បន្ទាយមានជ័យ៖ ផ្លូវ ដែលរងគ្រោះដោយទឹកជំនន់ខូចខាតជាច្រើនកន្លែង ត្រូវមន្ទីរជំនាញអះអាងថា បានស្នើសុំទៅក្រសួងហើយ តែមិនដឹងពេលណា ទើបក្រសួង សម្រេចជួសជុលនូវផ្លូវ ១ខ្សែ ដែលមានប្រវែងជិត ១០គីឡូម៉ែត្រ ស្របមាត់ស្ទឹង តភ្ជាប់ពីឃុំបត់ត្រង់ ទៅឃុំរហាត់ទឹក ស្រុកមង្គលបូរី។
ប្រជាពលរដ្ឋ ដែលឆ្លងកាត់ផ្លូវនេះ បានត្អូញត្អែរថា ផ្លូវកៅស៊ូ ដែលរងគ្រោះ ដោយទឹកជំនន់ កាលពីឆ្នាំ២០២០ តភ្ជាប់ពីឃុំបត់ត្រង់ ទៅឃុំរហាត់ទឹក ស្រុកមង្គលបូរី នឹងត្រូវជួសជុលកសាងឡើងវិញនោះទេ។ សព្វថ្ងៃ ប្រជាពលរដ្ឋ ដែលទៅមកឆ្លងកាត់ ពិតជាជួបការលំបាក ព្រោះមានជង្ហុកជ្រៅៗ។ ផ្លូវនេះ ទៅមកបានតែរថយន្តធំប៉ុណ្ណោះ។
ប្រជាពលរដ្ឋ បានថ្លែងអំណរគុណ ចំពោះអាជ្ញាធរស្រុកឃុំ ដែលបានជួយសម្រួលចាក់ដីលុបជង្ហុកកន្លងមក ដើម្បីអោយប្រជាពលរដ្ឋចរាចរណ៍ទៅមកបាន។ តែសង្ឃឹមថា មន្ទីរជំនាញ នឹងជួសជុលឡើងវិញ អោយបានឆាប់ ព្រោះផ្លូវកៅស៊ូ ១ខ្សែនេះ ប្រវែងប្រមាណជិត ១០គីឡូម៉ែត្រ ហើយជាផ្លូវដ៏សំខាន់ សម្រាប់ប្រជាពលរដ្ឋឆ្លងកាត់ពីខេត្តបន្ទាយមានជ័យ ទៅខេត្តបាត់ដំបង។
លោក ជា យុទ្ធារុណ ប្រធានមន្ទីរអភិវឌ្ឍន៍ជនបទ ខេត្តបន្ទាយមានជ័យ បានប្រាប់កោះសន្តិភាព នៅល្ងាចថ្ងៃទី១២ ខែមករា ឆ្នាំ២០២១ ថា ផ្លូវដែលតភ្ជាប់ពីឃុំបត់ត្រង់ ទៅឃុំរហាត់ទឹក ក្នុងស្រុកមង្គលបូរី ដែលរងការខូចខាតដោយទឹកជំនន់ឆ្នាំ២០២០នេះ ត្រូវបានធ្វើរបាយការណ៍ ជូនទៅក្រសួងជំនាញ ហើយស្នើសុំទៅក្រសួងហិរញ្ញវត្ថុ ដើម្បីធ្វើការជួសជុលឡើងវិញ។ តែមិនទាន់បានទទួលចម្លើយថា ក្រសួងនឹងទម្លាក់ថវិកាកសាងពេលណានៅឡើយទេ។
តែលោកប្រធានមន្ទីរ បញ្ជាក់ថា ពេលនេះ ខេត្តបន្ទាយមានជ័យ កំពុងជួសជុលកសាងផ្លូវចំនួន ១៣ខ្សែប្រវែងជាង ១០០គីឡូម៉ែត្រ ដែលរងគ្រោះដោយទឹកជំនន់ឆ្នាំ២០២០នេះ ដែលមានផ្លូវគ្រួសក្រហម ដែលកំពុងជួសជុលកសាងឡើងវិញ បាន ៧០ភាគរយហើយ។ ដោយឡែក ផ្លូវកៅស៊ូ ដែលតភ្ជាប់ពីឃុំបត់ត្រង់ ទៅឃុំរហាត់ទឹក ស្រុកមង្គលបូរី កំពុងរង់ចាំចម្លើយពីក្រសួងនៅឡើយ៕ ដោយ៖ ប៊ុន ធឿន
ចែករំលែកព័តមាននេះ