រាជធានីភ្នំពេញ ៖ គណៈកម្មការអន្តរក្រសួង ឬគណៈកម្មការចម្រុះបានសម្រេចដកសិទ្ធិអ្នកគ្រប់គ្រងបច្ចុប្បន្ននៃអង្គការសុវណ្ណកុមារ ជាបណ្ដោះអាសន្ន រង់ចាំការដោះស្រាយវិវាទនៅក្នុងអង្គការនេះរួចរាល់សិន ។ នេះបើតាមលោក តូច ចាន់នី អគ្គនាយកបច្ចេកទេសនៃក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានគណៈកម្មការអន្តរក្រសួងដោះស្រាយវិវាទអង្គការសុវណ្ណកុមារ ។
លោក តូច ចាន់នី បានមានប្រសាសន៍ថា គណៈកម្មការអន្តរក្រសួងនេះបង្កើតឡើង ដើម្បី ដោះស្រាយបញ្ហារបស់កុមារ នៅអង្គការសុវណ្ណកុមារ មិនមែនដោះស្រាយជម្លោះរបស់អ្នកគ្រប់គ្រងចាស់ និងអ្នកគ្រប់គ្រងថ្មីទេ ។ ប៉ុន្តែបន្ទាប់ពីការចុះធ្វើអធិការកិច្ចពិសេសក៏ដូចជាស្ថានភាពកន្លងមក និងបច្ចុប្បន្នឃើញថា ស្ថានភាពកុមារនៅអង្គការសុវណ្ណកុមារ បច្ចុប្បន្ននេះមិនដូចជា កុមារនៅក្នុងមណ្ឌលឡើយ ព្រោះកុមារហ៊ានប្រឆាំងរហូតដល់ហ៊ានគំរាមអ្នកគ្រប់គ្រង ពោល គឺស្ថានភាពកាន់តែវឹកវរ និងក្តៅទៅៗ ។
លោកបន្តថា ចំពោះស្ថានភាព និងឥរិយាបថរបស់កុមារ នៅអង្គការសុវណ្ណកុមារយើងមិនអាចបន្ទោសកុមារបានទេ ដោយហេតុថា កាលពីមុនកុមារទាំងនោះជាកុមារស្លូតបូត មានសុជីវធម៌ ទើបតែពេលបច្ចុប្បន្នេះទេ ទើបកុមារបញ្ចេញអាកប្បកិរិយាបែបនោះក៏ព្រោះតែអ្នកគ្រប់គ្រងធ្វើកិច្ចការមិនបានល្អ ធ្វើឱ្យកុមារបាត់ភាពកក់ក្តៅ បាត់បង់សេរីភាព រហូតទទួលយកមិនបាន ។ ហេតុនេះ មូលហេតុ និងគោលដៅដ៏សំខាន់បំផុត នៃគណៈកម្មការចម្រុះ ដែលសម្រេចចិត្តជ្រើសយកជម្រើសដកសិទ្ធិជាបណ្តោះអាសន្ន នូវតួនាទីអ្នកគ្រប់គ្រងបច្ចុប្បន្ននេះ គឺដើម្បីសម្រួលស្ថានការណ៍ ប៉ុន្តែការដកហូតសិទ្ធិនេះត្រូវស្នើសុំកិច្ចសហការជាមួយក្រសួងយុត្តិធម៌ និងស្ថាប័នតុលាការជាមុន ។
សូមជម្រាបថា អតីតប្រធានអង្គការ ត្រូវបានចោទថា បានបំពានលើច្បាប់ជាច្រើនរាប់ទាំងការប្រព្រឹត្តអំពើពុករលួយ បំពានផ្លូវភេទលើកុមារ និងបណ្តែតបណ្តោយឱ្យមានអំពើហិង្សាលើកុមារជាដើម នៅចុងឆ្នាំ២០១៩ ។ ចាប់ពីពេលនោះមក ពោល គឺតាំងពីដើមឆ្នាំ ២០២០ ក៏មានការប្តឹងប្ដល់គ្នាទៅវិញទៅមក ឡើងដល់តុលារយ៉ាងស្មុគស្មាញ និងក្តៅគគុក រហូតដល់អង្គភាពប្រឆាំងអំពើពុករលួយ ។
ទោះយ៉ាងណា បន្ទាប់ពីការហៅមេធាវីភាគីចុងចោទទៅសួរនាំរួចមក រហូតមកដល់ពេលនេះ គេមិនទាន់ឃើញមាន អង្គភាពដែលត្រូវបានទទួលស្គាល់ថាជាស្ថាប័នមុខដែក ( ACU ) នេះចោទប្រកាន់នៅឡើយទេ ។
បើតាមលោក តូច ចាន់នី បញ្ជាក់ថា ការដកសិទ្ធិអ្នកគ្រប់គ្រងនេះ គឺគ្រាន់តែជាការដកបណ្តោះអាសន្នប៉ុណ្ណោះ ។ ហេតុនេះអ្នកគ្រប់គ្រងបច្ចុប្បន្ននឹងអាចត្រូវបានប្រគល់ការងារវិញ ឬយ៉ាងណានោះ គឺអាស្រ័យទៅលើលទ្ធផលនានាបន្ទាប់ពីក្តីក្តាំរបស់គាត់ត្រូវបានតុលាការបិទបញ្ចប់ ៕
ចែករំលែកព័តមាននេះ