រាជធានីភ្នំពេញ ៖ យុវជនម្នាក់ផឹកស្រាបៀរអស់៦កំប៉ុងស្រវឹងធ្លាក់ភ្នែកជិះម៉ូតូលឿនដួលតែម្នាក់ឯង បណ្តាលឱ្យរងរបួសស្រាល ត្រូវបានប្រជាពលរដ្ឋនាំគ្នាជួយលើកម៉ូតូឲ្យជិះបន្តដំណើរទៅមុខទៀត បែរជាមិនអរគុណ ហើយជិះម៉ូតូរោទិ៍សំឡេងឌឺ ថែមទាំងជិះបង្ហោះក៏ជ្រុលទៅបុករថយន្តម៉ាកឡិចស៊ីសមួយគ្រឿងដែលឈប់រង់ចាំភ្លើងស្តុប បណ្តាលឱ្យរងការខូចខាត។
ហេតុការណ៍ខាងលើនេះបានកើតឡើងកាលពីវេលាម៉ោង១១យប់ថ្ងៃទី១៣ ខែមករា ឆ្នាំ២០២១ នៅចំណុចស្តុបក្តាន់ពីរ ផ្លូវសហព័ន្ធរុស្សី សង្កាត់ស្រះចក ខណ្ឌដូនពេញ រាជធានីភ្នំពេញ ។
យុវជនខាងលើនេះមានឈ្មោះ បញ្ញា អាយុ23ឆ្នាំ មុខរបរកូនជាងកាត់កញ្ចក់ ស្នាក់នៅសង្កាត់ទឹកថ្លា ខណ្ឌសែនសុខ ជិះម៉ូតូម៉ាកស៊ុយហ្សុ៊យគីនិក ពណ៌ស ពាក់ស្លាកលេខ ភ្នំពេញ 1DE-2988 និងបាននិយាយថា រូបគាត់ហូបស្រាបៀរអស់៦កំប៉ុង ។
យោងតាមប្រភពពត៌មានពីប្រជាពលរដ្ឋដែលឃើញហេតុការណ៍ផ្ទាល់បានប្រាប់អោយដឹងថា មុនកើតហេតុ ពួកគាត់ឃើញយុវជនម្នាក់ខាងលើជិះម៉ូតូក្នុងល្បឿនលឿន ធ្វើដំណើរតាមបណ្តោយមហាវិថីសហព័ន្ធរុស្ស៊ី ក្នុងទិសដៅពីលិចទៅកើត លុះមកដល់កន្លែងកើតហេតុបានដួលតែម្នាក់ឯង បណ្តាលឱ្យរងរបួសស្រាល ។
តាមប្រភពដដែលបានបន្តថា បន្ទាប់ពីឃើញយ៉ាងដូច្នោះ ពួកគាត់នាំគ្នាជួយលើកម៉ូតូយុវជនខាងលើអោយបន្តដំណើរទៅមុខបន្តទៀត តែបែរជាយុវជនរូបនោះមិនបានអរគុណពួកគាត់ឡើយ ថែមទាំងជិះម៉ូតូរោទិ៍សំឡេងឌឺដាក់ពួកគាត់ទៀត នៅមិនអស់ចិត្តទេ យុវជនរូបនោះបានជិះម៉ូតូបង្ហោះឌឺដាក់ពួកគាត់ទៀត ហើយក៏ជ្រុលទៅបុក រថយន្តម៉ាកឡិចស៊ីស NXT200 មួយគ្រឿង ដែលធ្វើដំណើរបញ្ច្រាសទិសគ្នា តែកំពុងតែឈប់រង់ចាំភ្លើងស្តុប បណ្តាលឱ្យរងការខូចខាត ចំណែកម៉ូតូបង្កបានដួលរងការខូចខាតរីឯអ្នកបើកបរបានរងរបួសរលាត់ដៃជើង ។
ក្រោយពេលកើតហេតុ ដំបូងម្ចាស់រថយន្តបានទាមទារសំណងពីយុវជនខាងលើអោយជួសជុលរថយន្តសងគាត់ឡើងវិញដែរ តែដោយសារយុវជនរូបនោះស្រវឹង និងមិនមានប្រាក់ជាប់នឹងខ្លួនផងនោះ ទើបម្ចាស់រថយន្តក៏មិនចង់វែងឆ្ងាយ ក៏ព្រមយករថយន្តទៅជួសជុលដោយខ្លួនឯង និង ប្រគល់អ្នកបើកម៉ូតូទៅអោយសមត្ថកិច្ចអប់រំផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ