ប៉ាឡេស្ទីន ៖ លោក Youssef Abu Amira ដែលបានបញ្ចប់ការសិក្សានៅសាលាច្បាប់ បានធ្វើឱ្យប្រជាជនរបស់ប្រទេសប៉ាឡេស្ទីន កោតស្ងប់ស្ងែងពីភាពតស៊ូពុះពាររបស់គាត់ បន្ទាប់ពីបុរសវ័យ២៤ឆ្នាំរូបនេះ…
ប៉ាឡេស្ទីន ៖ លោក Youssef Abu Amira ដែលបានបញ្ចប់ការសិក្សានៅសាលាច្បាប់ បានធ្វើឱ្យប្រជាជនរបស់ប្រទេសប៉ាឡេស្ទីន កោតស្ងប់ស្ងែងពីភាពតស៊ូពុះពាររបស់គាត់ បន្ទាប់ពីបុរសវ័យ២៤ឆ្នាំរូបនេះ មិនបណ្តោយឱ្យពិការភាពរារាំងបំណងប្រាថ្នារបស់គាត់បានឡើយ។
Amira ដែលពិការទាំងជើង និងដៃតាំងពីកំណើត កំពុងតែបង្ហាញពិភពលោកថាពិការភាពមិនមែនជាឧបសគ្គឡើយ ដោយលោកយកឈ្នះលើខ្លួនឯងក្នុងការហ្វឹកហាត់ជំនាញការ៉ាតេ។
យោងតាមប្រភពពី Reuters បានឱ្យដឹងថា បច្ចុប្បន្ន Amira កំពុងកាន់ខ្សែក្រវ៉ាត់ពណ៌ទឹកក្រូច បើទោះបីគ្មានអវយវៈគ្រប់គ្រាន់ដូចមនុស្សគ្រប់គ្នាក្តី ប៉ុន្តែគាត់បានបង្ហាញពីជំនាញវាយដំបងគួរឱ្យភ្ញាក់ផ្អើលបំផុត ដែលទទួលបានការបង្វឹកពីគ្រូជំនាញនៅឯក្លិប Al-Mashtal។
Amira បានលើកឡើងយ៉ាងដូច្នេះថា «ខ្ញុំចង់បង្ហាញខ្លួនខ្ញុំ និងពិភពលោកថាពិការភាពគ្រាន់តែស្ថិតក្នុងចិត្ត ហើយមិនមានក្នុងខ្លួនយើងនោះទេ ហើយគ្មានអ្វីដែលយើងមិនអាចធ្វើទៅរួចនោះទេ។ ខ្ញុំចង់ចេះការ៉ាតេ ដូច្នេះខ្ញុំអាចការពារខ្លួនបាន។ ហើយខ្ញុំក៏មានក្តីសុបិនចង់ចូលរួមក្នុងការប្រកួតជើងឯកកម្រិតអន្តរជាតិផងដែរ»។
សូមរំលឹកថា ក្នុងនាមជាជនភៀសខ្លួនដែលរស់នៅក្នុងជំរុំហ្គាហ្សា លោក Youssef Abu Amira បានបញ្ចប់ការសិក្សាផ្នែកច្បាប់ពីសាកលវិទ្យាល័យ Islamic University of Gaza ដ៏ល្បីល្បាញរបស់ប្រទេសប៉ាឡេស្ទីនកាលពីឆ្នាំមុន៕
ចែករំលែកព័តមាននេះ