ខេត្តកំពង់ចាម៖ ក្រោមការយកចិត្តទុកដាក់ពីអាជ្ញាធរពាក់ព័ន្ធគ្រប់លំដាប់ថ្នាក់ និងក្រោមការយកចិត្តទុកដាក់ពីលោក អ៊ុន ចាន់ដា អភិបាលខេត្ត បានប្រែក្លាយផ្លូវដីក្រាលគ្រួសក្រហម នៅក្នុងស្រុកព្រៃឈរ និងស្រុកចំការលើ ជាផ្លូវកៅស៊ូ។ ផ្លូវ ដែលមានប្រវែងជិត ៤០ គីឡូម៉ែត្រ ដើម្បីជួយសម្រួលដល់ការលំបាករបស់ប្រជាពលរដ្ឋ នៅមូលដ្ឋាននេះ គឺជាកាដូ សម្រាប់ដល់ជូនពលរដ្ឋ មុនឱកាសបុណ្យចូលឆ្នាំប្រពៃណីជាតិខ្មែរ។
អភិបាលខេត្ត លោក អ៊ុន ចាន់ដា រួមនឹងសហការី បានអញ្ជើញចុះត្រួតពិនិត្យផ្លូវក្រាលកៅស៊ូ នាព្រឹកថ្ងៃទី១២ ខមករា ឆ្នាំ២០២១។
ផ្លូវមួយខ្សែនោះ កាត់តាមឃុំចំនួន៣ គឺឃុំក្រូច ឃុំគរ ឃុំថ្មពូននៃស្រុកព្រៃឈរ ដែលត្រូវបានក្រសួងអភិវឌ្ឍន៍ជនបទ ស្ថាបនាផ្លូវដីក្រាលក្រួសក្រហម នាពេលកន្លងទៅ។ រហូតមកដល់ពេលនេះ បានប្រែក្លាយទៅជាផ្លូវកៅស៊ូ មានប្រវែង១៤ គីឡូម៉ែត្រ និងផ្លូវមួយខ្សែទៀត តភ្ជាប់ពីថ្មពូន ទៅឃុំតាអុង ស្រុកចំការលើ ប្រវែងសរុប ២៥គីឡូម៉ែត្រ។
លោក ឡោ ចាន់លី អភិបាលស្រុកព្រៃឈរ បន្តថា ផ្លូវដែលអភិបាលខេត្តអញ្ជើញចុះពិនិត្យនេះ តាមគម្រោងផែនការ នឹងស្ថាបនារួចរាល់ មុនឱកាសបុណ្យចូលឆ្នាំប្រពៃណីជាតិខ្មែរខាងមុខ។ ផ្លូវនេះ ជាសរសៃឈាមដ៏សំខាន់ ងាយស្រួលដល់ប្រជាកសិករ នៅមូលដ្ឋានដឹកកសិផលពីកន្លែងមួយទៅកន្លែងមួយ ឬមកកាន់ទីផ្សារដោយឆាប់រហ័ស។
គួររំលឹកថា នាពេលកន្លងទៅ លោក អ៊ុន ចាន់ដា អភិបាលខេត្ត ពេលអញ្ជើញចុះពិនិត្យរមណីយដ្ឋានក្បាលទឹក នៅរមណីយដ្ឋានទឹកឆា ក្នុងស្រុកព្រៃឈរ ដោយសារផ្លូវដីហុយ ដែលបង្កលំបាកដល់ប្រជាពលរដ្ឋ ដែលទៅកម្សាន្តលេង ក៏បានប្រែក្លាយផ្លូវដី ទៅជាផ្លូវកៅស៊ូ។ នេះបង្ហាញឱ្យឃើញថា អាជ្ញាធរខេត្ត យកចិត្តទុកដាក់ខ្ពស់ ចំពោះការលំបាករបស់ពលរដ្ឋ។ បន្ទាប់មក អភិបាលខេត្ត បានបន្តបេសកកម្មចុះពិនិត្យផ្លូវ នៅស្រុកស្ទឹងត្រង់ បន្តទៀត នាព្រឹកថ្ងៃទី១២ ខែមករា ឆ្នាំ២០២១៕ ដោយ៖ ចាន់ ថេត
ចែករំលែកព័តមាននេះ