ប្រជាពលរដ្ឋ លើកគ្នា ទៅជួបរដ្ឋមន្ត្រីរ៉ែ និងថាមពល តែរដ្ឋមន្ត្រី គេចបាត់!
- មណ្ឌលគិរី
មណ្ឌលគិរី៖ តំណាងប្រជាពលរដ្ឋ ប្រមាណ ១០០នាក់ រស់នៅឃុំពូទុង ឃុំចុងផ្លាស់ ស្រុកកែវសីមា បានប្រមូលផ្ដុំគ្នា ដើម្បីស្នើសុំជួបលោក ស៊ុយ…
មណ្ឌលគិរី៖ តំណាងប្រជាពលរដ្ឋ ប្រមាណ ១០០នាក់ រស់នៅឃុំពូទុង ឃុំចុងផ្លាស់ ស្រុកកែវសីមា បានប្រមូលផ្ដុំគ្នា ដើម្បីស្នើសុំជួបលោក ស៊ុយ…
មណ្ឌលគិរី៖ តំណាងប្រជាពលរដ្ឋ ប្រមាណ ១០០នាក់ រស់នៅឃុំពូទុង ឃុំចុងផ្លាស់ ស្រុកកែវសីមា បានប្រមូលផ្ដុំគ្នា ដើម្បីស្នើសុំជួបលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ក្នុងពេលលោករដ្ឋមន្ត្រី មកបំពេញទស្សនកិច្ចការងារ នៅទឹកដីខេត្តមណ្ឌលគិរី។ ក្រុមប្រជាពលរដ្ឋ ស្នើសុំលោករដ្ឋមន្ត្រី ឲ្យអនុញ្ញាតឲ្យពួកគាត់ អាចប្រកបរបរជីករករ៉ែមាស លក្ខណៈគ្រួសារ ដែលមានតាំងពីបុរាណមកឡើងវិញ។ ការប្រមូលផ្តុំនេះ បានធ្វើឡើង នៅរសៀលថ្ងៃទី១២ ខែមករា ឆ្នាំ២០២១។
តំណាងអ្នកភូមិម្នាក់ បានលើកឡើងថា ប្រជាពលរដ្ឋរស់នៅក្នុងឃុំចុងផ្លាស់ មានចំនួនជាង ១០០០ គ្រួសារ បានពឹងផ្អែកទាំងស្រុងលើរបរជីករ៉ែមាស តាមគ្រួសារ ដើម្បីចិញ្ចឹមជីវិត ដោយសារតែដីធ្លីនៅតំបន់នេះ ក្រាលគ្របដោយថ្ម និងជាព្រៃឈើការពារដោយរដ្ឋ មិនអាចប្រកបរបរកសិកម្មបានទេ។
ការប្រកបរបរធ្វើអាជីវកម្មរ៉ែមាសលក្ខណៈគ្រួសារនេះ ត្រូវបានផ្អាកទាំងស្រុង កាលអំឡុងឆ្នាំ២០១៨ ដែលបានធ្វើឱ្យប៉ះពាល់យ៉ាងធ្ងន់ធ្ងរដល់ជីវភាពរបស់អ្នកភូមិ។ អ្នកភូមិ ដែលតែងតែអាស្រ័យលើការកិនថ្ម រ៉ែ ដើម្បីយកកម្ទេចរ៉ែមាស លក់ចិញ្ចឹមជីវិត។
ទោះជាយ៉ាងណាក៏ដោយ អ្នកភូមិនៅតែមានជំនឿយ៉ាងមុតមាំ លើសម្ដេចតេជោ តាមរយៈលោករដ្ឋមន្ត្រី នឹងផ្ដល់ឱកាសសម្រាប់ការប្រកបរបរជីករករ៉ែមាសជាលក្ខណៈគ្រួសារ ឬ បានត្រឹមអនុញ្ញាតឲ្យយកថ្មរ៉ែចាស់ៗ ដែលសល់ពីមុន យកទៅកិន ក្រែងបានរ៉ែបន្តិចបន្តួចសម្រាប់ផ្គត់ផ្គង់គ្រួសារ។
តំណាងអ្នកភូមិម្នាក់ទៀត បានលើកឡើងថា កាលពីរបីឆ្នាំមុន នៅក្នុងភូមិនេះ មានសភាពអ៊ូអរ មានមនុស្សចេញចូលហូរហែ។ ប៉ុន្តែក្រោយពីរណ្ដៅរ៉ែមាស ត្រូវបានក្រសួង បិទ អ្នកភូមិក៏បានចាកចេញជាបន្តបន្ទាប់ ទៅទីកន្លែងថ្មី ក្នុងខេត្តផ្សេង ដើម្បីរកមុខរបរចិញ្ចឹមជីវិត។ មូលហេតុនេះហើយ បច្ចុប្បន្ន ក្នុងភូមិពូទុង ឃុំចុងផ្លាស់ ហាក់មានភាពស្រងេះស្រងោច មានមនុស្សរស់នៅតិច សូម្បីសាលារៀន វត្តអារាម មណ្ឌលសុខភាព ក៏សឹងតែគ្មានមនុស្សផង។
យ៉ាងណាក៏ដោយ ក្រុមអ្នកភូមិ មិនបានជួបលោករដ្ឋមន្ត្រី ស៊ុយ សែម ដែលបានចុះទៅបំពេញបេសកកម្មក្នុងខេត្តមណ្ឌលគិរី ដោយឯកឧត្តម កាលពីថ្ងៃទី១២ ខែមករា ឆ្នាំ២០២១ បានទៅពិនិត្យទីតាំងក្រុមហ៊ុនចិន រុករករ៉ែមាស ឈ្មោះ រង់ ឈិន នៅស្រុកកែវសីមា។
លោក ស៊ុយ សែម បានព្រមានដល់ក្រុមហ៊ុនចិននេះថា បើត្រឹមដំណាច់ឆ្នាំ២០២១ នៅតែមិនមានសកម្មភាពប្រតិបត្តិការរុករក និងចម្រាញ់រ៉ែមាសទេ ក្រសួងនឹងលុបអាជ្ញាប័ណ្ណក្រុមហ៊ុន ហើយដាក់ដេញថ្លៃ បន្តឱ្យក្រុមហ៊ុនថ្មី ចូលធ្វើជំនួស។
ការបិទ និងហាមឃាត់អ្នកភូមិ មិនឲ្យរុករករ៉ែមាសនេះ ត្រូវបានគេលើកឡើងថា ក្រសួង ទុកលក់ឲ្យក្រុមហ៊ុន ធ្វើអាជីវកម្ម។
ប៉ុន្តែមន្ត្រីជំនាញ បានឲ្យដឹងថា ការមិនអនុញ្ញាតឱ្យអ្នកភូមិ អាចបង្កើតសហគមន៍រ៉ែមាសឡើងវិញនេះ ព្រោះតែក្រសួងជំនាញ ព្រួយបារម្ភពីបញ្ហាសុវត្ថិភាពមនុស្សទូទៅ ជាពិសេស គឺសុវត្ថិភាពផ្ទាល់ខ្លួនរបស់អ្នកភូមិ ដែលពួកគាត់ មិនមែនជាផ្នែកជំនាញ ក្នុងការរករ៉ែមាស ពោលគឺគាត់ចេះតៗគ្នាប៉ុណ្ណោះ។
មន្ត្រីដដែល បន្តថា កន្លងមក សកម្មភាពរបស់ពួកគាត់ ក៏បានប៉ះពាល់ដល់បញ្ហាបរិស្ថាន និងធ្វើឲ្យមានគ្រោះថ្នាក់ដល់មនុស្ស នៅក្នុងការដ្ឋានអណ្ដូងរ៉ែថែមទៀត។
បើតាមមន្ត្រីជំនាញ ក្នុងករណីដែលបងប្អូនប្រជាពលរដ្ឋ ត្រូវតែបើកអាជីវកម្មរ៉ែមាសនោះ ពួកគាត់ត្រូវចងក្រងគ្នា បង្កើតជាក្រុមហ៊ុនជំនាញ ដែលមានបច្ចេកទេស ក្នុងការរុករករ៉ែមាស ដើម្បីសុំច្បាប់ពីក្រសួងរ៉ែ និងថាមពល សម្រាប់អាជីវកម្មរ៉ែនេះ៕ ដោយ៖ សាយ ករុណា
ចែករំលែកព័តមាននេះ