ជាង ១ខែ ទើបចាប់បានចោរ គាស់តូបលួចខោអាវ នៅក្នុងផ្សារត្រែង ស្រុករតនមណ្ឌល
- បាត់ដំបង
ខេត្តបាត់ដំបង៖ ជនដៃដល់ម្នាក់ ក្នុងចំណោមបក្សពួក ០២នាក់ ដែលពាក់ព័ន្ធនឹងករណីគាស់តូបអាជីវករ លួចយកសម្លៀកបំពាក់ នៅក្នុង «ផ្សារត្រែង» ស្រុករតនមណ្ឌល កាលពីអំឡុងខែធ្នូ…
ខេត្តបាត់ដំបង៖ ជនដៃដល់ម្នាក់ ក្នុងចំណោមបក្សពួក ០២នាក់ ដែលពាក់ព័ន្ធនឹងករណីគាស់តូបអាជីវករ លួចយកសម្លៀកបំពាក់ នៅក្នុង «ផ្សារត្រែង» ស្រុករតនមណ្ឌល កាលពីអំឡុងខែធ្នូ…
ខេត្តបាត់ដំបង៖ ជនដៃដល់ម្នាក់ ក្នុងចំណោមបក្សពួក ០២នាក់ ដែលពាក់ព័ន្ធនឹងករណីគាស់តូបអាជីវករ លួចយកសម្លៀកបំពាក់ នៅក្នុង «ផ្សារត្រែង» ស្រុករតនមណ្ឌល កាលពីអំឡុងខែធ្នូ ឆ្នាំ២០២០កន្លង នៅពេលនេះ ត្រូវបានកម្លាំងជំនាញការិយាល័យព្រហ្មទណ្ឌកំរិតស្រាល នៃស្នងការខេត្ត ស្រាវជ្រាវ រហូតឈានដល់ឃាត់ខ្លួនបាន កាលពីព្រឹកថ្ងៃទី១៤ មករា។ ជនសង្ស័យនោះ ត្រូវបានចាប់ខ្លួន ខណៈកំពុងសម្ងំ នៅក្នុងបន្ទប់ផ្ទះសំណាក់មួយកន្លែង ក្នុងភូមិកម្មករ សង្កាត់ស្វាយប៉ោ ក្រុងបាត់ដំបង។
លោក ឈឿង គឹមសុង ប្រធានការិយាល័យប្រហ្មទណ្ឌកំរិតស្រាល ដែលបានចាត់ការលើករណីនេះ បានឲ្យដឹងថា ជនដៃដល់ ដែលត្រូវចាប់ខ្លួននេះ ឈ្មោះ អឿត ពេក អាយុ ៣១ឆ្នាំ ស្នាក់នៅមិនពិតប្រាកដ និងបក្សពួកម្នាក់ទៀត ដែលកំពុងរត់គេចខ្លួន ឈ្មោះ ទា ប៉ូឡា នៅភូមិវត្តលៀប សង្កាត់ចំការសំរោង ក្រុងបាត់ដំបង។
លោកបានប្រាប់ថា ជននេះ ត្រូវបានចាប់ខ្លួន តាមដីកាបង្គាប់ឲ្យចូលខ្លួនរបស់លោក គឺ ប៊ុណ្ណារ៉ា តំណាងអយ្យការអមសាលាដំបូងខេត្ត ពីបទ«លួចមានស្ថានទម្ងន់ទោស»។ រីឯជនឈ្មោះ ទា ប៉ូឡា ដែលកំពុងគេចខ្លួន ក៏មានដីកាបញ្ជាឲ្យចូលខ្លួនដូចគ្នាដែរ ព្រោះចូលរួមប្រព្រឹត្តជាមួយគ្នា ហើយជននេះ ជាមេខ្លោងទៀតផង។
សូមបញ្ជាក់ថា កាលពីវេលារំលងអាធ្រាត្រ ឈានចូលថ្ងៃទី១០ ធ្នូ ឆ្នាំ២០២០ ជនមិនស្គាល់អត្តសញ្ញាណ បានធ្វើសកម្មភាព គាស់ទម្លុះទម្លាយតូបលក់ខោអាវរបស់អាជីវករម្នាក់ ឈ្មោះ អ៊ុក ស្រីអូន អាយុ ៥០ឆ្នាំ ដែលលក់នៅក្នុង «ផ្សារត្រែង» ស្ថិតនៅក្នុងភូមិភ្ជាវ ឃុំត្រែង ស្រុករតនមណ្ឌល ដោយជនសង្ស័យបានលួចយកខោអាវអស់ជាច្រើន។
ជនរងគ្រោះ ដែលបានប្ដឹងទៅសមត្ថកិច្ច បញ្ជាក់ថា សម្លៀកបំពាក់ ដែលបាត់បង់ រួមមាន ខោចំនួន ៣០០ខោ និងអាវចំនួន ៥០អាវ ដែលមានតំលៃសរុបប្រមាណ ១៤លានរៀល។
ជនត្រូវចោទឈ្មោះ អឿត ពេក បានសារភាពថា ខ្លួន និងឈ្មោះ ប៉ូឡា ពិតជាបានជិះម៉ូតូ ទៅគាស់តូបលួចយកខោអាវ នៅក្នុងផ្សារត្រែង មែន គឺធ្វើសកម្មភាព នៅវេលារំលងអាធ្រាត្រ។
ប៉ុន្តែជននេះ ហាក់បានព្យាយាមឆ្លើយដោះបន្ទុក ហើយបានទម្លាក់កំហុសភាគច្រើនទៅមេកើយរបស់ខ្លួន ឈ្មោះ ប៉ូឡា ដែលកំពុងគេចខ្លួន។
ឈ្មោះ ពេក បាននិយាយថា នៅយប់នោះ ឈ្មោះ ប៉ូឡា បានបញ្ជាឲ្យខ្លួន ចូលទៅធ្វើសកម្មភាព។ ខ្លួនបានចូលទៅឃើញតូបជាប់សោរ ខ្លួនក៏ត្រឡប់មកប្រាប់ឈ្មោះ ប៉ូឡា វិញ។
ជននេះ បានបញ្ជាក់ថា ពេលនោះ មេរបស់ខ្លួន បានចូលទៅម្ដង ស្រាប់តែឮសំឡេងវាយផ្ដាច់សោរ លុះបន្តិចក្រោយមក ឃើញឈ្មោះ ប៉ូឡា លីស្បោងខោអាវយ៉ាងធំ ចេញមកដាក់លើម៉ូតូ ហើយពួកខ្លួន ជិះដឹកមកកាន់ក្រុងបាត់ដំបងភ្លាមៗតែម្ដង។
ប៉ុន្តែជននេះបានអះអាងថា ពេលដឹកមកដល់បាត់ដំបង គឺឈ្មោះ ប៉ូឡា ជាអ្នកចាត់ចែងលក់ដូរខោអាវទាំងនោះ។ រីឯខ្លួន ចាំតែទទូលចំណែកខ្លះៗតែប៉ុណ្ណោះ។
ពាក់ព័ន្ធនឹងប្រវត្តិក្រុមចោរសកម្មនេះ ត្រូវបានលោក ឈឿង គឹមសុង ប្រាប់ថា ក្រុមនេះ មានបក្សពួកច្រើនគួរសមដែរ ដែលតែងធ្វើសកម្មភាពលួច ឆក់ គាស់ទម្លុះទម្លាយ និង កាប់ចាក់គ្នា។
លោកបានបញ្ជាក់ថា ជនសង្ស័យចំនួន ០៣នាក់ ដែលកម្លាំងរបស់លោកបង្រ្កាប ក្នុងអំពើហឹង្សា កាលពីប៉ុន្មានថ្ងៃមុននេះ ក៏ជាក្រុមនេះដែរ។ ក្រុមអន្ធពាលនេះ សុទ្ធតែធ្លាប់ជាប់គុក ម្នាក់ៗច្រើនដង តែពួកគេ មិនព្រមរាងចាលទេ។ ជាពិសេសជនឈ្មោះ ទា ប៉ូឡា (មេខ្លោង) និងឈ្មោះ អឿត ពេក នេះតែម្ដង ដែលម្នាក់ៗ ជាប់គុកស្ទើររាប់ភ្លេច។
ប៉ុន្តែយ៉ាងនេះក្ដី លោក ឈឿង គឹមសុង បានបញ្ជាក់ថា ពេលនេះ លោកស្នងការខេត្ត បានបញ្ជាឲ្យមន្រ្តីជំនាញ សួរនាំជនត្រូវចោទ ដើម្បីកសាងសំណុំរឿង បញ្ជូនទៅកាន់សាលាដំបូងខេត្ត និងកំពុងបន្តតាមប្រមាញ់មេខ្លោងម្នាក់ទៀត ឈ្មោះ ទា ប៉ូឡា ដែលកំពុងសម្ងំលាក់ខ្លួន៕ ដោយ៖ ឆោម ពិសម័យ
ចែករំលែកព័តមាននេះ