រាជធានីភ្នំពេញ ៖ រថយន្តដឹកទំនិញ១គ្រឿងបើកបរក្នុងល្បឿនលឿន ស្រាប់តែរេចង្កូតបោលបុកចូលផ្ទះលក់ដូរនៅតាមផ្លូវមួយកន្លែងទាំងកម្រោល បណ្ដាលឲ្យរងការខូចខាត ប៉ុន្តែសំណាងល្អគ្មានអ្នកគ្រោះថ្នាក់ឡើយ ឧប្បត្តិហេតុនេះ ត្រូវបានប្រជាពលរដ្ឋសង្ស័យថា អ្នកបើកបរងងុយដេក ឬស្រវឹងស្រា ។ ឧប្បត្តហេតុនេះបានកើតឡើង កាលពីវេលាម៉ោង១និង៥០នាទីរសៀលថ្ងៃទី១៥ ខែមករា ឆ្នាំ២០២១ នៅលើកំណាត់ផ្លូវបេតុងចូលវត្តជន្លង់ម្លូ កែងផ្លូវជាតិលេខ៣ ស្ថិតនៅក្នុងភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
រថយន្តដឹកកុងតឺន័រខាងលើ ម៉ាកហ៊ីណូ ពណ៌ទឹកសមុទ្រ ក្បាលពាក់ស្លាកលេខភ្នំពេញ 3C-9123 និងកន្ទុយរ៉ឺម៉ក ពាក់ស្លាកលេខព្រះសីហនុ 3A-0930 បើកបរដោយបុរសមិនស្គាល់អត្តសញ្ញាណម្នាក់ និងត្រូវបានកម្លាំងប្រជាការពារ និងប្រជាពលរដ្ឋចាប់បាន ខណៈពេលព្យាយាមរត់គេចខ្លួន ។
តាមប្រភពព័ត៌មានបានឲ្យដឹងថា នៅមុនពេលកើតហេតុរថយន្តនេះ បានបើករបរធ្វើដំណើរតាមផ្លូវបេតុងខាងលើក្នុងល្បឿនលឿន និងក្នុងទិសដៅពីលិចទៅកើតលុះពេលទៅដល់ត្រង់ចំណុចកើតហេតុ ស្រាប់តែរេចង្កូតជ្រុលទៅបុកចូលផ្ទះលក់ដូរខាងលើ ទាំងកម្រោល បណ្ដាលឲ្យសំយ៉ាបផ្ទះនោះរួមទាំងអីវ៉ាន់រងការខូចខាតខ្ទេចខ្ទី ហើយរថយន្តក៏បានរងការខូចខាតកាប៊ីនយ៉ាងដំណំផងដែរ ។
ខណៈនោះប្រជាពលរដ្ឋសង្ស័យថា អ្នកបើកបរងងុយដេក ឬស្រវឹងស្រា ប៉ុន្តែអ្នកបើកបររូបនោះវិញបានប្រាប់ថា រថយន្តនេះហ្វ្រាំងអត់ស៊ីជាន់មិនជាប់ ហើយពេលទៅជិតដល់ផ្លូវជាតិលេខ៣ ដោយខ្លាចជ្រុលទៅបុកអ្នកដំណើរខាងមុខទើបខ្លួនកាច់ចង្កូតបុកចូលផ្ទះខាងលើនេះតែម្ដង ។
ក្រោយកើតហេតុសមត្ថកិច្ចនគរបាលប៉ុស្តិ៍ភ្លើងឆេះរទេះ និងនគរបាលចរាចរណ៍ខណ្ឌកំបូលបានចុះទៅកាន់កន្លែងកើតហេតុពិនិត្យជាក់ស្តែង និងឲ្យខាងតំណាងរថយន្តបង្កហេតុនេះធ្វើការដោះស្រាយជាមួយម្ចាស់ផ្ទះ ដើម្បីបញ្ចប់រឿង ៕
ចែករំលែកព័តមាននេះ