រាជធានីភ្នំពេញ ៖ រថយន្តម៉ាកឡិចស៊ីស RX៣០០ មួយគ្រឿង បានជ្រុលទៅបុករថយន្តម៉ាកព្រូស ដែលឈប់ពេលផ្លូវកំពុងស្ទះពីក្រោយ ហើយរថយន្តម៉ាកព្រូសនោះក៏ជ្រុលទៅបុករថយន្តឡិចស៊ីស៤៥០មួយគ្រឿងទៀតដែលឈប់នៅពីមុខ បណ្តាលឱ្យរងការខូចខាត យ៉ាងដំណំ…
រាជធានីភ្នំពេញ ៖ រថយន្តម៉ាកឡិចស៊ីស RX៣០០ មួយគ្រឿង បានជ្រុលទៅបុករថយន្តម៉ាកព្រូស ដែលឈប់ពេលផ្លូវកំពុងស្ទះពីក្រោយ ហើយរថយន្តម៉ាកព្រូសនោះក៏ជ្រុលទៅបុករថយន្តឡិចស៊ីស៤៥០មួយគ្រឿងទៀតដែលឈប់នៅពីមុខ បណ្តាលឱ្យរងការខូចខាត យ៉ាងដំណំ ។
ហេតុការណ៍ខាងលើនេះបានកើតឡើងកាលពីវេលាម៉ោង៧យប់ថ្ងៃទី១៤ ខែមករា ឆ្នាំ២០២១ នៅចំណុចជិតធនាគារមួយកន្លែង តាមបណ្តោយផ្លូវម៉ៅសេទុង កែងផ្លូវ១១៣ ស្ថិតក្នុងសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេឃើញរថយន្ត២គ្រឿងបានធ្វើដំណើរតាមបណ្ដោយផ្លូវម៉ៅសេទុង ក្នុងទិសដៅពីជើងទៅត្បូងដោយរថយន្តមួយគ្រឿងម៉ាកឡិចស៊ីស៤៥០ ពណ៌ខ្មៅ ពាក់ស្លាកលេខ ភ្នំពេញ 2R-5551 បើកនៅខាងមុខ ចំណែករថយន្តមួយគ្រឿងទៀតម៉ាកព្រូស ពណ៌ស្ករ ពាក់ស្លាកលេខ បាត់ដំបង 2B 8043 បើកនៅខាងក្រោយ ។
តាមប្រភពខាងលើបានបន្តថា លុះមកដល់ចំណុចកើតហេតុ រថយន្តទាំង២គ្រឿងបានឈប់ ខណៈផ្លូវកំពុងតែស្ទះបន្តិចត្រង់ចំណុចកែងអក្សរ.តេ ហើយគាប់ជួនស្រាប់តែមានបុរសម្នាក់បានរថយន្តម៉ាកឡិចស៊ីស RX300 ពណ៌ស្ករ ពាក់ស្លាកលេខ ភ្នំពេញ 2AM-0133 ធ្វើដំណើរមកពីក្រោយ ក្នុងល្បឿនលឿនជាន់ហ្វ្រាំងមិនទាន់ ក៍ជ្រុលទៅបុកគូថរថយន្ត
ព្រូស បណ្ដាលឲ្យរថយន្តព្រូសជ្រុលទៅបុកគូថរថយន្តឡិចស៊ីស៤៥០ បណ្តាលឱ្យរងការខូចខាតផ្នែកខាងក្រោយ ចំណែករថយន្តម៉ាកព្រូសបានរងការខូចខាតខ្ទេចផែ្នកខាងមុខ និងផ្នែកខាងក្រោយធ្ងន់ធ្ងរគួរសម ។
តាមប្រភពខាងលើបានបន្តទៀតថា ដោយឡែករថយន្តបង្កម៉ាកឡិចស៊ីស RX 300 បានរងការខូចខាតផែ្នកខាងមុខ ដោយកៀបជាប់រថយន្តម៉ាកព្រូស ហើយក្នុងហេតុការណ៍នេះដែរ មិនបណ្ដាលឲ្យមានគ្រោះថ្នាក់ដល់មនុស្សដែលជិះនៅក្នុងរថយន្តនោះទេ ។
ភ្លាមៗនោះដែរ ភាគីទាំងសងខាងបានសម្របសម្រួលគ្នាមួយជំហាន ដោយខាងរថយន្ត
ម៉ាកឡិចស៊ីស RX300 បានសងទៅខាងរថយន្តឡិចស៊ីស450 ដែលរងការខូចខាតបន្តិចបន្តួច ចំនួន១០០ដុល្លារដើម្បីបញ្ចប់រឿង ហើយក៏បើករថយន្តចេញទៅបាត់ ។
ក្រោយពេលកើតហេតុ នៅសល់តែរថយន្តម៉ាកព្រូសដែលរងការខូចខាតធ្ងន់ធ្ងរជាង ដោះស្រាយគ្នាមិនត្រូវ ទើបសមត្ថកិច្ចសំរេចធ្វើការវាស់វែងរួចយកទៅរក្សាទុកនៅការិយា
ល័យនគរបាលចរាចរណ៍ជើងគោកនៃស្នងការរាជធានីភ្នំពេញ ដើម្បីរង់ចាំធ្វើការដោយស្រាយគ្នានៅពេលក្រោយជាបន្តទៀត ៕ (កែសម្រួលដោយ ៖ ធីតា)
ចែករំលែកព័តមាននេះ