រាជធានីភ្នំពេញ ៖ រថយន្តមួយគ្រឿងម៉ាកឡិចស៊ីស RX350 ជារបស់លោក ដួង តារា រដ្ឋលេខាធិការទីស្តីការគណៈរដ្ឋមន្ត្រី ត្រូវបានក្រុមជនសង្ស័យលួចកាច់យកកញ្ចក់មើលផ្លូវ ទាំងសងខាង…
រាជធានីភ្នំពេញ ៖ រថយន្តមួយគ្រឿងម៉ាកឡិចស៊ីស RX350 ជារបស់លោក ដួង តារា រដ្ឋលេខាធិការទីស្តីការគណៈរដ្ឋមន្ត្រី ត្រូវបានក្រុមជនសង្ស័យលួចកាច់យកកញ្ចក់មើលផ្លូវ ទាំងសងខាង និងយកដុំថ្មវាយបំបែកកញ្ចក់ បំរុងបើកទ្វារចូលលួចរបស់របរនៅខាងក្នុងរថយន្តទៀត ប៉ុន្តែពុំបានសម្រេច ដោយសារតែអង្គរក្សរបស់លោកភ្ញាក់ដឹងខ្លួនទាន់ ។ ទោះបីជាយ៉ាងណា ក្រុមជនសង្ស័យដែលធ្វើសកម្មភាពខាងលើ ត្រូវបានគេអះអាងថា មានគ្នាចំនួន២នាក់ បានរត់គេចខ្លួនបាត់ដោយសុវត្ថិភាព ។
ទន្ទឹមនឹងមានហេតុការណ៍ដែលបានកើតឡើងខាងលើនេះដែរ លោក ដួង តារា ក៏បានបង្ហោះសារតាមបណ្តាញសង្គមថា គួរអោយសោកស្តាយ ចំពោះអ្វីដែលបានកើតឡើងសម្រាប់លោក ហើយ លោកពិតជាមានការបារម្ភចំពោះសុវត្តិភាពរស់នៅ បង្កអោយមានការភ្ញាក់ផ្អើល ផងដែរ ។
ហេតុការណ៍ខាងលើនេះបានកើតឡើងកាលពីវេលាម៉ោង៣ឈានចូលព្រឹកថ្ងៃទី១៥ ខែ មករា ឆ្នាំ២០២១ នៅចំណុចផ្ទះសងថ្មី តាមផ្លូវលេខ៣៧១ ស្ថិតក្នុងភូមិអូរបែកក្អម សង្កាត់អូរបែកក្អម ខណ្ឌសែនសុខ រាជធានីភ្នំពេញ ខណៈពេលដែលអង្គរក្សរបស់លោកដួង តារា បានភា្ញក់ឡើង បន្ទាប់ពីឮសំឡេងវាយកញ្ចក់រថយន្ត។
រថយន្តមួយគ្រឿងដែលត្រូវបានក្រុមជនសង្ស័យលួចវាយកម្ទេចកញ្ចក់ខាងលើនេះម៉ាកឡិចស៊ីស RX៣៥០ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ ២BM-៥៨៨៨ ទើបតែទិញបានប្រមាណ១ខែ ក្នុងតម្លៃ១០៥.០០០ដុល្លារ ។ នេះបើតាមការអោយដឹងពីអ្នកបើកបរ ។
តាមរយៈការបង្ហោះសារលើបណ្តាញសង្គមហ្វេសប៊ុករបស់លោក ដូង តារា បានអោយដឹងថា «លើកទី២ហើយដែលចោរមកបំផ្លាញដល់ផ្ទះ ភ្ញាក់ពីគេងឃើញរថយន្តត្រូវបានបំផ្លាញដោយចោរ ពិតគួរអោយសោកស្តាយយ៉ាងខ្លាំង»។ «ខ្ញុំសារកាមេរ៉ាមើលយប់មិញរវាងម៉ោង 1:30យប់ មានចោរពាក់ម៉ាស់ បានមកលួចកាត់កញ្ចក់ឡានខ្ញុំទាំងសងខាង ហើយយកដុំថ្មបំបែកកញ្ចក់ឡានខាងស្តាំដែលចតនៅមុខផ្ទះដែលខ្ញុំកំពុងរស់នៅសព្វថ្ងៃ»។
នៅក្នុងសារដែលបង្ហោះនោះក៍បានបញ្ជាក់ថា « កាលពីខ្ញុំមកនៅទីនេះដំបូងក៏ធ្លាប់មានចោរចូលពីលើដំបូលផ្ទះមកក្នុងផ្ទះ ។ គួរអោយសោកស្តាយចំពោះអ្វីដែលបានកើតឡើងសម្រាប់ខ្ញុំ ខ្ញុំពិតជាមានការបារម្ភចំពោះសុវត្ថិភាពរស់នៅ»។
តាមប្រភពពីកងអង្គរក្សរបស់លោក ដួងតារា បានអោយដឹងថា នៅវេលាម៉ោងប្រមាណ៣ឈានចូលព្រេឹកថ្ងៃទី១៥ មករា ពេលគាត់ភ្ញាក់ពីដំណេក ក៍បានឭសំឡេងវាយកញ្ចក់រថយន្ត ហើយក៍បានបើកទ្វារចេញមកមើល ស្រាប់តែជនសង្ស័យបានគេចខ្លួនបាត់អស់ ។
តាមប្រភពដដែលបានអោយដឹងបន្តថា ជនសង្ស័យមានគ្នាចំនួន២នាក់ជិះម៉ូតូមួយគ្រឿងមកឈប់ក្បែរនោះ រួចធ្វើសកម្មភាពលួចចកាច់យកកញ្ចក់មើលផ្លូវទាំងសងខាងទៅបាត់ ។ លុះក្រោយមក ក៍បានយកដុំថ្មមកវាយកញ្ចក់ខាងស្តាំចំនួន៤ដុំថ្ម ក្នុងគោលបំណងបើកទ្វារចូលលួចរបស់របរដែរ ប៉ុន្តែមិនទាន់បានចូលទេ ក៍បាននាំគ្នាគេចខ្លួនបាត់អស់។
គួរបញ្ជាក់ថា រថយន្តមួយគ្រឿងខាងលើនោះបានចតទុកនៅមុខផ្ទះកណ្តាលវាល ក្បែរចិញ្ចើមផ្លូវ ដោយពុំមានរបងបិទបាំងនោះទេ ទំនងជាគិតថា ចោរមិនហ៊ានលួច ។
បន្ទាប់ពីមានការបង្ហោះសារនៅក្នុងបណ្តាញសង្គមនោះ នៅព្រឹកថ្ងៃទី១៥ ខែមករា ឆ្នាំ ២០២១ លោកវរៈសេនីយ៍ឯក ហួរ ម៉េងវ៉ាង អធិការនគរបាលខណ្ឌ សែនសុខ ព្រមទាំង នាយប៉ុស្តិ៍ កម្លាំងជំនាញនិងកងរាជអាវុធហត្ថខណ្ឌក៍បានចុះទៅសាកសួរ ដើម្បីស្រាវជ្រាវ ឃាត់ជនជនសង្ស័យ មកកាត់ទោសតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ