតូហុងដាសេ125 ពាក់ផ្លាកលេខ1D-2517បន្ទាយមានជ័យបើកបរក្នុងទិសដៅពីលិចទៅកើតល្បឿនលឿនផ្លូវកោងបុកប៉ះរថយន្តធុនធំស៊ឺមឺរ៉ឺម៉កពាក់ផ្លាកលេខមុខ ព្រះសីហនុ.3A-7498 និងផ្លាកលេខក្រោយ ប.មានជ័យ 4A-0016 ក្នុងទិសដៅពីកើតមកលិច(ផ្ទុយគ្នា) បណ្តាលស្លាប់០១នាក់ ភេទប្រុស (មិនទាន់ស្គាល់អត្តសញ្ញាណ)ជាអ្នកបើកបរម៉ូតូម៉ាកហុងដាធុនសេ១២៥ ពណ៌ខ្មៅ ពាក់ស្លាកលេខ 1D.2517 និងអ្នករួមដំណើរភេទប្រុស មិនទាន់អត្តសញ្ញាណផងដែរ រងរបួសធ្ងន់ត្រូវបានបញ្ជូនទៅកាន់មន្ទីរពេទ្យ ។ ចំពោះអ្នកបើកបររថយន្ត និងព្រូឡាន ត្រូវបាននគរបាលឃាត់ខ្លួន យកមកសួរនាំនៅការិយាល័យ នគរបាលចរាចរណ៍ ។
មូលហេតុបង្កឲ្យគ្រោះថ្នាក់នេះ គឺបណ្តាលមកពីអ្នកបើកបរម៉ូតូមានល្បឿនលឿន ជាចំណុចផ្លូវកោងមិនប្រកាន់ស្តាំ ៕
ចែករំលែកព័តមាននេះ