ខេត្តក្រចេះ ៖ ឃាតករ ដែលបាញ់សម្លាប់នាយរងនគរបាលព្រហ្មទណ្ឌកម្រិតស្រាលរាជធានីភ្នំពេញ បានបាត់បង់ជីវិត ហើយក្រោយការមិនព្រមប្រគល់ខ្លួន និងថែមទាំងបានផ្ទុះអាវុធ ដាក់លើសមត្ថកិច្ច នៅថ្ងៃទី១៥ មករានេះ ថែមទៀត ក្នុងខេត្តក្រចេះ ។
យោងតាមមន្ត្រីនគរបាលខេត្តក្រចេះ បានអោយដឹងថា ជនសង្ស័យជាឃាតករ មានឈ្មោះ អ៊ា ណារ៉េន បានស្លាប់ក្នុងការហ៊ុំព័ទ្ធមួយរបស់សមត្ថកិច្ចនៅភ្នំខៀវ ក្នុងភូមិអូរព្រះ ឃុំអូរគ្រៀង ស្រុកសំបូរ នៃខេត្តក្រចេះ ។
មន្ត្រីនគរបាលខេត្តក្រចេះ បានបន្តថា ជនសង្ស័យមិនព្រមប្រគល់ខ្លួនមកឲ្យសមត្ថកិច្ចចាប់ខ្លួនឡើយ បើទោះបីជាបានធ្លាក់ក្នុងការហ៊ុំព័ទ្ធក៏ដោយ ។
សមត្ថកិច្ចបានដាក់កម្លាំងពង្រាយក្នុងខេត្តក្រចេះ ប្រមាណជិតមួយសប្តាហ៍ហើយ ក្នុងការតាមប្រមាញ់ចាប់ខ្លួនឃាតករសង្ស័យនោះ ។
នៅថ្ងៃនេះផងដែរ មន្ត្រីនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន បានប្រាប់បណ្តាញសារព័ត៌មានក្នុងស្រុកបញ្ជាក់ថា ជនដៃដល់ដែលបានបាញ់សម្លាប់លោកវរសេនីយ៍ រ៉េត ស៊ីណាត កាលពីយប់ថ្ងៃទី៣០ ធ្នូ ២០២០ ក្នុងរាជធានីនោះ ត្រូវបានស្លាប់ហើយ ក្រោយការផ្ទុះអាវុធជាមួយនឹងសមត្ថកិច្ច ។
សូមរម្លឹកថា លោកវរសេនីយ៍រ៉េត ស៊ី ណាត នៃស្នងការដ្ឋាននគរបាលរាជធានីភ្នំពេញ ត្រូវឃាតករបាញ់សម្លាប់ ក្នុងហេតុ ការណ៍ទាស់សម្តីគ្នាមួយ ពេលមានគ្រោះថ្នាក់ចរាចរណ៍ វេលាយប់ថ្ងៃទី៣០ធ្នូ នៅតាមបណ្តោយមហា វិថីសហ ព័ន្ធរុស្ស៊ី ក្នុងខណ្ឌពោធិ៍សែនជ័យ ។
ឃាតករឈ្មោះអ៊ា ណារ៉េន បានរត់គេចខ្លួនរហូតចាប់តាំងពីពេលនោះមក និងទើបមានដំណឹងការបាត់បង់ជីវិត នៅថ្ងៃទី១៥មករានេះ ។
ព័ត៌មានលម្អិតកោះសន្តិភាពនឹងផ្សាយជូនជាបន្ត ៕
ចែករំលែកព័តមាននេះ