កូវីដ១៩៖ ខេត្តជាប់ព្រំដែនថៃ មានហានិភ័យខ្ពស់ តម្រូវអោយប្រយ័ត្នខ្លាំង!
- ភ្នំពេញ
ភ្នំពេញ៖ កាលពីព្រឹកថ្ងៃទី១៣ ខែមករា ឆ្នាំ២០២១ ក្រសួងសុខាភិបាល បានប្រកាសថា មានករណីវិជ្ជមានវីរុសកូវីដ១៩ថ្មី ចំនួន ៦នាក់ទៀត ដែលជាស្ត្រីពលករខ្មែរយើង…
ភ្នំពេញ៖ កាលពីព្រឹកថ្ងៃទី១៣ ខែមករា ឆ្នាំ២០២១ ក្រសួងសុខាភិបាល បានប្រកាសថា មានករណីវិជ្ជមានវីរុសកូវីដ១៩ថ្មី ចំនួន ៦នាក់ទៀត ដែលជាស្ត្រីពលករខ្មែរយើង…
ភ្នំពេញ៖ កាលពីព្រឹកថ្ងៃទី១៣ ខែមករា ឆ្នាំ២០២១ ក្រសួងសុខាភិបាល បានប្រកាសថា មានករណីវិជ្ជមានវីរុសកូវីដ១៩ថ្មី ចំនួន ៦នាក់ទៀត ដែលជាស្ត្រីពលករខ្មែរយើង ធ្វើដំណើរមកពីប្រទេសថៃ។
សេចក្តីប្រកាសព័ត៌មានរៀងរាល់ព្រឹករបស់អ្នកនាំពាក្យក្រសួងសុខាភិបាល បង្ហាញថា ស្ត្រីពលករទាំង ៦នាក់ ដែលទើបរកឃើញឆ្លងជំងឺកូវីដ១៩នោះ មានអាយុចាប់ពី ១៨ឆ្នាំ ដល់ ៣៦ឆ្នាំ មានស្រុកកំណើត នៅបាត់ដំបង និងនៅខេត្តព្រៃវែង។ ពួកគាត់ បានធ្វើដំណើរ មកពីប្រទេសថៃ ចូលមកដល់កម្ពុជា នៅថ្ងៃទី១០ និងថ្ងៃទី១១ ខែមករា ឆ្នាំ២០២១ តាមច្រកព្រំដែន ខេត្តបន្ទាយមានជ័យ និងខេត្តបាត់ដំបង។
គិតមកដល់ព្រឹកថ្ងៃទី១៣ ខែមករា មានពលករខ្មែរ មកពីប្រទេសថៃ រកឃើញកើតជំងឺកូវីដ១៩ សរុបចំនួន ៣៣នាក់។ ប៉ុន្តែក៏មានពលករ ១២នាក់ហើយ ត្រូវបានព្យាបាលជាសះស្បើយ ពីជំងឺកូវីដ១៩។
ដោយឡែក នៅទូទាំងប្រទេស គិតត្រឹមម៉ោង ៧ព្រឹក ថ្ងៃទី១៣ ខែមករា មានអ្នកឆ្លងជំងឺ កូវីដ១៩ សរុប ៣៩៨នាក់។ ក្នុងនោះ មានអ្នកជាសះស្បើយ ៣៧៦នាក់ និង ២២នាក់ កំពុងសម្រាកព្យាបាលនៅមន្ទីរពេទ្យ។
បើយើងមើលតាមប្រកាសព័ត៌មានរៀងរាល់ព្រឹករបស់អ្នកនាំពាក្យក្រសួងសុខាភិបាល គឺលទ្ធផលនៃការធ្វើតេស្តរកមេរោគកូវីដ១៩ លើពលករខ្មែរ ដែលបានឆ្លងដែន ចេញពី ប្រទេសថៃ ចូលមកស្រុកកំណើត តាមព្រំដែនគោក គឺត្រូវចំណាយពេលយូរជាង អ្នកចូលតាមយន្តហោះ។ អ្នកដំណើរតាមយន្តហោះ មកកម្ពុជា ត្រឹមតែ ១ថ្ងៃ គឺអាចដឹងលទ្ធផលនៃការធ្វើតេស្តរកមេរោគកូវីដ១៩ហើយ។
សម្រាប់ពលករខ្មែរ ដែលចេញពីប្រទេសថៃ ចូលមកកាន់ស្រុកកំណើតតាមច្រកព្រំដែនគោក នៅក្នុងខេត្តកោះកុង ប៉ៃលិន ពោធិ៍សាត់ បាត់ដំបង បន្ទាយមានជ័យ ឧត្តរមានជ័យ និងខេត្តព្រះវិហារ គឺត្រូវចំណាយពេលចាប់ពី ២ ទៅ ៣ថ្ងៃ ហើយខ្លះដល់ទៅ ៤ថ្ងៃ ក៏មាន ទើបអាចដឹងលទ្ធផលនៃការធ្វើតេស្តរកមេរោគកូវីដ១៩។ ពោលគឺវត្ថុសំណាកទាំងនោះ ត្រូវបានគេដឹកជញ្ជូនតាមរថយន្តពីច្រកព្រំដែន តាមបណ្តាខេត្តនានា មកកាន់វិទ្យាស្ថាន ប៉ាស្ទ័រកម្ពុជា នៅភ្នំពេញ។
ការដឹកជញ្ជូននេះ ត្រូវចំណាយពេលយ៉ាងហោចណាស់ ១ថ្ងៃ ហើយការពិនិត្យវិភាគ នៅប៉ាស្ទ័រ ត្រូវចំណាយពេល ១ថ្ងៃទៀត។ ដូច្នេះលឿនបំផុត ក៏ត្រូវចំណាយពេលដល់ទៅ ២ថ្ងៃដែរ ទើបគេអាចដឹងលទ្ធផលធ្វើតេស្តលើពលករខ្មែរ ដែលចូលតាមច្រកព្រំដែនគោក រវាងកម្ពុជា និងថៃ។ នេះយើងគិតថា លទ្ធផល នឹងត្រូវបញ្ជូនត្រឡប់ទៅវិញលឿន ដោយប្រើប្រាស់ខ្សែទំនាក់ទំនងពិសេស ឬក៏តាមប្រព័ន្ធតេឡេក្រាម រវាងខ្សែបណ្តោយរបស់មន្ទីរសុខាភិបាល ឬក៏អាជ្ញាធរខេត្តពាក់ព័ន្ធទាំងអស់នោះ ដោយមិនចាំបាច់ដល់ថ្នាក់យកឯកសារជាក្រដាស ដឹកជញ្ជូនតាមឡាន ចេញពីភ្នំពេញវិញនោះទេ។
គិតចាប់ពីថ្ងៃទី២០ ខែធ្នូ ឆ្នាំ២០២០ រាជរដ្ឋាភិបាល ក្រោមការដឹកនាំបញ្ជាផ្ទាល់ពីសម្តេចតេជោ នាយករដ្ឋមន្ត្រី ហ៊ុន បានដាក់ចេញនូវវិធានការបន្ទាន់ ដើម្បីទប់ស្កាត់ការឆ្លងរាលដាលជំងឺកូវីដ១៩ ពីប្រទេសថៃ ចូលមកកម្ពុជាយើង ខណៈដែលថៃ ផ្ទុះការឆ្លងរាលដាលសហគមន៍ នៅខេត្តសាមុតសាខុន។
ការរឹតបន្តឹងតាមច្រកព្រំដែនគោក ត្រូវបានធ្វើឡើង ដោយអាជ្ញាធរសមត្ថកិច្ច ពិសេសក្រុមគ្រូពេទ្យ បានប្រចាំការ ២៤ម៉ោង លើ ២៤ម៉ោង ដើម្បីត្រួតពិនិត្យសុខភាពលើអ្នកដំណើរ ចូលមកកម្ពុជា ដែលជាពលករខ្មែរយើង។ ក្រៅពីពិនិត្យសុខភាព យកវត្ថុសំណាក ដើម្បីធ្វើតេស្ត រកមេរោគកូវីដ១៩ គឺពលករទាំងអស់ ត្រូវបានដឹកជញ្ជូនតាមរថយន្តយោធា ទាំងឡានៗ ចេញពីច្រកព្រំដែន តាមបណ្តាខេត្តជាប់ព្រំដែនថៃ ទៅកាន់មណ្ឌលចត្តាឡីស័ក ដែលគេរៀបចំនៅតាមបណ្តាខេត្តទាំងនោះ។
ដំបូងៗ មានករណីពលករឆ្លងដែន រួចធ្លាយ ទៅដល់ស្រុកកំណើតខ្លះដែរ។ មួយចំនួនធំទៀត ត្រូវបានគេដឹកជញ្ជូនតាមរថយន្តយោធា យកពលករ ដែលបានធ្វើតេស្តរួច មិនមានវីរុសកូវីដ១៩ យកទៅធ្វើចត្តាឡីស័ក នៅតាមខេត្តស្រុកកំណើតរបស់ពលករទាំងនោះ។ តែចំណាត់ការដំបូងៗនេះ ត្រូវបានសម្តេចនាយករដ្ឋមន្ត្រី ហ៊ុន សែន ប្រកាសហាមឃាត់ និងបញ្ឈប់ការដឹកជញ្ជូនពលករទាំងនោះ ចេញពីព្រំដែនទៀត ហើយតម្រូវឲ្យធ្វើចត្តាឡីស័ក គ្រប់រយៈពេល ១៤ថ្ងៃ នៅខេត្តជាប់ព្រំដែនថៃតែម្តង។ ធ្វើដូច្នេះ ដើម្បីការពារ ក្រែងលោថ្លោះធ្លោយ ដោយប្រការណាមួយ នាំឲ្យឆ្លងចូលសហគមន៍នៅកម្ពុជាយើងជាថ្មី។
ចំណាត់ការនេះ ត្រូវបានអនុវត្តប្រកបដោយប្រសិទ្ធភាព និងមានទំនុកចិត្តជាងមុន។ ប៉ុន្តែបណ្តាខេត្តជាប់ព្រំដែនថៃ ក្នុងអំឡុងពេលនេះ និងបន្តទៅមុខទៀត ក៏មិនត្រូវប្រហែស ឬព្រលែងដៃឡើយ។ មូលហេតុ ដែលមិនត្រូវប្រហែស ដោយសារតែអ្នកកើតជំងឺកូវីដ១៩ ដែលជាពលករខ្មែរ បន្តរកឃើញជាបន្តបន្ទាប់ ហើយទាល់តែ ២-៣ ថ្ងៃ រហូតដល់ករណីខ្លះ ៤ថ្ងៃ ទើបលទ្ធផលធ្លាក់មកថែមទៀត។
ដូច្នេះអំឡុងពេលរង់ចាំលទ្ធផលធ្វើតេស្តនេះ ទាមទារឲ្យអាជ្ញាធរសមត្ថកិច្ចខេត្ត ជាប់ព្រំដែនទាំងអស់ ត្រូវបង្កើនការយកចិត្តទុកដាក់ខ្ពស់។ ពោលគឺចាប់តាំងពីមាត់ច្រកព្រំដែន រហូតដល់ត្រួតពិនិត្យសុខភាពពលករ និងអ្នកដំណើរ មកពីថៃ ត្រូវធ្វើដោយប្រុងប្រយ័ត្នខ្ពស់។
ការដឹកជញ្ជូន ចេញពីច្រកព្រំដែន ទៅកាន់មណ្ឌលចត្តាឡីស័ក រួមទាំងការស្នាក់នៅក្នុង មណ្ឌលចត្តាឡីស័ក ក៏ត្រូវរក្សាឲ្យបាននូវវិធានសុខាភិបាលយ៉ាងហ្មត់ចត់ តាមរយៈពាក់ម៉ាសជានិច្ច ទាំងអស់គ្នា ឧស្សាហ៍ឲ្យពលករលាងសម្អាតដៃ ពិសេសបាញ់អាល់កុល ឬជែលសម្លាប់មេរោគ និងត្រូវរក្សាគម្លាតជាចាំបាច់ យ៉ាងតិចបំផុត ១ម៉ែត្រកន្លះ ពីម្នាក់ ទៅម្នាក់។
នៅពេលតម្រង់ជួរបំពេញបែបបទ ក៏ដូចជាអង្គុយរង់ចាំវាស់កម្តៅ យកវត្ថុសំណាក រហូតដល់ពេលឡើងឡាន ក៏ទាមទារឲ្យរក្សាគម្លាត ជាចាំបាច់បំផុត។ ឡានកងទ័ពដឹក ជញ្ជូនពលករ និងអ្នកដំណើរចេញពីច្រកព្រំដែននានា ទៅកាន់មណ្ឌលចត្តាឡីស័ក ក៏កុំដាក់ផ្ទុកមនុស្សច្រើន រហូតដល់ប្រជ្រៀតគ្នាឲ្យសោះ។ ស៊ូដឹកជញ្ជូនច្រើនជើងចុះ ដើម្បីការពារថា ក្រែងលោ មួយក្រុមណានោះ មាននរណាម្នាក់ កើតកូវីដ១៩ ដែលយើងមិនទាន់ដឹងលទ្ធផល តែបែរយើងប្រហែសតែបន្តិច នោះអាចនឹងនាំឲ្យមានអ្នកឆ្លងច្រើននាក់ ក្នុងពេលរង់ចាំលទ្ធផលធ្វើតេស្តនេះ។
មួយវិញទៀត អាជ្ញាធរសមត្ថកិច្ច នៅខេត្តជាប់ព្រំដែនថៃ ពិសេសខេត្តទាំង ៦ ដូចបានរៀបរាប់ខាងលើ ក៏ត្រូវចាត់កម្លាំងយាមល្បាតឲ្យបានហ្មត់ចត់ថែមទៀត តាមព្រំដែន ពិសេសនៅច្រករបៀងនានា កុំឲ្យមានអ្នកលួចឆ្លងដែនខុសច្បាប់។ ពេលនេះ តាមច្រកព្រំដែនផ្លូវការ យើងបានគ្រប់គ្រងបានល្អប្រសើរហើយ លើវិធានការរឹតបន្តឹង និងការត្រួតពិនិត្យ ដោយមិនមាននរណាម្នាក់ របូតរួចពីការត្រួតពិនិត្យ និងការធ្វើចត្តាឡីស័កនោះទេ។
ប៉ុន្តែបើសិនជាអាជ្ញាធរសមត្ថកិច្ចប្រហែសតែបន្តិច រួចរបូតពលករណា ចេញពីថៃ តាមច្រករបៀង ឬក៏ច្រកព្រំដែនណាមួយ ដោយមិនបានដឹង ហើយចូលដល់ក្នុងប្រទេសយើង រហូតដល់ស្រុកកំណើត។ នោះជាបញ្ហា។ បើសិនជាអ្នកនោះ ម្នាក់ ឬក៏ច្រើននាក់ មិនមានកើតកូវីដ១៩ គឺមិនអីទេ។ តែផ្ទុយទៅវិញ បើជននោះ កើតកូវីដ១៩ ហើយមិនបានដឹង បែរជាទៅពួនសង្ ងំរហូតដល់ស្រុកកំណើត នោះនឹងនាំឲ្យឆ្លងរាលដាលទៅក្រុមគ្រួសារ ហើយក៏អាចឆ្លងបន្តនៅ តាមសហគមន៍ផ្ទៃក្នុងប្រទេសយើងជាមិនខាន។
យ៉ាងណាក៏ដោយចុះ ក្នុងករណីមានអ្នកធ្លាយចូលពីថៃ ទៅដល់ផ្ទះនៅស្រុកកំណើត តាមបណ្តាខេត្តនានាមែននោះ ក៏គួរតែបុគ្គលនោះឯង ក៏ដូចជាក្រុមគ្រួសារ ឬក៏អ្នកជិតខាង រាយការណ៍បន្ទាន់ ទៅកាន់អាជ្ញាធរភូមិឃុំសង្កាត់ ដើម្បីឲ្យគ្រូពេទ្យ ចុះជួបអប់រំណែនាំ និងយកវត្ថុសំណាក ទៅពិនិត្យវិភាគ ធ្វើតេស្តរកមេរោគកូវីដ១៩។ ករណីនេះ កើតមានរួចមកហើយ កន្លងមក ហើយក៏ត្រូវបានចាត់វិធានការទាន់ពេលវេលា នៅមូលដ្ឋានផងដែរ។
សូមបន្តរួមគ្នា ទាំងអាជ្ញាធរសមត្ថកិច្ច ក្រុមគ្រូពេទ្យ ទាំងថ្នាក់ជាតិ ទាំងថ្នាក់ខេត្ត ពិសេសនៅតាមច្រកព្រំដែនទាំងអស់ ពិសេសបងប្អូនប្រជាពលរដ្ឋ និងពលករខ្មែរ ដែលបានឆ្លងដែនមកពីថៃ ដើម្បីយើងបន្តរួមគ្នាទប់ស្កាត់ការឆ្លងរាលដាលជំងឺកូវីដ១៩ ចូលក្នុងប្រទេសយើង ដូចអ្វីដែលយើង បានធ្វើដោយជោគជ័យ ក្នុងរយៈពេល ១ឆ្នាំកន្លងមកនេះ។
នោះគឺទោះបីជាយើងរកឃើញមានអ្នកកើតជំងឺកូវីដ១៩ រហូតដល់ទៅជិត ៤០០នាក់ ប៉ុន្តែកម្ពុជាយើង មិនមានការឆ្លងធ្ងន់ធ្ងរ រហូតដល់ទប់ស្កាត់ និងគ្រប់គ្រងលែងបាននោះទេ ហើយរឹតតែពិសេសទៀត គឺកម្ពុជា មិនទាន់មាននរណាម្នាក់ ស្លាប់ដោយជំងឺកូវីឌ១៩ ឡើយ៕ ដោយ៖ មុត ស្រីពៅ
ចែករំលែកព័តមាននេះ