ព្រះសម្មាសម្ពុទ្ធបរមគ្រូសម្ដែងថា ដើម្បីញ៉ាំងជីវិតឱ្យបានប្រសើរ បុគ្គលគ្រប់រូបត្រូវតែមានទំនាក់ទំនងល្អជាមួយមនុស្សផងគ្នា ប៉ុន្តែការសេពគប់ត្រូវតែធ្វើឡើងដោយបញ្ញា ត្បិតថា បើសេពគប់ជាមួយមនុស្សប្រភេទណា យើងនឹងក្លាយជាមនុស្សប្រភេទនោះដែរមិនខាន ។
បុគ្គលពាលទាំង៣ជំពូកនៅក្នុងមង្គលសូត្រគឺ ពោលោ, ពាលខោ និងអតិពាលោខោ ជាប្រភេទមនុស្សគួរឱ្យខ្លាចជាងអ្វីៗទាំងអស់ ហើយមិនគប្បីសេពគប់ជាដាច់ខាត ព្រោះការសេពគប់ជាមួយបុគ្គលប្រភេទនេះ ក្រៅពីធ្វើឱ្យយើងវិនាសប្រយោជន៍ អសោចកេរ្តិ៍ឈ្មោះ អស់ទ្រព្យសម្បត្តិ ខាតពេលវេលា ខូចគំនិតប្រាជ្ញាទៅ ថែមទាំងនាំឱ្យយើងក្លាយជាបុគ្គលពាលជាមួយគេផងទៀត ។
ព្រះសម្មាសម្ពុទ្ធបរមគ្រូសម្ដែងថា បើទោះជាក្នុងលោកនេះមានតែមនុស្សពីរនាក់ គឺម្នាក់ជារូបអ្នក ហើយម្នាក់ទៀតជាបុគ្គលពាល ក៏មិនគប្បីទៅសេពគប់ជាមួយបុគ្គលនោះឱ្យសោះ គឺត្រូវនៅតែម្នាក់ឯងដោយរឹងមាំចុះ ។ ការចេះប្រុងប្រយ័ត្ន ហើយចៀសវាងបាននូវការសេពគប់បុគ្គលពាលយ៉ាងណានេះហើយ ជាមង្គលដ៏ឧត្តម ៕ សាន សារិន
ចែករំលែកព័តមាននេះ