រាជធានីភ្នំពេញ ៖ លោក ម៉ូវ ម៉ានិត អភិបាលនៃគណៈអភិបាលខណ្ឌសែនសុខ បានប្រកាសនៅលើហ្វេសប៊ុករបស់លោក អោយដឹងថា «ខ្ញុំបាទ ម៉ូវ ម៉ានិត សូមធ្វើការបញ្ជាក់ជូនសាធារណជន មេត្តាជ្រាបថា នៅព្រឹកថ្ងៃទី១៣ ខែមករា ឆ្នាំ២០២១នេះ មានជនឆបោកបានប្រឌិតព័ត៌មានថា ម្តាយរបស់ខ្ញុំ បានទទួលមរណភាព ហើយដើរតាមបណ្តាទីតាំងអាជីវកម្មនានា ក្នុងខណ្ឌសែនសុខ ដើម្បីសុំថវិកាចូលបុណ្យ» ។
លោក ម៉ូវ ម៉ានិត បានបញ្ជាក់នៅថ្ងៃទី១៣ មករា ២០២១នេះថា «ខ្ញុំសូមធ្វើការថ្កោលទោសចំពោះជន ដែលបានប្រឌិតព័ត៌មាននេះ ក្នុងន័យបោកប្រាស់ថវិកាពីសាធារណជន ។ ជាមួយគ្នានេះ ខ្ញុំបានដាក់ពាក្យបណ្តឹងនៅអធិការដ្ឋាននគរបាលខណ្ឌសែនសុខ ដើម្បីចាប់ខ្លួនជនឆបោកនេះ មកទទួលទោសអោយខានតែបាន ។ អាស្រ័យហេតុនេះ សូមសាធារណជនមេត្តាជ្រាប និងកុំចាញ់បោកបុគ្គលខាងលើនេះ» ។
លោក ម៉ូវ ម៉ានិត ប្រកាសបែបនេះ បន្ទាប់ពីមានគណនីហ្វេសប៊ុកមួយឈ្មោះ Vannyroth Kheang បានសរសេរនិងអមដោយរូបភាព អោយដឹងថា មានបុរសម្នាក់ដើរ ប្រាប់បុណ្យថាម្តាយលោកចៅហ្វាយខណ្ឌសែនសុខស្លាប់ ធ្វើបុណ្យនៅខេត្តត្បួងឃ្មុំ ហើយគាត់មកប្រាប់បុណ្យ នៅក្រុមហ៊ុនរបស់ឈ្មោះ Vannyroth Kheang ថែមទាំងទារលុយចូលបុណ្យទៀត ៕
ចែករំលែកព័តមាននេះ