ល្បែងនយោបាយនៃការវិលត្រឡប់មកវិញរបស់ក្រុមប្រឆាំង
- ភ្នំពេញ
ភ្នំពេញ៖ អតីតអនុប្រធានអតីតគណក្សសង្គ្រោះជាតិ លោកស្រី មូរ សុខហួរ ដើមឡើយ បានប្រកាសថា នឹងវិលត្រឡប់ចូលប្រទេសកម្ពុជា នៅថ្ងៃទី៤ ខែមករា…
ភ្នំពេញ៖ អតីតអនុប្រធានអតីតគណក្សសង្គ្រោះជាតិ លោកស្រី មូរ សុខហួរ ដើមឡើយ បានប្រកាសថា នឹងវិលត្រឡប់ចូលប្រទេសកម្ពុជា នៅថ្ងៃទី៤ ខែមករា…
ភ្នំពេញ៖ អតីតអនុប្រធានអតីតគណក្សសង្គ្រោះជាតិ លោកស្រី មូរ សុខហួរ ដើមឡើយ បានប្រកាសថា នឹងវិលត្រឡប់ចូលប្រទេសកម្ពុជា នៅថ្ងៃទី៤ ខែមករា ឆ្នាំ២០២១។ ប៉ុន្តែជិតដល់ថ្ងៃទី៤មករា បែរជាលោកស្រី ប្រកាសពន្យារ ដោយសំអាងថា ក្រុមហ៊ុនអាកាសចរណ៍ ដែលលោកស្រី កក់សំបុត្រយន្តហោះ បានលើកពេល។
ក្រោយមក អតីតបក្សសង្គ្រោះជាតិ បានប្រកាសថា លោកស្រី មូរ សុខហួរ នឹងចេញដំណើរពីអាមេរិក នៅថ្ងៃទី១៥ ខែមករា ឆ្នាំ២០២១ ហើយគ្រោងនឹងមកដល់ភ្នំពេញ នៅថ្ងៃទី១៧ ខែមករា ឆ្នាំ២០២១។
ដំណឹងចុងក្រោយ ដែលហាក់ដូចជាច្បាស់លាស់នេះ ក៏គ្រាន់តែជាដំណឹង ដែលមហាជនទូទាំង រួមទាំងលោកស្រី មូរ សុខហួរ និងបក្សប្រឆាំងខ្លួនឯង ដឹងហើយថា លោកស្រី មូរ សុខហួរ ក៏មិនខុសពីករណីលោកសមរង្ស៊ី អំឡុងថ្ងៃទី៩ ខែវិច្ឆិកា ឆ្នាំ២០១៩ ប៉ុន្មានឡើយ។ គឺមកតែខ្យល់ប៉ុណ្ណោះ។
ករណីលោកស្រី មូរ សុខហួរ ពេលនេះ អាចថា លោកស្រី ឡើងយន្តហោះ ថតបង្ហោះ ហ្វេសប៊ុក ផ្តល់សម្ភាសន៍ដល់អ្នកកាសែត។ តែលោកស្រី នឹងមិនបានជាន់ដីកម្ពុជាឡើយ។ អាចទី១ មកពីរដ្ឋាភិបាលកម្ពុជា ចាត់វិធានការ ទប់ស្កាត់ មិនឲ្យលោកស្រី មកបាន ដូចករណីលោកប្រធានរបស់លោកស្រី កាលពីថ្ងៃទី៩វិច្ឆិកា ឆ្នាំ២០១៩ គឺមកបានត្រឹមតែម៉ាឡេស៊ី ហើយក៏ឡើងយន្តហោះ ទៅផ្ទះនៅបារាំងវិញ។
ហេតុផលមួយទៀត លោកស្រី មូរ សុខហួរ អាចឆ្លើយលួងចិត្តអ្នកគាំទ្រថា រដ្ឋាភិបាល មិនផ្តល់សុពលភាពលើលិខិតឆ្លងដែន និងមិនផ្តល់ទិដ្ឋាការឲ្យលោកស្រី រួមទាំងថ្នាក់ដឹកនាំ បក្សប្រឆាំងដទៃទៀត វិលចូលស្រុកឡើយ។ ហេតុផលនេះ ក៏សមហេតុសមផល ដែលអាចធ្វើឲ្យអ្នកគាំទ្របក្សប្រឆាំង មិនគិតថា លោកស្រី មូរ សុខហួរ ខ្លាចមិនហ៊ាន វិលចូលប្រទេសវិញទេ តែមកពីរដ្ឋាភិបាលទេតើ ដែលមិនអនុញ្ញាត។
ក៏ប៉ុន្តែមែនទែនទៅ លោកស្រី មូរ សុខហួរ គឺស្ថិតក្នុងចំណោមអតីតមេដឹកនាំជាន់ខ្ពស់ច្រើននាក់ផ្សេងទៀត ដែលកំពុងរងបណ្ដឹងជាច្រើនករណី នៅក្នុងតុលាការកម្ពុជា។ ដីកាចាប់ ខ្លួនលោកស្រី មូរ សុខហួរ និងអតីតថ្នាក់ដឹកនាំកំពូលៗដទៃទៀត ក៏តុលាការ ប្រគល់ ឲ្យប៉ូលិសរួចហើយ។
អតីតមេដឹកនាំបក្សប្រឆាំង នៅក្រៅប្រទេស មានទាំងលោកស្រី មូរ សុខហួរ ក្រោមការដឹកនាំ របស់លោកសមរង្ស៊ី ត្រូវបានតុលាការកម្ពុជា ចោទប្រកាន់ពីបទធ្វើសកម្មភាពក្នុងការធ្វើឲ្យ មានរដ្ឋប្រហារទម្លាក់រាជរដ្ឋាភិបាល តាមរយៈការអំពាវនាវឲ្យកងកម្លាំងប្រដាប់អាវុធ បែរ កាណុង ទៅនាយករដ្ឋមន្ត្រី ដែលកើតចេញពីការបោះឆ្នោត។
ការបញ្ចប់សុពលភាពលិខិតឆ្លងដែនរបស់អតីតថ្នាក់ដឹកនាំអតីតបក្សប្រឆាំង មានទាំងលោក ស្រី មូរ សុខហួរ ត្រូវបានមន្ត្រីជាន់ខ្ពស់រាជរដ្ឋាភិបាលកម្ពុជា ចាត់ទុកថា ក្រុមអតីត មេបក្ស ប្រឆាំង គឺជាជនល្មើស និងជាអ្នកដែលមានដីការបង្គាប់ឱ្យចាប់ខ្លួន ដែលជាគោល ការណ៍ ច្បាប់ព្រហ្មទណ្ឌអន្តរជាតិ អនុវត្តជាទូទៅ ក្នុងការទប់ស្កាត់ និងបង្រ្កាបបទល្មើស និងឧក្រិដ្ឋកម្មឆ្លងដែន ក្នុងគោលដៅរារាំង និងទប់ស្កាត់ជនល្មើសទាំងនោះ កុំឱ្យមានលទ្ធភាព រត់គេចខ្លួនបានពីប្រទេសមួយ ទៅប្រទេសមួយទៀត និងដើម្បីអាចចាប់ខ្លួន និងឃាត់ខ្លួនជន ល្មើសទាំងនោះយកមកអនុវត្តទោស តាមនីតិវិធីច្បាប់ នៅប្រទេសសាមី ដែលស្នើសុំ វិញបាន។
យ៉ាងណាក៏ដោយ ករណីលោកស្រី មូរ សុខហួរ និងអតីតថ្នាក់ដឹកនាំគណបក្សប្រឆាំងនេះ រាជរដ្ឋាភិបាលកម្ពុជា មិនបានតាមចាប់ខ្លួនដល់ស្រុកគេនោះទេ។ តែវិធានការជាច្រើនរបស់រាជរដ្ឋាភិបាល ត្រូវបានដាក់ចេញ ដើម្បីត្រៀមទល់ស្កាត់ការប៉ុនប៉ងវិលត្រឡប់របស់លោកស្រីមូរសុខហួរ នាថ្ងៃទី១៥-១៧មករា ឆ្នាំ២០២១ ដូចករណីលោកសមរង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩ ដែរ។
កាលណោះ មិនត្រឹមតែមិនបានមកកម្ពុជាតាមការប្រកាសទេ តែលោកសមរង្ស៊ី បានធ្វើឲ្យសកម្មជនជាច្រើននៅក្នុងស្រុក ត្រូវជាប់ឃុំ និងខ្លះជាប់បណ្តឹង នៅតុលាការ ដែលកំពុងដំណើរការកាត់ទោស មកដល់សព្វថ្ងៃ។
លោកស្រី មូរ សុខហួរ ជាមនុស្សម្នាក់ ក្នុងចំណោមថ្នាក់ដឹកនាំអតីតគណបក្សសង្រ្គោះ ជាតិចំនួន ៣៩នាក់ ដែលត្រូវក្រសួងការបរទេសកម្ពុជា ធ្វើមោឃភាពលិខិតឆ្លងដែនខ្មែររបស់ ពួកគេ កាលពីចុងឆ្នាំ២០១៩ ។
លោកស្រី មូរ សុខហួរ មានសញ្ជាតិអាមេរិកាំង កំពុងពឹងលើលិខិតឆ្លងដែនអាមេរិកាំង ដើម្បីធ្វើដំណើរមកកម្ពុជា តាមអ្វីដែលលោកស្រី អះអាង។ លោកស្រី មូរ សុខហួរ ប្រកាសថា នឹងរកគ្រប់មធ្យោបាយវិលមកកម្ពុជាវិញ ដើម្បីវិលមកតតាំង ជាមួយប្រព័ន្ធយុត្តិធម៌ នៅកម្ពុជា។
ប៉ុន្តែគម្រោងមាតុភូមិនិវត្តន៍របស់លោកស្រី មូរ សុខហួរ ក៏ទំនងជាមិនខុសពីករណីលោកសមរង្ស៊ី ប៉ុន្មានឡើយ។ ជាគម្រោងមាតុភូមិនិវត្តន៍ បែបបោកប្រាស់អ្នកគាំទ្រប៉ុណ្ណោះ។ បោកប្រាស់ហើយ មិនមានកំហុសទៀត ព្រោះបានទម្លាក់កំហុសនោះ មកពីរាជរដ្ឋាភិបាលកម្ពុជាថា បានរារាំង តាមរយៈការធ្វើមោឃភាពលិខិតឆ្លងដែន ឬក៏ដាក់កម្លាំងទប់ស្កាត់ ជាដើម។ល។
បើទុកជាលោកស្រី មូរ សុខហួរ មានលទ្ធភាពអាចវិលត្រឡប់មកដល់ភ្នំពេញបានមែន នោះគឺលោកស្រី ក៏ដូចជាអតីតថ្នាក់ដឹកនាំបក្សប្រឆាំងដទៃទៀត រួមទាំងលោកសមរង្ស៊ី តើមានសេចក្តីក្លាហាន នឹងទៅដេកគុកព្រៃស ដែរ ឬទេ? ខណៈដែលអ្នកទាំងនោះ មានដីកាចាប់ខ្លួន ក្នុងសំណុំរឿងជាច្រើនរួចហើយ។
ទៅថ្ងៃមុខ ច្បាស់ណាស់ថា អស់ពីលោកស្រី មូរ សុខហួរ ក៏នៅមានលោក អេង ឆៃអ៊ាង ឬក៏លោកនេះ លោកស្រីនោះថែមទៀត ដែលនឹងប្រកាសពីគម្រោងមាតុភូមិនិវត្តវិលចូលស្រុកវិញ។ ដំណឹងនៃគម្រោងមាតុភូមិនិវត្តនេះ បក្សប្រឆាំង មិនខាតបង់ឡើយ ទោះជា ជិះយន្តហោះ បានមកដល់ភ្នំពេញ ឬក៏មិនអាចមកក៏ដោយ។
រីឯរាជរដ្ឋាភិបាល ចាំតែខាតរហូត។ បើមិនខាតអ្វីទេ ក៏ខាតពេល និងចាត់កម្លាំងយាមកាម ត្រៀមការពារសន្តិសុខដល់អតីតថ្នាក់ដឹកនាំបក្សប្រឆាំងទាំងនោះដែរ។
ករណីលោកស្រី មូរ សុខហួរ នេះ កងកម្លាំងប៉ូលិសជាច្រើននាក់ ត្រូវបានចាត់តាំងឲ្យយាមប្រចាំការឆ្លាស់វេនគ្នា ២៤ម៉ោង លើ ២៤ម៉ោង ទាំងយប់ និងទាំងថ្ងៃ នៅអាកាសយានដ្ឋានអន្តរជាតិភ្នំពេញ ចាប់តាំងពីចុងខែធ្នូ ឆ្នាំ២០២០ រហូតមកដល់ពេលនេះ។
ប៉ុន្តែទោះបីជាយ៉ាងណាក៏ដោយចុះ ល្បែងនយោបាយមួយនេះ អាចនឹងសាបរលាប ទៅតាមពេលវេលា ដូចដែលអ្វីដែលបានកើតឡើង ចំពោះលោក សម រង្ស៊ី។
ល្បិចកលនយោបាយ ដែលមានការភូតភរ នឹងធ្វើអោយខាតបង់រយៈពេលវែង ដោយសារតែវានឹងអាចធ្វើអោយសឹករិចរិលដល់ការទុកចិត្តពីអ្នកគាំទ្រ៕ ដោយ៖ មុត ស្រីពៅ
ចែករំលែកព័តមាននេះ