រាជធានភ្នំពេញ ៖ ទីបំផុតលោក ពេជ្រ វិជ្ជាធរ អនុប្រធានសាលាដំបូងរាជធានីភ្នំពេញ និងជាចៅស៊ើបសួរ បានសម្រេចឃុំខ្លួនបុរសម្នាក់ ដែលអួតអាងខ្លួនថាជាមន្ត្រីកងរាជអាវុធហត្ថបម្រើការងារនៅអង្គភាពមជ្ឈមណ្ឌលហ្វឹកហ្វឺនភ្នំជំរាយ ដាក់ពន្ធនាគារព្រៃស(ម១)ជាបណ្តោះអាសន្ន…
រាជធានភ្នំពេញ ៖ ទីបំផុតលោក ពេជ្រ វិជ្ជាធរ អនុប្រធានសាលាដំបូងរាជធានីភ្នំពេញ និងជាចៅស៊ើបសួរ បានសម្រេចឃុំខ្លួនបុរសម្នាក់ ដែលអួតអាងខ្លួនថាជាមន្ត្រីកងរាជអាវុធហត្ថបម្រើការងារនៅអង្គភាពមជ្ឈមណ្ឌលហ្វឹកហ្វឺនភ្នំជំរាយ ដាក់ពន្ធនាគារព្រៃស(ម១)ជាបណ្តោះអាសន្ន កាលពីរសៀលថ្ងៃទី១៥ ខែមករា ឆ្នាំ២០២១ ក្រោមការចោទប្រកាន់ពីបទ.កាន់កាប់ ឬដឹកជញ្ជូនអាវុធដោយគ្មានការអនុញ្ញាត។
ជនជាប់សង្ស័យរូបនេះត្រូវបានកម្លាំងសមត្ថកិច្ចការិយាល័យបទល្មើសព្រហ្មទណ្ឌ នៃកងរាជអា វុធហត្ថរាធានីភ្នំពេញ ធ្វើការឃាត់ខ្លួន និងបញ្ជូនទៅកាន់សាលាដំបូងរាជធានីភ្នំពេញ នៅរសៀលថ្ងៃទី១៣ ខែមករា ឆ្នាំ២០២១នេះ ដើម្បីចាត់ការតាមផ្លូវច្បាប់ ពាក់ព័ន្ធករណីគ្រោះថ្នាក់ចរាចរ ដកកំភ្លើងគំរាមទៅលើភាគីម្ខាងទៀត។ ទាក់ទិនករណីខាងលើនេះលោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានចេញសេចក្តីថ្លែងការមួយនៅថ្ងៃទី១៣ ខែមករា ឆ្នាំ២០២១ នេះថា៖
បុគ្គលដែលបានអះអាងថា ខ្លួនជាមន្ត្រីកងរាជអាវុធហត្ថបម្រើការងារនៅមជ្ឈមណ្ឌលហ្វឹកហ្វឺនភ្នំជំរាយ បានដកកាំភ្លើងគំរាមភាគីម្ខាងក្នុងហេតុការគ្រោះថ្នាក់ចរាចរ នៅចំណុចផ្តុំផ្សារថ្មី ស្ថិតនៅសង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ កាលពីថ្ងៃទី១០ ខែមករា ឆ្នាំ២០២១ (មិនមែនជាមន្ត្រីកងរាជអាវុធហត្ថទេ តាមការស្រាវជ្រាវជននោះមានឈ្មោះ សុខ ណាម៉ាលីដូ ភេទប្រុស អាយុ២៨ឆ្នាំ មុខរបរបុគ្គលិករោងចក្រកាត់ដេរ ទីលំនៅផ្ទះលេខ ១២អឺសូន្យ ផ្លូវលេខ៨៨ សង្កាត់វត្តភ្នំ ខណ្ឌដូនពេញ រាជធានីភ្នំពេញ ដែលពេលនេះត្រូវបានការិយាល័យជំនាញព្រហ្មទណ្ឌនៃកងរាជអាវុធហត្ថរាជធានីភ្នំពេញ ធ្វើការឃាត់ខ្លួនហើយកាលពីថ្ងៃទី១២ ខែមករា ឆ្នាំ២០២១ ក្រោមការដឹកនាំ និងសម្របសម្រួលដោយលោក ប្លង់ សុផល ព្រះរាជអាជ្ញារងអយ្យការអមសាលាដំបូងរាជធានីភ្នំពេញ)។
សូមរំលឹកថា កាលពីវេលាម៉ោង៤ និង៣០នាទីទៀបភ្លឺឈានចូលថ្ងៃទី១០ ខែមករា ឆ្នាំ២០២១ នៅចំណុចម្តុំផ្សារធំថ្មី ស្ថិតក្នុងសង្កាត់ផ្សារថ្មីទី១ ខណ្ឌដូនពេញ មានករណីគ្រោះថ្នាក់ចរាចរណ៍បន្តិចបន្តួចមួយរវាងរថយន្ត និងម៉ូតូ។ ករណីគ្រោះថ្នាក់ចរាចរនោះ ត្រូវបានសាក្សីនៅកន្លែងកើតហេតុសុំមិនបញ្ចេញឈ្មោះបានប្រាប់អ្នកសារព័ត៌មានថា មុនដំបូងគេឃើញរថយន្តព្រូស ពណ៌ទឹកប្រាក់ ពាក់ស្លាកលេខ 2AC-9367 បើកបរដោយបុរសម្នាក់ដែលមានកាំភ្លើង បានបើកឡានស្របគ្នាតាមបណ្តោយផ្លូវលេខ៧៣ ក្បែរផ្សារធំថ្មី ហើយឃើញរថយន្តនោះ បើកកៀរម៉ូតូបណ្តាលឲ្យដួល រួចបានដកកាំភ្លើងពីចង្កេះ ថែមទាំងស្រែកគំរាម អ្នកជិះម៉ូតូថា ហែងចង់យ៉ាងម៉េច។
សាក្សីបន្តថា ភ្លាមៗនោះជនរងគ្រោះបានលើកដៃសុំកុំបាញ់គាត់អី ។ ពេលនោះប្រជាពល រដ្ឋបាននាំគ្នារត់ទៅជួយជនរងគ្រោះដែលដួលម៉ូតូ ដោយមានរបួសបាក់ដងកាំបិត និងត្រូវត្រង់ប្រអប់ជើង រួចបញ្ជូនទៅកាន់មន្ទីរពេទ្យភ្លាមៗផងដែរ។ បន្ទាប់មកជនបង្កនៅតែបន្តសម្ញែងកាំភ្លើងនៅមុខសមត្ថកិច្ចដដែលៗ ទើបសមត្ថកិច្ចសុំដកអាវុធនោះទុកសិន តែជនបង្កបានប្រគល់ឲ្យតែគ្រាប់កាំភ្លើងទេ ចំណែកកាំភ្លើងមិនឲ្យទេ រួចបានស្រែកសំឡុតដាក់សមត្ថកិច្ច ថែមទៀតផង។ ជាមួយនោះដែរជនបង្ករូបបានស្រែកប្រកាសថា «ខ្លួនមានមុខងារជាមន្ត្រីកងរាជអាវុធហត្ថ និងមានតួនាទីជានាយករងមជ្ឈមណ្ឌលហ្វឹកហ្វឺនភ្នំជំរាយ» ទើបចេញពីផឹកស៊ីមួយកន្លែង មានបំណងបើករថយន្តទៅផ្ទះ។ ជាចុងក្រោយជនរងគ្រោះមិនចង់ឲ្យមានរឿងវែងឆ្ងាយ មិនបានដាក់ពាក្យបណ្តឹងទេ ដោយសុំត្រឹមតែឲ្យជនបង្ក សងថ្លៃព្យាបាលនៅមន្ទីរពេទ្យតែប៉ុណ្ណោះ ដើម្បីបញ្ចប់រឿង។
ករណីខាងលើនេះភាគីទាំងពីរបានបញ្ចប់រឿង ត្រឹមសំណងជាលុយកាក់រួចហើយ ប៉ុន្តែជនបង្កនៅជាប់ពាក់ព័ន្ធប្រើឈ្មោះជាមន្ត្រីបម្រើការងារនៅអង្គភាពមជ្ឈមណ្ឌហ្វឹកហ្វឺនកងរាជ អាវុធហត្ថភ្នំជំរាយ ដែលខ្លួនមិនមែនជាមន្ត្រីកងរាជអាវុធ ដោយបានប្រើពាក្យសម្ដីគំរាម សំឡុត លើជនស្លូតត្រង់ ធ្វើប៉ះពាល់ដល់កិត្តិយស និងកិត្តិនាមអង្គភាពជាស្ថាប័នរដ្ឋយ៉ាងធ្ងន់។ ដូច្នោះទើបស្ថាប័ន ឬអង្គភាពពាក់ព័ន្ធតម្រូវឲ្យមន្ត្រីនគរបាលយុត្តិធម៌មានវិធានការ លើបុគ្គលរូបនេះទៅតាមច្បាប់ជាធរមាន៕ ដោយ ៖ ឃឹម ប៊ុនណាក់
ចែករំលែកព័តមាននេះ